ಗುಜರಾತ್‌ ಭೂಕಂಪ ಸಂತ್ರಸ್ತರಿಗೆ ಹೃತಿಕ್‌ರಿಂದ10 ಲಕ್ಷ ರು. ನೆರವು

ಮುಂಬಯಿ : ಬಾಲಿವುಡ್‌ನ ಕನಸಿನ ರಾಜ ಹೃತಿಕ್‌ ರೋಷನ್‌ ಗುಜರಾತ್‌ ಭೂಕಂಪ ಸಂತ್ರಸ್ತರ ಪುನರ್ವಸತಿಗಾಗಿ ಹತ್ತು ಲಕ್ಷ ರುಪಾಯಿಗಳ ನೆರವು ನೀಡಿದ್ದಾರೆ. ಬಾಲಿವುಡ್‌ ಮಾಜಿ ತಾರೆ ಹಾಗೂ ತಮ್ಮ ತಂದೆ ರಾಕೇಶ್‌ ರೋಷನ್‌ ಅವರ ಜತೆಗೂಡಿ ಮಹಾರಾಷ್ಟ್ರದ ಮುಖ್ಯಮಂತ್ರಿ ವಿಲಾಸ್‌ ರಾವ್‌ ದೇಶ್‌ಮುಖ್‌ ಅವರನ್ನು ಭೇಟಿ ಮಾಡಿದ ಹೃತಿಕ್‌ ಶನಿವಾರ ಹತ್ತು ಲಕ್ಷ ರುಪಾಯಿಗಳ ಮೌಲ್ಯದ ಚೆಕ್‌ ಅನ್ನು ನೀಡಿದರು.

ಈ ವಿಷಯವನ್ನು ಮಹಾರಾಷ್ಟ್ರ ಮುಖ್ಯಮಂತ್ರಿಗಳ ಕಾರ್ಯಾಲಯದ ಉನ್ನತಾಧಿಕಾರಿ ಮೂಲಗಳು ಶನಿವಾರ ಮಧ್ಯಾಹ್ನ ತಿಳಿಸಿವೆ. ಇದಕ್ಕೂ ಮುನ್ನ ದೇಶ್‌ಮುಖ್‌ ಅವರು ಪ್ರದರ್ಶನ ಪಂದ್ಯಗಳು, ಬಾಲಿವುಡ್‌ ನಟ- ನಟಿಯರ ನೆರವಿನಿಂದ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಏರ್ಪಡಿಸುವ ಮೂಲಕ ಭೂಕಂಪ ಸಂತ್ರಸ್ತರ ನಿಧಿಗೆ ಹತ್ತು ಕೋಟಿ ರುಪಾಯಿಗಳನ್ನು ಸಂಗ್ರಹಿಸುವುದಾಗಿ ಘೋಷಿಸಿದ್ದರು.

ಪ್ರಧಾನಿ ವಿದೇಶ ಪ್ರವಾಸ ರದ್ದು : ಗುಜರಾತ್‌ ಭೂಕಂಪದ ಹಿನ್ನೆಲೆಯಲ್ಲಿ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಅವರು, ನಿಗದಿತ ಒಂದು ವಾರಗಳ ಮಲೇಶಿಯಾ ಹಾಗೂ ಜಪಾನ್‌ ಪ್ರವಾಸ ಕಾರ್ಯಕ್ರಮವನ್ನು ರದ್ದು ಪಡಿಸಿದ್ದಾರೆ.

ಪ್ರಸಕ್ತ ಕೈರೋದಲ್ಲಿರುವ ಕೇಂದ್ರ ವಿದೇಶಾಂಗ ವ್ಯವಹಾರಗಳ ಖಾತೆ ಸಚಿವ ಜಸ್ವಂತ್‌ ಸಿಂಗ್‌ ಅವರನ್ನು ಸಂಪರ್ಕಿಸಿ, ಮಾತುಕತೆ ನಡೆಸಿದ ತರುವಾಯ ಪ್ರಧಾನಿಯವರು ಈ ನಿರ್ಧಾರ ಕೈಗೊಂಡರು ಎಂದು ಪ್ರಧಾನಮಂತ್ರಿಗಳ ಕಾರ್ಯಾಲಯದ ವಕ್ತಾರರು ತಿಳಿಸಿದ್ದಾರೆ.

ಮಲೇಶಿಯಾ ಹಾಗೂ ಜಪಾನ್‌ ಸರಕಾರಗಳಿಗೆ ಅನಿವಾರ್ಯ ಪರಿಸ್ಥಿತಿಯಲ್ಲಿ ಕೈಗೊಳ್ಳಲಾಗಿರುವ ಈ ನಿರ್ಧಾರದ ಬಗ್ಗೆ ತಿಳಿಸುವಂತೆ ಪ್ರಧಾನಿ ವಾಜಪೇಯಿ ಅವರು ವಿದೇಶಾಂಗ ಕಾರ್ಯದರ್ಶಿ ಲಲಿತ್‌ ಮಾನ್‌ಸಿಂಗ್‌ ಅವರಿಗೆ ತಿಳಿಸಿದ್ದಾರೆ ಎಂದೂ ವಕ್ತಾರರು ತಿಳಿಸಿದ್ದಾರೆ.

ಮುಖಪುಟ