ಇಸ್ಲಮಾಬಾದ್‌ನಿಂದ ಅಹಮದಾಬಾದ್‌ಗೆ ಬಂದ ನೆರವು

ಅಹಮದಾಬಾದ್‌ : ಗುಜರಾತಿನ ಭೂಕಂಪ ಗ್ರಸ್ತರಿಗೆ ಇಸ್ಲಮಾಬಾದಿನಿಂದ ನೆರವು ಹರಿವಿನ ಪ್ರಕ್ರಿಯೆ ಆರಂಭವಾಗಿದ್ದು, ಪಾಕಿಸ್ತಾನದ ನೆರವಿನ ಪರಿಹಾರ ಸಾಮಗ್ರಿಗಳನ್ನು ಹೊತ್ತ ಸಿ- 130 ವಿಮಾನ ಮಂಗಳವಾರ ಮಧ್ಯಾಹ್ನ ಇಲ್ಲಿನ ಸರ್ದಾರ್‌ ಪಟೇಲ್‌ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿಯಿತು.

ಇನ್ನೆರಡು ದಿನಗಳಲ್ಲಿ ಮತ್ತೆರಡು ಪರಿಹಾರ ಸಾಮಗ್ರಿಗಳನ್ನು ಹೊತ್ತ ವಿಮಾನಗಳು ಗುಜರಾತ್‌ ನೆರವಿಗೆ ಬರಲಿವೆ ಎಂದು ಪಾಕಿಸ್ತಾನಿ ತುರ್ತು ಪರಿಹಾರ ಘಟಕದ ಮಹಾ ನಿರ್ದೇಶಕ ಇಲಿಯಾಸ್‌ ಹುಸೇನ್‌ ಮಂಗಳವಾರ ಸುದ್ದಿಗಾರರಿಗೆ ತಿಳಿಸಿದರು. ಗುಜರಾತ್‌ಗೆ ಆಗಮಿಸಿರುವ ಸಹಾಯಾರ್ಥ ತಂಡದ ನೇತೃತ್ವವನ್ನು ಅವರು ವಹಿಸಿದ್ದಾರೆ. ಭಾರತದೊಂದಿಗೆ ನಾವು ಸೌಹಾರ್ದ ಸಂಬಂಧವನ್ನು ಹೊಂದಲು ಬಯಸುತ್ತೇವೆ ಎಂದು ಇಲಿಯಾಸ್‌ ಹೇಳಿದರು.

200 ಟೆಂಟ್‌ಗಳು, 2500 ಬ್ಲಾಂಕೆಟ್‌ಗಳು ಮಂಗಳವಾರ ಇಸ್ಲಮಾಬಾದ್‌ನಿಂದ ಅಹಮದಾಬಾದ್‌ಗೆ ಬಂದ ನೆರವಿನಲ್ಲಿ ಸೇರಿವೆ. ಜನವರಿ 26 ರಂದು ಪಾಕಿಸ್ತಾನದಲ್ಲಿ ಸಂಭವಿಸಿದ್ದು ಸಣ್ಣ ಪ್ರಮಾಣದ ಭೂಕಂಪ ಎಂದು ಇಲಿಯಾಸ್‌ ತಿಳಿಸಿದರು.

(ಯಎನ್‌ಐ)