ಸ್ವಾಭಿಮಾನಿ ಸರ್ಕಾರದಿಂದ ನೆಡುಮಾರನ್‌ ಒತ್ತಾಯ ತಿರಸ್ಕಾರ - ರಾಜ್‌ ಪುತ್ರ

ಬೆಂಗಳೂರು : ರಾಜ್‌ ಬಿಡುಗಡೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ ತಮಿಳು ರಾಷ್ಟ್ರೀಯ ಆಂದೋಲನದ ಮುಖಂಡ ಪಿ. ನೆಡುಮಾರನ್‌ ಅವರ, ವೀರಪ್ಪನ್‌ ವಿರುದ್ಧದ ಕಾರ್ಯಾಚರಣೆ ಕೈ ಬಿಡುವ ಒತ್ತಾಯವನ್ನು ತಿರಸ್ಕರಿಸುವ ಮೂಲಕ ರಾಜ್ಯ ಸರ್ಕಾರ ತನ್ನ ಸ್ವಾಭಿಮಾನ ಪ್ರದರ್ಶಿಸಿದೆ ಎಂದು ರಾಜ್‌ ಪುತ್ರ ರಾಘವೇಂದ್ರ ರಾಜಕುಮಾರ್‌ ಹೇಳಿದ್ದಾರೆ.

ವೀರಪ್ಪನ್‌ ವಿರುದ್ಧ ಕಾರ್ಯಾಚರಣೆ ನಡೆಸುವ ಸರ್ಕಾರದ ತೀರ್ಮಾನ ಸ್ವಾಗತಾರ್ಹ. ಸರ್ಕಾರ ಹಾಗೂ ಜನತೆ ಬೇರೆ ಬೇರೆಯಲ್ಲ . ಆದ್ದರಿಂದ ಜನತೆಯ ಅನಿಸಿಕೆಯೇ ಸರ್ಕಾರದ ತೀರ್ಮಾನವಾಗಿದೆ ಎಂದು ಖಾಸಗಿ ವಾಹಿನಿಯಾಂದಿಗೆ ಮಾತನಾಡುತ್ತಿದ್ದ ರಾಘವೇಂದ್ರ ಹೇಳಿದ್ದಾರೆ. ವೀರಪ್ಪನ್‌ ಕಾರ್ಯಾಚರಣೆ ಕುರಿತಂತೆ ರಾಜ್‌ ಕುಟುಂಬದವರು ಬಹಿರಂಗವಾಗಿ ಸ್ಪಷ್ಟ ಅಭಿಪ್ರಾಯ ವ್ಯಕ್ತ ಪಡಿಸುತ್ತಿರುವುದು ಇದೇ ಮೊದಲು.

ಮಂಡಿನೋವಿನ ಹೊರತಾಗಿ ರಾಜ್‌ ಸಂಪೂರ್ಣ ಆರೋಗ್ಯವಾಗಿದ್ದಾರೆ. ಕಾಡಿನಿಂದ ಹಿಂತಿರುಗಿದ ಕೆಲವು ದಿನಗಳು ನಿದ್ರೆಯ ಸಮಸ್ಯೆಯಿಂದ ಅವರು ಬಳಲಿದರು. ಪ್ರಸ್ತುತ ಆರೋಗ್ಯ ಕುರಿತಂತೆ ಯಾವುದೇ ಸಮಸ್ಯೆಗಳಿಲ್ಲ ಎಂದು ರಾಘವೇಂದ್ರ ಹೇಳಿದರು.

(ಇನ್ಫೋ ವಾರ್ತೆ)

ವಾರ್ತಾಸಂಚಯ
ಮುಖಪುಟ / ವೀರಪ್ಪನ್‌ ಶಿಕಾರಿ