ಪ್ರವಾಸದಲ್ಲಿ ಭಾರತ ತಂಡವನ್ನು ಸೋಲಿಸುತ್ತೇವೆ : ವಾ

ಪರ್ಥ್‌ : ಸತತ ಗೆಲುವುಗಳಿಂದ ಅತ್ಯುತ್ಸಾಹ ಹಾಗೂ ಆತ್ಮವಿಶ್ವಾಸದಿಂದ ಬೀಗುತ್ತಿರುವ ಆಸ್ಟ್ರೇಲಿಯಾ ಕ್ರಿಕೆಟ್‌ ತಂಡದ ನಾಯಕ ಸ್ಟೀವ್‌ ವಾ ಅವರು ಮುಂಬರುವ ಭಾರತ ವಿರುದ್ಧದ ಮೂರು ಟೆಸ್ಟ್‌ ಪಂದ್ಯಗಳಲ್ಲಿ ಯಾವುದೇ ಪಿಚ್‌ನಲ್ಲಿಯಾದರೂ ಭಾರತ ತಂಡವನ್ನು ಸೋಲಿಸಿಯೇ ತೀರುತ್ತೇವೆ ಎಂದು ನುಡಿದಿದ್ದಾರೆ.

ಭಾರತದ ಪಿಚ್‌ಗಳು ಆಸ್ಟ್ರೇಲಿಯಾ ಆಟಗಾರರಿಗೆ ಆಡಲಾಗದಂತಹ ಪಿಚ್‌ಗಳಾಗಿದ್ದು, ಈ ಪಿಚ್‌ನಲ್ಲಿ ಶಕ್ತಿ ಸಾಮರ್ಥ್ಯ ಮೆರೆಯಲು ಸಾಧ್ಯವೇ ಎಂದು ಪ್ರಶ್ನಿಸಿದಾಗ ವಾ ಈ ಉತ್ತರ ಕೊಟ್ಟರು. ಭಾರತದಲ್ಲಿ ನಮ್ಮ ಪಿಚ್‌ಗೆ ಹೋಲಿಸಿದರೆ, ಮಂದಗತಿಯ ಪಿಚ್‌ಗಳು ಇವೆ ಎಂಬುದನ್ನು ನಾನು ಬಲ್ಲೆ ಆದರೆ, ನಮಗೆ ಆಡಲೇ ಆಗದಂತಹ ಪಿಚ್‌ ಇದೆ ಎಂಬ ನಿಮ್ಮ ಹೇಳಿಕೆ ಆಶ್ಚರ್ಯಕರವಾಗಿದೆ ಎಂದರು. ನಮಗೆ ಯಾವ ಪಿಚ್‌ ಆದರೂ ಅಡ್ಡಿಯಿಲ್ಲ. ಪ್ರವಾಸದಲ್ಲಿ ನಮಗೆ ಎಂತಹ ಪಿಚ್‌ ನೀಡುತ್ತಾರೆ ಎಂಬ ಬಗ್ಗೆ ನಾವು ಚಿಂತಿಸುವುದೇ ಇಲ್ಲ. ನಾವು ನಮ್ಮ ಸಾಮರ್ಥ್ಯ ಹಾಗೂ ಆಟವನ್ನಷ್ಟೇ ಅವಲಂಬಿಸಿದ್ದೇವೆ. ಪಿಚ್‌ ಅನ್ನು ಅಲ್ಲ ಎಂದರು. ಗೆಲ್ಲಲೇ ಬೇಕು ಎಂದು ಆಡುವ ತಮ್ಮ ತಂಡ ಭಾರತವನ್ನು ಸೋಲಿಸುತ್ತದೆ. ಏನೇ ಬಂದರೂ ನಾವು ಅದನ್ನು ಎದುರಿಸುತ್ತೇವೆ ಎಂದರು.