ಕಾಲುಚೆಂಡಿನ ಕೈಗೆ ನೊಬೆಲ್‌ ಶಾಂತಿ ಪ್ರಶಸ್ತಿ ! ಶಾಂತಂ ಪಾಪಂ

ಮಾನ್ಯರೆ

ಫುಟ್‌ಬಾಲ್‌ಗೆ ನೊಬೆಲ್‌ ಪ್ರಶಸ್ತಿ ಲಭ್ಯವಾದ ಸುದ್ದಿ ಓದಿ ನಗೆ ಬಂತು. ಅದು ಗಂಡಾಟವೇ ಇರಬಹುದು, ವೀರೋಚಿತ ಕ್ರೀಡೆಯೇ ಇರಬಹುದು, ಪೀಲೆ ಅಂತಹ ಮಹಾನ್‌ ಕಲಾವಿದನನ್ನು ನೀಡಿರಬಹುದು, ಆಟದ ನೆಪದಲ್ಲಿ ಬೆಳೆಯುವ ಮಕ್ಕಳ ಕಾಲಿನ ಸ್ನಾಯುಗಳಿಗೆ ಬಲತುಂಬುವ ಸಮರ್ಥ ವ್ಯಾಯಾಮವೇ ಆಗಿರಬಹುದು, ಆದರೆ , ಆಟದ ನೆಪದಲ್ಲಿ ರೋಷ ವರ್ಧಿಸುವ ಒರಟು ಕ್ರೀಡೆಗೆ ಜಾಗತಿಕ ಮಟ್ಟದ ಅತ್ಯುನ್ನತ , ಅದರಲ್ಲೂ ಶಾಂತಿಗೆ ನೀಡಲಾಗುವ ಪ್ರಶಸ್ತಿ ಸಿಕ್ಕಿದ್ದು ಕೇಳಿ ಉಕ್ಕಿಬಂದ ನಗೆಚಾಟಿ ಬೀಸಿ ಹೊಡೆಯಿತು.

ನಿಮ್ಮ ವರದಿಯಲ್ಲಿ ಉಲ್ಲೇಖಿಸಿರುವ ಹಾಗೆ ಈ ಆಟ ಸಾವುನೋವುಗಳನ್ನು ತಂದಿಕ್ಕುತ್ತದೆ. ಅರ್ಜೆಂಟೈನ ಬ್ರೆಜಿಲ್‌ ಪಂದ್ಯ ನಡೆಯುತ್ತಿದ್ದರೆ ಅಭಿಮಾನಿಗಳು ಆವೇಶದ ಭರದಲ್ಲಿ ಎಂಥ ಅನಾಹುತ ಮಾಡಲೂ ಹೇಸುವುದಿಲ್ಲ. ಇಂಗ್ಲೆಂಡ್‌ನಲ್ಲಿ ಈ ಚಿತ್ರ ಇನ್ನೂ ಭೀಕರ. ಅಲ್ಲಿ ಆಟ ನಡೆಯುವುದು ಸಾಮಾನ್ಯವಾಗಿ ಸ್ಟ್ಯಾಂಡ್‌ಗಳಿಗೆ ಅಭಿಮಾನಿಗಳು ಹಚ್ಚುವ ಬೆಂಕಿಯ ಬೆಳಕಲ್ಲೇ. ಅನೇಕ ಯುವಕರು ತಮ್ಮ ಜೀವ ಕಳೆದುಕೊಳ್ಳುವುದು ಈ ಹುಚ್ಚಾಟದ ಭರದಲ್ಲೇ. ಇಂಗ್ಲೆಂಡ್‌ನಲ್ಲಿ ಇವತ್ತು ಫುಟ್‌ಬಾಲ್‌ ಪಂದ್ಯ ನೋಡಲು ಸಭ್ಯರು ಅಂಜುತ್ತಾರೆ. ಹೂಲಿಗಾನ್‌ಗಳ ಆರ್ಭಟ ಅಲ್ಲಿ ಭಯದ ವಾತವರಣ ಮೂಡಿಸಿದೆ.

ಫುಟ್‌ಬಾಲ್‌ ಬದಲಿಗೆ ಟೆನಿಸ್‌ಗೆ ಕೊಟ್ಟಿದ್ದರೆ ನನಗೆ ಋಷಿ ಆಗುತ್ತಿತ್ತು. ಇಬ್ಬರೇ ಕುಳಿತು, ಶಾಂತಿಯಿಂದ ಏಕಾಗ್ರಚಿತ್ತದಿಂದ ಆಡುವ ಚೆಸ್‌ಗೆ ಕೊಟ್ಟಿದ್ದರೆ ಇನ್ನೂ ಸಂತೋಷವಾಗುತ್ತಿತ್ತು. ಕಾಲುಚೆಂಡಿನ ಕ್ರೀಡೆಗೆ ಮನ್ನಣೆ ನೀಡುವ ಭರದಲ್ಲಿ ಶಾಂತಿ ಪ್ರಶಸ್ತಿ ಯು ಫುಟ್‌ಬಾಲ್‌ ಪಾಲಾದುದನ್ನು ಕೇಳಿ ಮದರ್‌ ತೆರೆಸಾ ಅಂತಹವರ ಗೋರಿಯಲ್ಲಿ ಹೊರಳಾಡಿರಬೇಕು.

ಶ್ರೀನಿವಾಸ ಕಟ್ಟಿ

ಇಂಡೋನೇಷಿಯಾ

ವಾರ್ತಾಸಂಚಿಕೆ
ಮುಖಪುಟ / ಇವತ್ತು... ಈ ಹೊತ್ತು...