ರಾಜ್ಯದ ಸಮಗ್ರ ಅಭಿವೃದ್ಧಿಗೆ ಇಸ್ರೋದೊಂದಿಗೆ ಒಡಂಬಡಿಕೆ

ಬೆಂಗಳೂರು : ಬಾಹ್ಯಾಕಾಶ ಮಾಹಿತಿ ನೆರವಿನ ಮೂಲಕ ಸಂಪರ್ಕ, ಮಾಹಿತಿ ತಂತ್ರಜ್ಞಾನ ಹಾಗೂ ಅಂತರ್ಜಲವೂ ಸೇರಿದಂತೆ ರಾಜ್ಯದ ಸಮಗ್ರ ಅಭಿವೃದ್ಧಿಗಾಗಿ ಕರ್ನಾಟಕ ರಾಜ್ಯ ಸರಕಾರ ಭಾರತೀಯ ಬಾಹ್ಯಾಕಾಶ ಅಧ್ಯಯನ ಸಂಸ್ಥೆ (ಇಸ್ರೋ) ಯಾಂದಿಗೆ ಒಡಂಬಡಿಕೆ ಮಾಡಿಕೊಂಡಿದೆ.

ಈ ಸಂಬಂಧ ಸೋಮವಾರ ಕರ್ನಾಟಕ ರಾಜ್ಯ ಸರಕಾರದ ಪರವಾಗಿ ವಿವೇಕ್‌ ಕುಲಕರ್ಣಿ ಅವರು ಒಡಂಬಡಿಕೆ ಪತ್ರಕ್ಕೆ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಅವರ ಸಮ್ಮುಖದಲ್ಲಿ ಸಹಿ ಹಾಕಿದರು. ಇಸ್ರೋದೊಂದಿಗೆ ಇಂತಹ ಒಪ್ಪಂದ ಮಾಡಿಕೊಳ್ಳುತ್ತಿರುವ ಪ್ರಥಮ ರಾಜ್ಯ ಕರ್ನಾಟಕವಾಗಿದೆ ಎಂದು ಇಸ್ರೋ ಅಧ್ಯಕ್ಷ ಕೆ. ಕಸ್ತೂರಿ ರಂಗನ್‌ ತಿಳಿಸಿದರು.

ಉಪಗ್ರಹದಿಂದ ಪಡೆಯಲಾಗುವ ಮಾಹಿತಿ ಹಾಗೂ ದೂರ ಸಂವೇದಿ ನಕ್ಷೆಯ ನೆರವಿನಿಂದ ಮಾನವ ಸಂಪನ್ಮೂಲ ಅಭಿವೃದ್ಧಿ, ಅಂತರ್ಜಲ ಸಮೀಕ್ಷೆ, ಟೆಲಿ ಮೆಡಿಸಿನ್‌, ಮಾಹಿತಿ ತಂತ್ರಜ್ಞಾನ ಕಾರಿಡಾರ್‌ ಸ್ಥಾಪನೆ ಕಾಮಗಾರಿ ತ್ವರಿತಗತಿಯಲ್ಲಿ ಸಾಗಲಿದೆ. ಸ್ವಾಭಾವಿಕ ಸಂಪನ್ಮೂಲಗಳ ಪತ್ತೆಗೂ ಈ ಒಡಂಬಡಿಕೆ ನೆರವಾಗಲಿದೆ.

ಇದೇ ಮಾದರಿಯ ಒಡಂಬಡಿಕೆಗಳನ್ನು ಬೇರೆ ರಾಜ್ಯಗಳೊಂದಿಗೆ ಕೂಡ ಮಾಡಿಕೊಳ್ಳಲು ಇಸ್ರೋ ನಿರ್ಧರಿಸಿದೆ. ಸುಮಾರು 35 ಕೋಟಿ ರುಪಾಯಿಗಳ ಹೂಡಿಕೆಯ ಮೂಲಕ ಕರ್ನಾಟಕ ಸ್ಪೇಸ್‌ ಅಪ್ಲಿಕೇಷನ್‌ ಸೆಂಟರ್‌ ರೂಪತಾಳಲಿದ್ದು, ಇದು ರಾಜ್ಯದ ಆರ್ಥಿಕಾಭಿವೃದ್ಧಿಯಲ್ಲೂ ಮಹತ್ವದ ಪಾತ್ರ ವಹಿಸಲಿದೆ.

