ಮಾರುಕಟ್ಟೆ ಮೇಲಿನ ಖಾಸಗಿ ಪ್ರಾಬಲ್ಯದಿಂದ ಅಡಿಕೆ ಬೆಲೆ ಕುಸಿತ

ಪುತ್ತೂರು : ಅಡಿಕೆ ಮಾರುಕಟ್ಟೆ ಕುಸಿತಕ್ಕೆ ಕೇಂದ್ರದ ಅಮದು ನೀತಿ ಕಾರಣವಲ್ಲ , ಬದಲಿಗೆ ಖಾಸಗಿ ವ್ಯಾಪಾರಿ ವರ್ಗವೇ ಕಾರಣವೆಂದು ಸಂಶೋಧಕ ಹಾಗೂ ಪ್ರಸಿದ್ಧ ಅರ್ಥಶಾಸ್ತ್ರ ಜ್ಞ ಡಾ. ವಿಶ್ವೇಶ್ವರ ವರ್ಮುಡಿ ಹೇಳಿದ್ದಾರೆ.

ಪ್ರತಿಶತ 94 ರಷ್ಟು ಅಡಿಕೆ ಮಾರುಕಟ್ಟೆ ಜಾಲ ಖಾಸಗಿಯವರ ಕೈಯ್ಯಲ್ಲಿದೆ. ಸಹಕಾರಿ ಕ್ಷೇತ್ರದ ಪಾಲು ಶೇ. 6 ಮಾತ್ರ. ಈ ವ್ಯತ್ಯಾಸವೇ ಅಡಿಕೆ ಮಾರುಕಟ್ಟೆಯಲ್ಲಿನ ವ್ಯತ್ಯಯಕ್ಕೆ ಕಾರಣ. ಮಾರುಕಟ್ಟೆ ಏರಿಳಿತಗೊಳಿಸುವ ಸಾಮರ್ಥ್ಯ ಹೊಂದಿರುವ ಖಾಸಗಿ ಜಾಲ, ಸಹಕಾರಿ ವ್ಯವಸ್ಥೆಯನ್ನು ತನ್ನ ಕಪಿಮುಷ್ಠಿಯಲ್ಲಿಟ್ಟುಕೊಳ್ಳುವ ಸಲುವಾಗಿ 1993 ರಿಂದಲೂ ಪ್ರಯತ್ನ ನಡೆಸುತ್ತಿದೆ ಎಂದು ವರ್ಮುಡಿ ಹೇಳಿದರು.

ಉಡುಪಿಯಲ್ಲಿ ರೆಡ್‌ಕ್ರಾಸ್‌ ಜಿಲ್ಲಾ ಶಾಖೆ ಪ್ರಾರಂಭ : ರಾಜ್ಯಪಾಲೆ ವಿ.ಎಸ್‌. ರಮಾದೇವಿ ಭಾರತೀಯ ರೆಡ್‌ಕ್ರಾಸ್‌ ಸಂಸ್ಥೆಯ ಜಿಲ್ಲಾಶಾಖೆಯನ್ನು ಬುಧವಾರ ಉದ್ಘಾಟಿಸಿದರು. ಪ್ರತಿಯಾಂದಕ್ಕೂ ಸರ್ಕಾರವನ್ನೇ ಅವಲಂಬಿಸದೆ ಖಾಸಗಿ ಸಂಘ ಸಂಸ್ಥೆಗಳ ಜೊತೆಗೂಡಿ ದುಡಿಯುವುದರಿಂದ ಮಹತ್ತರವಾದುದನ್ನು ಸಾಧಿಸಬಹುದು ಎಂದು ಅವರು ಹೇಳಿದರು.

ಉದ್ಘಾಟನಾ ಸಮಾರಂಭದ ಅಧ್ಯಕ್ಷತೆಯನ್ನು ಶಾಸಕ ಯು.ಆರ್‌. ಸಭಾಪತಿ ವಹಿಸಿದ್ದರು. ಜಿಲ್ಲಾಧಿಕಾರಿ ಗೌರವ ಗುಪ್ತಾ, ಭಾರತೀಯ ರೆಡ್‌ಕ್ರಾಸ್‌ ಸಂಸ್ಥೆ ರಾಜ್ಯ ಉಪಾಧ್ಯಕ್ಷ ಡಾ. ಡಿ.ಎಂ. ನಂಜುಂಡಪ್ಪ ಹಾಗೂ ಶಾಸಕ ಕೆ. ಜಯಪ್ರಕಾಶ್‌ ಹೆಗಡೆ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

(ಮಂಗಳೂರು ಪ್ರತಿನಿಧಿಯಿಂದ)