ಬರಪೀಡಿತ ಪ್ರದೇಶಗಳಿಗೆ ರೇಲ್ವೆ ಮೂಲಕ ಉಚಿತ ಮೇವು- ನೀರು

ನವದೆಹಲಿ : ಬರಗಾಲ ಪೀಡಿತ ರಾಜ್ಯಗಳಿಗೆ ರೇಲ್ವೆ ಮೂಲಕ ಉಚಿತವಾಗಿ ಮೇವು ಮತ್ತು ಕುಡಿಯುವ ನೀರು ಸರಬರಾಜು ಮಾಡಲು ಪ್ರಕೃತಿ ವಿಕೋಪ ನಿಧಿಯ ಉನ್ನತ ಮಟ್ಟದ ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದ್ದು, ಕಳೆದ ವರ್ಷ ಕಡಿಮೆ ಮಳೆ ಬಿದ್ದಿರುವ ಪ್ರದೇಶಗಳಿಗೆ ಇದು ಅನ್ವಯಿಸುತ್ತದೆ.

ಕೃಷಿ ಮಂತ್ರಿ ನಿತೀಶ್‌ ಕುಮಾರ್‌, ವಿತ್ತ ಮಂತ್ರಿ ಯಶವಂತ ಸಿನ್ಹ ಮತ್ತು ಯೋಜನಾ ಆಯೋಗದ ಉಪಾಧ್ಯಕ್ಷ ಕೆ.ಸಿ. ಪಂತ್‌ ಉನ್ನತ ಸಭೆಯ ಚರ್ಚೆಯಲ್ಲಿ ಪಾಲ್ಗೊಂಡು ಈ ನಿರ್ಧಾರಕ್ಕೆ ಬಂದಿದ್ದಾರೆ.

495 ಸಾವಿರ ಟನ್‌ ಧವಸ ಧಾನ್ಯ ಮತ್ತು 170 ಸಾವಿರ ಟನ್‌ ಮೇವನ್ನು ಉಚಿತವಾಗಿ ಬರಗಾಲ ಪೀಡಿತ ಪ್ರದೇಶಗಳಿಗೆ ಪೂರೈಸುವ ಪ್ರಧಾನಿ ವಾಜಪೇಯಿ ಅವರ ನಿರ್ದೇಶನಕ್ಕೆ ಪೂರಕವಾಗಿ ಉಚಿತ ಸಾಗಾಣಿಕೆ ವ್ಯವಸ್ಥೆ ಒದಗಿಸಲು ನಿರ್ಧರಿಸಲಾಗಿದೆ. ಅತೀ ಕಡಿಮೆ ಮಳೆ ಬಿದ್ದಿರುವುದರಿಂದ 2001ನೇ ಬೇಸಿಗೆಯಲ್ಲಿ ಗುಜರಾತ್‌, ಮಧ್ಯಪ್ರದೇಶ, ರಾಜಸ್ಥಾನ್‌ ಮತ್ತು ಆಂಧ್ರಪ್ರದೇಶ ಬರಗಾಲ ಎದುರಿಸುವ ನಿರೀಕ್ಷೆ ಇದೆ. ಈ ಪಟ್ಟಿಯಲ್ಲಿ ಏಪ್ರಿಲ್‌ ಹೊತ್ತಿಗೆ ಇನ್ನೂ ಒಂದಷ್ಟು ಪ್ರದೇಶಗಳ ಸೇರ್ಪಡೆಯಾಗಲೂ ಬಹುದು.

ರಾಷ್ಟ್ರೀಯ ಪ್ರಕೃತಿ ವಿಕೋಪ ನಿಧಿಯಿಂದ 434.21 ಕೋಟಿ ರೂಪಾಯಿ ಬಿಡುಗಡೆ ಮಾಡುವ ಮೂಲಕ ಬರುವ ಮಾರ್ಚ್‌ವರೆಗೆ ಬರಗಾಲ ಪೀಡಿತ ರಾಜ್ಯಕ್ಕೆ ಸಹಾಯ ಮಾಡುವ ನಿರ್ಧಾರವನ್ನೂ ಸಭೆಯಲ್ಲಿ ಕೈಗೊಳ್ಳಲಾಗಿದ್ದು, ನೆರೆ ಪೀಡಿತ ಪಶ್ಚಿಮ ಬಂಗಾಳ 103 ಕೋಟಿ ರೂಪಾಯಿ ಪಡೆಯಲಿದೆ.

(ಇನ್ಫೋ ವಾರ್ತೆ)