ಬೆಂಗಳೂರಲ್ಲಿ ಟೆನಿಸ್‌ ಆಟಗಾರ ಸ್ಪಾಟ್‌ಲ್‌ರ 700 ಡಾಲರ್‌ ಕಳವು

ಬೆಂಗಳೂರು : ಅಪರಾಧಗಳ ನಗರ ಎಂಬ ಹಣೆಪಟ್ಟಿ ಕಟ್ಟಿಕೊಂಡಿರುವ ನಗರದಲ್ಲಿ ಆಸ್ಟ್ರೇಲಿಯಾದ ಟೆನಿಸ್‌ ಆಟಗಾರ ಮಾರ್ಟಿನ್‌ ಸ್ಪಾಟ್‌ಲ್‌ ಅವರ 700 ಅಮೆರಿಕನ್‌ ಡಾಲರ್‌ ಕಳುವಾಗಿದೆ. ರಾಷ್ಟ್ರೀಯ ಅಥ್ಲೆಟಿಕ್ಸ್‌ನಲ್ಲಿ ನಡೆದ ಮಾರಾಮಾರಿಯ ಕಹಿ ಘಟನೆ ನೆನಪಲ್ಲಿರುವಾಗ ನಗರಕ್ಕೆ ಕೆಟ್ಟ ಹೆಸರು ತಂದಿರುವ ಇನ್ನೊಂದು ಸುದ್ದಿ ಇದಾಗಿದೆ.

ಐಟಿಎಫ್‌ ಟೆನಿಸ್‌ ಫ್ಯೂಚರ್ಸ್‌ ಟೂರ್ನಿಯ ಫೈನಲ್ಸ್‌ ಪ್ರವೇಶಿಸಿರುವ 2ನೇ ಶ್ರೇಯಾಂಕದ ಸ್ಪಾಟ್‌ಲ್‌ ನಗರದ ಪ್ರಮುಖ ಹೊಟೇಲೊಂದರಲ್ಲಿ ತಂಗಿದ್ದು, ಅಲ್ಲೇ ಅವರ ಹಣ ಕಳುವಾಗಿದೆ. ದಕ್ಷಿಣ ಆಫ್ರಿಕದ ರಿಕ್‌ ಡಿ ವೋಯೆಸ್ಟ್‌ ವಿರುದ್ಧ ಶುಕ್ರವಾರ ನಡೆದ ಸೆಮಿಫೈನಲ್ಸ್‌ನಲ್ಲಿ ಗೆದ್ದ ನಂತರ ಅವರು ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದರು.

ತಾನು ಇಳಿದುಕೊಂಡಿರುವ ಹೊಟೇಲಿನ ರೂಮಿನಲ್ಲೇ ಹಣವಿತ್ತು. ಶುಕ್ರವಾರ ಮುಂಜಾನೆಯಿಂದ ಅದು ನಾಪತ್ತೆಯಾಗಿದೆ ಎಂದು ಹೊಟೇಲಿನ ಅಧಿಕಾರಿಗಳಿಗೂ ಸ್ಪಾಟ್‌ಲ್‌ ದೂರಿತ್ತಿದ್ದಾರೆ. ಅಧಿಕಾರಿಗಳು ಕಳೆದು ಹೋಗಿರುವ ಹಣ ಹುಡುಕುವ ಪ್ರಯತ್ನ ಮಾಡುವುದಾಗಿ ತಿಳಿಸಿದ್ದಾರೆ. ಆದರೆ ಈ ಬಗ್ಗೆ ತಮಗೆ ಯಾವುದೇ ದೂರು ಬಂದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.

(ಯುಎನ್‌ಐ)