ಭಾರಿ ಉಪಕರಣ ಬಳಕೆಗೆ ತಡೆ, ವಿಳಂಬಗೊಂಡ ಕಾರ್ಯಾಚರಣೆ

ಭುಜ್‌ : ಜನವರಿ 26ರಿಂದೀಚೆಗೆ ಭುಜ್‌ನಲ್ಲಿ ಮತ್ತೆ ಮತ್ತೆ ಭೂಮಿ ಕಂಪಿಸುತ್ತಲೇ ಇದೆ. 7ನೇ ದಿನವಾದ ಗುರುವಾರ ಬೆಳಗಿನ ಜಾವ ಕೂಡ ಇಲ್ಲಿ 122ನೇ ಬಾರಿಗೆ ಲಘು ಭೂಕಂಪ ಸಂಭವಿಸಿದೆ. ರಿಕ್ಟರ್‌ ಮಾಪಕದಲ್ಲಿ ಭೂಕಂಪದ ತೀವ್ರತೆ 4.8 ಎಂದು ದಾಖಲಾಗಿದೆ.

ಭುಜ್‌ ಪಟ್ಟಣದಲ್ಲಿ ಕೇಂದ್ರೀಕೃತವಾಗಿದ್ದ ಭೂಕಂಪನದ ಅನುಭವ ಮುಂಬಯಿಯಲ್ಲಿ ಆಗಿಲ್ಲ ಎಂದು ಭಾರತೀಯ ಭೂಕಂಪ ಸಂಶೋಧನಾ ಇಲಾಖೆ ವರದಿಗಳು ತಿಳಿಸಿವೆ. ಈ ಮಧ್ಯೆ ಕುಸಿಯದೇ ಉಳಿದ ಮನೆಗಳಲ್ಲಿ ವಾಸಿಸುತ್ತಿದ್ದ ಜನತೆ ಮತ್ತೆ ಮತ್ತೆ ಘಟಿಸುತ್ತಿರುವ ಭೂಕಂಪಕ್ಕೆ ಹೆದರಿ ನಿರಾಶ್ರಿತರ ಶಿಬಿರಗಳಲ್ಲಿ ಆಶ್ರಯ ಪಡೆದಿದ್ದಾರೆ.

ಭಾರಿ ಉಪಕರಣ ಬಳಕೆಗೆ ತಡೆ : ಕುಸಿದ ಕಟ್ಟಡಗಳಲ್ಲಿ ಹಾಳಾಗದೇ ಉಳಿದ ತಮ್ಮ ಸರಕು ಸಾಮಗ್ರಿಗಳನ್ನು ಮೂಟೆ ಕಟ್ಟಿಕೊಂಡು ಊರು ಬಿಡುತ್ತಿರುವವರ ದೃಶ್ಯ ಭುಜ್‌ನಲ್ಲಿ ಸಾಮಾನ್ಯವಾಗಿದೆ. ಕುಸಿದಿರುವ ಕಟ್ಟಡಗಳ ಭಗ್ನಾವಶೇಷಗಳನ್ನು ತೆಗೆಯಲು ದೊಡ್ಡ ಗಾತ್ರದ ಉಪಕರಣಗಳನ್ನು ಬಳಸದಂತೆ ಇಲ್ಲಿನ ನಾಗರಿಕರು ಅಡ್ಡಿ ಮಾಡುತ್ತಿದ್ದಾರೆ.

ಇನ್ನೂ ತಮ್ಮ ಬಂಧು ಬಾಂಧವರು ಕಟ್ಟಡಗಳ ಅಡಿಯಲ್ಲಿ ಬದುಕುಳಿದಿರುವ ನಂಬಿಕೆ ಇಟ್ಟುಕೊಂಡಿರುವ ಇವರು, ಭಾರಿ ಗಾತ್ರದ ಉಪಕರಣಗಳ ಬಳಕೆಯಿಂದ ಅವರು ಸಾವನ್ನಪ್ಪಬಹುದು ಎಂಬ ಆತಂಕ ವ್ಯಕ್ತಪಡಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ರಕ್ಷಣಾ ಕಾಮಗಾರಿ ಮತ್ತಷ್ಟು ವಿಳಂಬವಾಗುತ್ತಿದೆ ಎಂದು ಪರಿಹಾರ ಕಾರ್ಯತಂಡದ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಮಧ್ಯೆ ಸಂಪೂರ್ಣ ಅಸ್ತವ್ಯಸ್ತವಾಗಿದ್ದ ವಿದ್ಯುತ್‌ ಮಾರ್ಗಗಳನ್ನು ಸರಿಪಡಿಸಿ, ಕೆಲವು ಪ್ರದೇಶಗಳಿಗೆ ವಿದ್ಯುತ್‌ ಪೂರೈಸುವಲ್ಲಿ ಗುಜರಾತ್‌ ರಾಜ್ಯ ವಿದ್ಯುತ್‌ ನಿಗಮ ಯಶಸ್ವಿಯಾಗಿದೆ.

ಮುಖಪುಟ