ಏಕ ಪುರುಷನಂತೆ ನೆರವಿಗೆ ಧಾವಿಸಲು ರಾಷ್ಟ್ರಪತಿ- ಪ್ರಧಾನಿ ಮನವಿ

ನವದೆಹಲಿ : ಗುಜರಾತ್‌ನ ಭೂಕಂಪ ಪೀಡಿತ ಸಂತ್ರಸ್ತರಿಗೆ ದೇಶಬಾಂಧವರು ಉದಾರವಾಗಿ ನೆರವು ನೀಡಬೇಕು ಎಂದು ರಾಷ್ಟ್ರಪತಿ ಕೆ.ಆರ್‌. ನಾರಾಯಣನ್‌ ಮನವಿ ಮಾಡಿದ್ದಾರೆ.

ಗಣರಾಜ್ಯೋತ್ಸವ ದಿನದಂದು ದೇಶದಲ್ಲಿ ಸಂಭವಿಸಿರುವ ಭೂಕಂಪದ ಸುದ್ದಿ ಕೇಳಿ ಆಘಾತವಾಯಿತು. ಸಾವಿರಾರು ಜನರ ಜೀವಹಾನಿ ತಮಗೆ ಅಪಾರ ನೋವು ತಂದಿದೆ ಎಂದು ರಾಷ್ಟ್ರಪತಿ ಹೇಳಿದ್ದಾರೆ. ಸರ್ಕಾರ ಹಾಗೂ ಜನತೆಯ ಏಕ ಪ್ರಯತ್ನದಿಂದ ಸಂತ್ರಸ್ತರಿಗೆ ಶೀಘ್ರದಲ್ಲೇ ನೆಮ್ಮದಿ ದೊರೆಯುವುದೆಂದು ಅವರು ಆಶಿಸಿದ್ದಾರೆ. ಉಪ ರಾಷ್ಟ್ರಪತಿ ಕೃಷ್ಣಕಾಂತ್‌ ಕೂಡ ಸಂತ್ರಸ್ತರ ಕುರಿತು ಶೋಕ ವ್ಯಕ್ತಪಡಿಸಿದ್ದಾರೆ.

ಏಕ ಪುರುಷನಂತೆ ಒಂದಾಗಿ : ಶುಕ್ರವಾರ ಇಳಿಸಂಜೆ ನಡೆದ ಸಚಿವ ಸಂಪುಟ ಸಭೆಯ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಪ್ರಧಾನಿ ವಾಜಪೇಯಿ, ಪ್ರಾಕೃತಿಕ ದುರಂತದಿಂದ ತಮಗೆ ಆಘಾತವಾಗಿದೆ. ಆದರೆ, ಈ ತುರ್ತು ಪರಿಸ್ಥಿತಿಯನ್ನು ನಿಭಾಯಿಸಲು ಸಿದ್ಧರಾಗಿದ್ದೇವೆ ಎಂದು ಹೇಳಿದ್ದಾರೆ. ಅಗತ್ಯ ಬಿದ್ದರೆ ಭೂಕಂಪವನ್ನು ರಾಷ್ಟ್ರೀಯ ದುರಂತವಾಗಿ ಪರಿಗಣಿಸಲಾಗುವುದು ಎಂದು ಹೇಳಿದ ಪ್ರಧಾನಿ, ನೊಂದವರಿಗೆ ನೆರವು ನೀಡಲು ದೇಶದೆಲ್ಲಾ ಬಾಂಧವರು ಏಕಪುರುಷನಂತೆ ಒಂದಾಗಬೇಕು ಎಂದು ಮನವಿ ಮಾಡಿದ್ದಾರೆ.

ಪಾಕಿಸ್ತಾನದ ಸರ್ವಾಧಿಕಾರಿಯ ಶೋಕ : ಭೂಕಂಪ ಪೀಡಿತ ಸಂತ್ರಸ್ತ ಭಾರತೀಯರ ನೋವಿನಲ್ಲಿ ಪಾಕಿಸ್ತಾನಿ ಸರ್ಕಾರ ಹಾಗೂ ಜನತೆ ಭಾಗಿಯಾಗುತ್ತದೆ ಎಂದು ಪಾಕಿಸ್ತಾನದ ಸೇನಾಡಳಿತಗಾರ ಪರ್ವೇಜ್‌ ಮುಷ್ರಾಫ್‌ ತಮ್ಮ ಶೋಕ ಸಂದೇಶದಲ್ಲಿ ತಿಳಿಸಿದ್ದಾರೆ. ಅವರು ಈ ಕುರಿತಂತೆ ಭಾರತದ ಪ್ರಧಾನಿಗೆ ಪತ್ರ ಬರೆದಿದ್ದಾರೆ.

(ಇನ್ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...