ರಾಜ್ಯದಿಂದ ಗುಜರಾತ್‌ಗೆ ಒಟ್ಟು 34 ಮಂದಿ ವೈದ್ಯರ ತಂಡ

ಬೆಂಗಳೂರು : ಭೂಕಂಪದಿಂದಾಗಿ ತೀವ್ರ ಸಂಕಷ್ಟಕ್ಕೆ ಸಿಲುಕಿರುವ ಗುಜರಾತ್‌ನಲ್ಲಿ ಗಾಯಾಳುಗಳನ್ನು ಉಪಚರಿಸಲು ಔಷಧಗಳ ಕೊರತೆಯ ಜತೆಗೆ ವೈದ್ಯರ ಕೊರತೆಯೂ ಹೆಚ್ಚುತ್ತಿದೆ. 70 ಸಾವಿರಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದು, ಗಾಯಾಳುಗಳಿಗೆ ಸೂಕ್ತ ಸಮಯದಲ್ಲಿ ವೈದ್ಯರ ನೆರವು ದೊರಕದಾಗಿದೆ. ಇದನ್ನು ಮನಗಂಡ ರಾಜ್ಯ ಸರಕಾರ ಸೋಮವಾರ ಸಹ 13 ಜನ ವೈದ್ಯರ ತಂಡವನ್ನು ಗುಜರಾತ್‌ಗೆ ಕಳುಹಿಸಿದೆ.

ಈ ವಿಷಯವನ್ನು ರಾಜ್ಯ ಆರೋಗ್ಯ ಸಚಿವ ಡಾ. ಮಾಲಕರೆಡ್ಡಿ ತಿಳಿಸಿದ್ದಾರೆ. ಗುಜರಾತ್‌ ಸಂತ್ರಸ್ತರ ನೆರವಿಗಾಗಿ ಶನಿವಾರವೇ 9 ಜನ ವೈದ್ಯರು ಹಾಗೂ ಔಷಧಗಳನ್ನು ಕಳುಹಿಸಲಾಗಿತ್ತು. ಭಾನುವಾರದ ವಿಶೇಷ ರೈಲಿನಲ್ಲಿ ಕೂಡ ಔಷಧ ಸಾಮಗ್ರಿ ಕಳುಹಿಸಲಾಗಿದೆ, ಅಲ್ಲದೆ 12 ಜನ ಮೂಳೆ ತಜ್ಞರ ತಂಡ ಗುಜರಾತ್‌ಗೆ ತೆರಳಿತು. ಇಂದು ಕೂಡ 13 ಜನ ವೈದ್ಯರೊಂದಿಗೆ ಔಷಧಗಳು ಹಾಗೂ ಅಗತ್ಯ ವೈದ್ಯಕೀಯ ಉಪಕರಣ ಕಳುಹಿಸಲಾಗಿದೆ ಎಂದು ಅವರು ಹೇಳಿದರು.

ಎಂ.ಎಸ್‌. ರಾಮಯ್ಯ ಆಸ್ಪತ್ರೆಯಲ್ಲಿ ಪೋಲಿಯೋ ಮತ್ತು ಶಸ್ತ್ರ ಚಿಕಿತ್ಸಾ ಶಿಬಿರ ಉದ್ಘಾಟಿಸಿದ ಬಳಿಕ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಅವರು, ಈವರೆಗೆ ರಾಜ್ಯದಿಂದ 16 ಲಕ್ಷ ರುಪಾಯಿ ಮೌಲ್ಯದ ಔಷಧಗಳನ್ನು ಕಳುಹಿಸಲಾಗಿದೆ ಎಂದರು.

ಹ್ಯಾಲೋಜನ್‌ ಸರಬರಾಜು : ಗುಜರಾತ್‌ ಭೂಕಂಪದಲ್ಲಿ ಬದುಕುಳಿದಿರುವ ಮಂದಿ ಶುದ್ಧ ಕುಡಿಯುವ ನೀರಿಗೂ ಪರದಾಡುತ್ತಿದ್ದಾರೆ. ಈ ಎಲ್ಲರಿಗೂ ಶುದ್ಧ ನೀರು ಒದಗಿಸುವುದು ಸಾಧ್ಯವಿಲ್ಲ. ಆದಕ್ಕಾಗೇ ನೀರನ್ನು ಸ್ವಚ್ಛಗೊಳಿಸುವ ಹ್ಯಾಲೋಜನ್‌ ಔಷಧವನ್ನು ರಾಜ್ಯದಿಂದ ಒದಗಿಸಲಾಗುತ್ತಿದೆ ಎಂದು ಅವರು ತಿಳಿಸಿದರು.

ಬೆಳಗಾವಿ ವರದಿ : ಬೆಳಗಾವಿ ಜಿಲ್ಲಾಡಳಿತ ಸಹ ಗುಜರಾತ್‌ ಸಂತ್ರಸ್ತರ ನೆರವಿಗೆ ಬಂದಿದ್ದು ಕಂಬಳಿಗಳೂ ಸೇರಿದಂತೆ ಸುಮಾರು 15 ಲಕ್ಷ ರುಪಾಯಿಗಳ ನೆರವು ಸಾಮಗ್ರಿಯನ್ನು ಗುಜರಾತ್‌ಗೆ ಕಳುಹಿಸಿದೆ.

(ಇಂಡಿಯಾ ಇನ್‌ಫೋ ವರದಿ)