ಹೇಳಿಕೆಯ ಮೂಲಕ ಭೂಕಂಪ ಸೃಷ್ಟಿಸಿದ್ದ ಸಚಿವ ಜಾನ್‌ ರಾಜೀನಾಮೆ

ಬೆಂಗಳೂರು : ಗುಜರಾತ್‌ನ ಭೂಕಂಪಕ್ಕೂ ಕ್ರೆೃಸ್ತರ ಮೇಲಿನ ಹಲ್ಲೆಗೂ ಸಂಬಂಧ ಕಲ್ಪಿಸಿ ವಿವಾದ ಸೃಷ್ಟಿಸಿದ್ದ ನಾಗರಿಕ ವಿಮಾನಯಾನ ಸಚಿವ ಟಿ. ಜಾನ್‌ ತಮ್ಮ ಸಚಿವ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. ಬುಧವಾರ ಬೆಳಿಗ್ಗೆ ವಿಧಾನಸೌಧದಲ್ಲಿ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರನ್ನು ಭೇಟಿ ಮಾಡಿದ ಜಾನ್‌, ಮುಖ್ಯಮಂತ್ರಿಗಳೊಂದಿಗೆ ದೀರ್ಘಕಾಲದ ಚರ್ಚೆಯ ನಂತರ ರಾಜ್ಯ ಸಚಿವ ಸಂಪುಟಕ್ಕೆ ರಾಜೀನಾಮೆ ಸಲ್ಲಿಸಿದರು.

ಜಾನ್‌ ಅವರ ಹೇಳಿಕೆಯನ್ನು ವಿರೋಧಿಸಿ ವಿವಿಧ ವಲಯಗಳಿಂದ ಎದುರಾದ ಭಾರೀ ಪ್ರತಿರೋಧದ ಹಿನ್ನೆಲೆಯಲ್ಲಿ ಅವರು ರಾಜೀನಾಮೆ ನೀಡಿದ್ದಾರೆ. ಗುಜರಾತ್‌ನಲ್ಲಿ ನಡೆದ ಭೂಕಂಪವನ್ನು ಕ್ರಿಶ್ಚಿಯನ್ನರ ಮೇಲಿನ ಹಲ್ಲೆಗಳಿಗೆ ದೇವರು ನೀಡಿದ ಶಿಕ್ಷೆ ಎಂದು ಜಾನ್‌ ಮಂಗಳವಾರ ಬಣ್ಣಿಸಿದ್ದರು.

ಇದಕ್ಕೂ ಮುನ್ನ ಭಾರತೀಯ ಜನತಾಪಕ್ಷದ ನೇತೃತ್ವದಲ್ಲಿ ಮುಖ್ಯಮಂತ್ರಿಗಳನ್ನು ಭೇಟಿ ಮಾಡಿದ ವಿವಿಧ ಸಂಘಟನೆಗಳ ನೇತಾರರು, ಪ್ರಕೃತಿ ವಿಕೋಪಕ್ಕೆ ಸಂಬಂಧಿಸಿದಂತೆ ಅಮಾನವೀಯ ಹೇಳಿಕೆ ನೀಡುವ ಮೂಲಕ ವಿಶ್ವವನ್ನು ದಂಗು ಬಡಿಸಿದ ಜಾನ್‌ರನ್ನು ಸಂಪುಟದಿಂದ ಕೈ ಬಿಡುವಂತೆ ಕೃಷ್ಣ ಅವರನ್ನು ಒತ್ತಾಯಿಸಿದ್ದರು.

(ಯುಎನ್‌ಐ)