ವೀರಪ್ಪನ್‌ ಜೊತೆಯಿರುವುದು ಯಾರೋ ಗೊತ್ತಿಲ್ಲ - ಚೆನ್ನೈನಲ್ಲಿ ಡಾ. ರಾಜ್‌

ಚೆನ್ನೈ : ವರನಟ ಡಾ. ರಾಜ್‌ಕುಮಾರ್‌ ಶುಕ್ರವಾರ ಬೆಳಿಗ್ಗೆ ಚೆನ್ನೈಗೆ ಆಗಮಿಸಿದ್ದು, ಅವರು ತಮಿಳುನಾಡು ಮುಖ್ಯಮಂತ್ರಿ ಕರುಣಾನಿಧಿಯವರನ್ನು ಭೇಟಿಯಾಗುವ ಸಂಭವವಿದೆ.

ವೀರಪ್ಪನ್‌ ಬಂಧನದಿಂದ ತಮ್ಮನ್ನು ರಕ್ಷಿಸಿದ್ದಕ್ಕಾಗಿ ಕರುಣಾನಿಧಿ ಅವರಿಗೆ ಧನ್ಯವಾದ ಹೇಳುವುದು ರಾಜ್‌ ಭೇಟಿಯ ಉದ್ದೇಶವೆಂದು ವ್ಯಾಖ್ಯಾನಿಸಲಾಗುತ್ತಿದೆ. ರಾಜ್‌ ಬಿಡುಗಡೆಯಾದ ನಂತರ ತಾವು ಶೀಘ್ರದಲ್ಲೇ ಚೆನ್ನೈಗೆ ಬರುವುದಾಗಿ ಕರುಣಾನಿಧಿ ಅವರಿಗೆ ಸಂದೇಶ ಕಳಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.

ಪುತ್ರ ರಾಘವೇಂದ್ರ ರಾಜ್‌ಕುಮಾರ್‌ ಹಾಗೂ ಪ್ರಸಿದ್ಧ ನಾಯಕನಟ ರವಿಚಂದ್ರನ್‌ರೊಂದಿಗೆ ಚೆನ್ನೈನ ವಿಮಾನ ನಿಲ್ದಾಣದಲ್ಲಿ ಬಂದಿಳಿದ ರಾಜ್‌, ತಮ್ಮದು ಖಾಸಗಿ ಭೇಟಿ ಎಂದರು. ಆರೋಗ್ಯ ತಪಾಸಣೆಗಾಗಿ ಇಲ್ಲಿಗೆ ಬಂದಿರುವುದಾಗಿ ಅವರು ಪ್ರಶ್ನೆಯಾಂದಕ್ಕೆ ಉತ್ತರಿಸಿದರು.

ವೀರಪ್ಪನ್‌ ಒಳ್ಳೆಯ ಮನುಷ್ಯ, ತಮ್ಮನ್ನು ತುಂಬಾ ಚೆನ್ನಾಗಿ ನೋಡಿಕೊಂಡ ಎಂದು ವೀರಪ್ಪನ್‌ ಆತಿಥ್ಯದ ಬಗ್ಗೆ ಪ್ರಶ್ನಿಸಿದ ಸುದ್ದಿಗಾರರಿಗೆ ತಿಳಿಸಿದ ರಾಜ್‌, ವೀರಪ್ಪನ್‌ನೊಂದಿಗೆ ತುಂಬಾ ಜನರಿದ್ದಾರೆ. ಆದರೆ, ಅವರು ಭಯೋತ್ಪಾದಕರೋ ಅಲ್ಲವೋ ತಮಗೆ ತಿಳಿಯದು ಎಂದರು. ವೀರಪ್ಪನ್‌ ಬೇಡಿಕೆಗಳ ಬಗ್ಗೆ ನಿರ್ಧರಿಸಬೇಕಾದುದು ಕರ್ನಾಟಕ ಹಾಗೂ ತಮಿಳುನಾಡು ಸರ್ಕಾರಗಳಿಗೆ ಸೇರಿದುದು ಎಂದು ಅವರು ಮತ್ತೊಂದು ಪ್ರಶ್ನೆಗೆ ಉತ್ತರಿಸಿದರು.

(ಯುಎನ್‌ಐ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...