ಭೂಕಂಪ: ವಿಶೇಷ ರೈಲಿನ ಮಾಹಿತಿ ನೀಡುವದೂರವಾಣಿ ಸಂಖ್ಯೆಗಳು

ಬೆಂಗಳೂರು : ಗುಜರಾತ್‌ ಭೂಕಂಪ ಸಂತ್ರಸ್ತರ ಬಂಧು - ಬಾಂಧವರು, ಪರಿಹಾರ ಕಾರ್ಯಕರ್ತರು, ಔಷಧ ಸಾಮಗ್ರಿ, ವೈದ್ಯರ ತಂಡ, ಪರಿಹಾರ ಕಾಮಗಾರಿಗೆ ಅಗತ್ಯವಾದ ಇನ್ನಿತರ ಸರಕು ಸರಂಜಾಮುಗಳನ್ನು ಹೊತ್ತ ವಿಶೇಷ ರೈಲು ಭಾನುವಾರ ಸಂಜೆ 5 ಗಂಟೆಗೆ ಬೆಂಗಳೂರು ರೈಲು ನಿಲ್ದಾಣದಿಂದ ಅಹಮದಾಬಾದ್‌ಗೆ ತೆರಳಲಿದೆ.

ಧರ್ಮಾವರಂ ಮಾರ್ಗವಾಗಿ ಸಾಗುವ ಈ ವಿಶೇಷ ರೈಲಿನಲ್ಲಿ ಉಚಿತ ಪ್ರಯಾಣದ ವ್ಯವಸ್ಥೆ ಕಲ್ಪಿಸಲಾಗಿದೆ. ಹೆಚ್ಚಿನ ಮಾಹಿತಿಗೆ 6707731, 2876288, 2203269 ಮತ್ತು 2876410 ದೂರವಾಣಿ ಸಂಖ್ಯೆಗಳನ್ನು ಸಂಪರ್ಕಿಸುವಂತೆ ಪ್ರಕಟಣೆ ತಿಳಿಸಿದೆ.

ಶನಿವಾರ ಸಂಜೆ ಕೂಡ 50 ಮಂದಿ ಕಾರ್ಯಕರ್ತರನ್ನು ಹೊತ್ತ ರೈಲು ಅಹಮದಾಬಾದ್‌ಗೆ ತೆರಳಿತ್ತು. ಭೂಕಂಪದಲ್ಲಿ ಅತಿ ಹೆಚ್ಚು ಹಾನಿಗೊಳಗಾಗಿರುವ ಭುಜ್‌ ಪ್ರದೇಶಕ್ಕೆ ಸಮೀಪದ ಧಂಗದ್ರ ನಿಲ್ದಾಣಕ್ಕೆ ಕೋಲ್ಕತ್ತಾ, ಚೆನ್ನೈ, ದೆಹಲಿ, ಬೆಂಗಳೂರಿನಿಂದ ರೈಲುಗಳು ತಲುಪಲಿವೆ. ಇಂಡಿಯನ್‌ ಏರ್‌ಲೈನ್ಸ್‌ ಸಹ ಪರಿಹಾರ ಸಾಮಗ್ರಿಗಳನ್ನು ಉಚಿತವಾಗಿ ಸಾಗಿಸುತ್ತಿದೆ.

ಕುಸಿದ ಕಟ್ಟಡಗಳ ಅವಶೇಷಗಳಡಿಯಲ್ಲಿ ಸಿಲುಕಿರುವ ಶವಗಳನ್ನು ಹೊರತೆಗೆಯಲು 4700 ಯೋಧರು ಭುಜ್‌ ಪ್ರದೇಶದಲ್ಲಿ ಕರ್ತವ್ಯ ನಿರತರಾಗಿದ್ದಾರೆ. ಕೊರೆಯುವ ಚಳಿಯನ್ನೂ ಲೆಕ್ಕಿಸದೆ, ಬೃಹತ್‌ ಜನರೇಟರ್‌, ಅತ್ಯಾಧುನಿಕ ಉಪಕರಣಗಳ ನೆರವಿನಿಂದ ಅಹೋರಾತ್ರಿ ಪರಿಹಾರ ಕಾಮಗಾರಿಗಳ ನಡೆಯುತ್ತಿವೆ.

ವಿಜ್ಞಾನಿಗಳ ತಂಡ : ಭೂಕಂಪದ ಪ್ರಮಾಣ ಹಾಗೂ ಹಾನಿಯ ಅಧ್ಯಯನಕ್ಕೆ ರೂರ್ಕಿ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ಹಾಗೂ ಎಂಜಿನಿಯರುಗಳ ತಂಡ ಭೂಕಂಪ ಪೀಡಿತ ಪ್ರದೇಶಕ್ಕೆ ತೆರಳಿದೆ.

ಕೆ.ಪಿ.ಟಿ.ಸಿ.ಎಲ್‌ ಕೊಡುಗೆ: ಕರ್ನಾಟಕ ವಿದ್ಯುತ್‌ ಪ್ರಸರಣ ನಿಗಮದ ನೌಕರರು ಜನವರಿ ತಿಂಗಳ ಒಂದು ದಿನದ ವೇತನವಾದ 1.50 ಕೋಟಿ ರುಪಾಯಿಗಳನ್ನು ಭೂಕಂಪ ಸಂತ್ರಸ್ತರ ನೆರವಿಗೆ ಮುಖ್ಯಮಂತ್ರಿ ಪರಿಹಾರ ನಿಧಿಯ ಮೂಲಕ ನೀಡಲು ನಿರ್ಧರಿಸಿದ್ದಾರೆ. ವಿವಿಧ ಇಲಾಖೆಗಳ ನೌಕರರು, ಸಂಘ ಸಂಸ್ಥೆಗಳೂ ನೆರವು ನೀಡಲು ಮುಂದಾಗಿವೆ.