ಭೂಕಂಪಕ್ಕೆ 1 ಲಕ್ಷ ಮಂದಿ ತುತ್ತು : ಜಾರ್ಜ್‌ ಅಂದಾಜು

ನವದೆಹಲಿ : ಗುಜರಾತ್‌ನಲ್ಲಿ ಸಂಭವಿಸಿರುವ ಭೂಕಂಪಕ್ಕೆ 1 ಲಕ್ಷಕ್ಕೂ ಹೆಚ್ಚು ಮಂದಿ ಬಲಿಯಾಗಿರುವ ಸಾಧ್ಯತೆಯಿದೆ ಎಂದು ಕೇಂದ್ರ ರಕ್ಷಣಾ ಸಚಿವ ಜಾರ್ಜ್‌ ಫರ್ನಾಂಡಿಸ್‌ ಬಿಬಿಸಿ ವರ್ಲ್ಡ್‌ ಚಾನೆಲ್‌ಗೆ ನೀಡಿರುವ ಸಂದರ್ಶನದಲ್ಲಿ ತಿಳಿಸಿದ್ದಾರೆ.

ವೈಮಾನಿಕ ಸಮೀಕ್ಷೆಯಿಂದ ಈ ವಿಷಯ ತಿಳಿದುಬಂದಿರುವುದಾಗಿ ಹೇಳಿದ ಫರ್ನಾಂಡಿಸ್‌, ಸುಮಾರು 2 ಲಕ್ಷ ಮಂದಿ ಭೂಕಂಪದ ಹೊಡೆತ ತಿಂದು, ಚಿಕಿತ್ಸೆ ಪಡೆಯುತ್ತಿದ್ದಾರೆ. ಕಟ್ಟಡಗಳ ಕಳಪೆ ಕಾಮಗಾರಿಯೂ ಬಹುತೇಕರ ಜೀವಹಾನಿಗೆ ಕಾರಣವಾಗಿರುವುದು ಸ್ಪಷ್ಟವಾಗಿದೆ ಎಂದರು. ಈವರೆಗೆ ಸುಮಾರು 7 ಸಾವಿರ ಶವಗಳನ್ನು ಅವಶೇಷಗಳಿಂದ ಹೊರತೆಗೆಯಲಾಗಿದೆ.

ವಿವಿಧ ಸೇವಾ ತುಕಡಿಗಳು, ಸ್ವಯಂ ಸೇವಾ ಸಂಸ್ಥೆಗಳು (ರೆಡ್‌ಕ್ರಾಸ್‌ ಸಹಿತ), ಖಾಸಗಿ ಸೇವಾ ಸಂಘ- ಸಂಸ್ಥೆಗಳು ಗುಜರಾತಿನ ಕಷ್ಟದ ನೊಗವನ್ನು ಹೊತ್ತಿದ್ದು, ಕುಸಿದ ಕಟ್ಟಡದ ಪರಿಕರಗಳ ನಡುವೆ ಹೂತು- ಹುದುಗಿ ಹೋಗಿರುವ ಶವಗಳನ್ನು ಹೊರಗೆತ್ತುವ ಪ್ರಯತ್ನ ನಡೆಸಿದ್ದಾರೆ. 5 ದಿನಗಳ ಕಾಲವಾದ್ದರಿಂದ ಹೆಣಗಳು ಕೊಳೆಯುತ್ತಿದ್ದು, ಗುಜರಾತಿಗೆ ಸಾಂಕ್ರಾಮಿಕ ರೋಗ ಹರಡುವ ಸಾಧ್ಯತೆಯೂ ಇದೆ.

(ಇನ್ಫೋ ವಾರ್ತೆ)