ಇನ್ಸಾಟ್‌ ವ್ಯವಸ್ಥೆಯ ಲಾಭವೂ ಈ ಯೋಜನೆಗೆ ದೊರಕಲಿದ್ದು, ಗ್ರಾಮೀಣ ಆರೋಗ್ಯ ತರಬೇತಿ ಕಾರ್ಯಕ್ರಮ, ವಿದ್ಯುನ್ಮಾನ ಆಡಳಿತ, ಶಾಲೆಗಳ ಅಂತರ್ಜಾಲ ವ್ಯವಸ್ಥೆ, ಮುಕ್ತ ವಿಶ್ವವಿದ್ಯಾಲಯಗಳ ಸೇವಾ ನಿರ್ವಹಣೆಗೆ ಬಲ ಬರಲಿದೆ. ಇದಕ್ಕಾಗಿ ಇಸ್ರೋ ಟ್ರಾನ್ಸ್‌ಪಾಂಡರ್‌ಗಳನ್ನು ಒದಗಿಸಿದೆ.

ಈ ಒಡಂಬಡಿಕೆಯ ರೀತ್ಯ ಇಸ್ರೋ ಹಾಗೂ ರಾಜ್ಯ ಸರಕಾರ ನಿರ್ದಿಷ್ಟ ಕಾರ್ಯಕ್ರಮಗಳನ್ನು ಅನುಷ್ಠಾನಗೊಳಿಸಲಿದೆ. 16 ಕೋಟಿ ರುಪಾಯಿ ವೆಚ್ಚದಲ್ಲಿ ಸ್ವಾಭಾವಿಕ ಸಂಪನ್ಮೂಲ ವ್ಯವಸ್ಥೆಯ ಅಭಿವೃದ್ಧಿಯೂ ನಡೆಯಲಿದೆ. ಇಸ್ರೋ ಇಗಾಗಲೇ ಅಂತರ್ಜಲ ಶೋಧನೆಯ ಪ್ರತಿಶತ 30ರಷ್ಟು ಕಾರ್ಯವನ್ನು ಪೂರ್ಣಗೊಳಿಸಿದೆ. ಉಳಿದ ಕಾರ್ಯ ಈ ವರ್ಷದ ಅಂತ್ಯದ ವೇಳೆಗೆ ಪೂರ್ಣಗೊಳ್ಳಲಿದೆ.

ಇಸ್ರೋದಿಂದ ಲಭ್ಯವಾಗುವ ಅತ್ಯುನ್ನತ ತಂತ್ರಜ್ಞಾನ ರಾಜ್ಯದ ಪ್ರಗತಿಯ ಪಥದಲ್ಲಿ ಒಂದು ಮೈಲಿಗಲ್ಲಾಗಲಿದೆ ಎಂಬುದನ್ನು ಅರಿತ ಸರಕಾರ ಈ ಒಡಂಬಡಿಕೆಗೆ ಹಾದಿ ಸುಗಮಗೊಳಿಸಿತು ಎಂದು ಮುಖ್ಯಮಂತ್ರಿ ಕೃಷ್ಣ ಈ ಸಂದರ್ಭದಲ್ಲಿ ತಿಳಿಸಿದ್ದಾರೆ. ಈ ಯೋಜನೆಯ ಲಾಭದಿಂದ ರಾಜ್ಯದ ಜನತೆಗೆ ದಿನಂಪ್ರತಿ 55 ಲೀಟರ್‌ ಕುಡಿಯುವ ನೀರೊದಗಿಸುವ ಯೋಜನೆ ಕಾರ್ಯಗತವಾಗಲಿದೆ ಎಂಬ ಆಶಾಭಾವನೆಯನ್ನೂ ಅವರು ವ್ಯಕ್ತಪಡಿಸಿದ್ದಾರೆ.

(ಇನ್ಫೋ ವಾರ್ತೆ)