ಹಾಡುಹಬ್ಬಕ್ಕೆ ಹೋಗಿದ್ದಿರಾ? ಇಲ್ಲವಾದಲ್ಲಿ ಮುಂದಿನ ದಿನಾಂಕ ಬರೆದಿಟ್ಟುಕೊಳ್ಳಿ

ಬೆಂಗಳೂರು : ವಿಹಾರಕ್ಕೆ ಕಬ್ಬನ್‌ ಪಾರ್ಕಿಗೆ ಹೋಗ್ತೀರಿ ಅಂತಾದ್ರೆ ನೀವು ತಿಂಗಳ ಮೂರನೇ ಭಾನುವಾರವನ್ನು ಆಯ್ಕೆ ಮಾಡಿಕೊಳ್ಳಿ. ಸೆಕೆಂಡ್‌ ಸಾಟರ್‌ಡೇ ಸ್ಕಿಪ್‌ ಮಾಡಿದರೂ ಸರಿ. ಮೂರನೇ ಭಾನುವಾರ ಕಬ್ಬನ್‌ ಪಾರ್ಕಿನಲ್ಲಿ ವಾದ್ಯ ಮೇಳವಿರುತ್ತದೆ.

ಭಾರತೀಯ ವಾಯುಸೇನೆ ಇನ್ನು ಮುಂದೆ ಪ್ರತಿ ತಿಂಗಳ ಮೂರನೇ ಭಾನುವಾರ ಕಬ್ಬನ್‌ ಪಾರ್ಕಿನಲ್ಲಿ ವಾದ್ಯಗೋಷ್ಠಿ ನಡೆಸಲಿದೆ. ಬೆಂಗಳೂರಿನ ಹಿರಿಯರಿಗೆ ಇದೇನೂ ಹೊಸತಲ್ಲ. ಹಿಂದೆ ಅಂದರೆ ನಮ್ಮ ರಕ್ಷಣಾ ಸಚಿವ ಜಾರ್ಜ್‌ ಫರ್ನಾಂಡಿಸ್‌ ಅವರು ಹೆಗಲಿಗೆ ಪಾಟಿ ಚೀಲ ತಗಲು ಹಾಕಿಕೊಂಡು ಶಾಲೆಗೆ ಹೋಗುತ್ತಿದ್ದಾಗ ಈ ತರಹ ದೇಶಭಕ್ತಿ ಗೀತೆಯ ವಾದ್ಯಗೋಷ್ಠಿ ಇರುತ್ತಿತ್ತಂತೆ. ಅದನ್ನು ನೆನಪಿಸಿಕೊಂಡೇ ಮತ್ತೆ ವಾದ್ಯಗೋಷ್ಠಿಯನ್ನು ಆರಂಭಿಸಬೇಕು ಅಂತ ಸಚಿವರೇ ಖುದ್ದು ಆದೇಶಿಸಿದ್ದಾರೆ. ದೊಡ್ಡವರ ಆಸೆಗಳು ಈಡೇರದಿದ್ದೇತೆ? ಇದೀಗ ವಾದ್ಯಗೋಷ್ಠಿ ಶುರುವಾಗಿದೆ. ಲಾಭ ಎಲ್ಲರದೂ.

ಬ್ಯಾಂಡ್‌ ಸೆಟ್‌ನಲ್ಲಿರುವುದು ಒಟ್ಟು 30 ಮಂದಿ ಕಲಾವಿದರು. ಬ್ಯಾಂಡ್‌ ಮಾಸ್ಟರ್‌ ಜಿ.ಕೆ. ನಾಯರ್‌ ವಾದ್ಯ ಗೋಷ್ಠಿಯ ಉಸ್ತುವಾರಿ ನೋಡಿಕೊಳ್ಳುತ್ತಾರೆ. ಅಂದ ಹಾಗೆ ಇರುವ 8 ಹಿತ್ತಾಳೆಯ ಹಳೇ ಬ್ಯಾಂಡ್‌ಗಳಲ್ಲಿ ಒಂದು ಬ್ಯಾಂಡ್‌ಗೆ ಇಷ್ಟುದ್ದ ಇತಿಹಾಸವೇ ಇದೆ. 1944ರಲ್ಲಿ ರೋಹತ್‌ನ ವಾಯು ಸೇನಾ ನಿಲ್ದಾಣದಲ್ಲಿ ಇದು ಶುರುವಾಯಿತು. ಅಲ್ಲಿಂದ ಅಂಬಾಲಾಕ್ಕೆ ಹೋಗಿ ನಂತರ ಬೆಂಗಳೂರು ಸೇರಿಕೊಂಡಿದೆ. ಜಿ.ಕೆ. ನಾಯರ್‌ ಕೂಡ ಅಷ್ಟೇ, 31 ವರ್ಷಗಳ ತುಂಬು ಅನುಭವ ಇರುವ ಹಿರಿಯರು. ವಿಶಿಷ್ಟ ಸೇವಾ ಪ್ರಶಸ್ತಿ ವಿಜೇತರು.

ಒಟ್ಟಿನಲ್ಲಿ ತಿಂಗಳಿಗೊಮ್ಮೆ ಕಬ್ಬನ್‌ ಪಾರ್ಕಿನಲ್ಲಿ ದೇಶಭಕ್ತಿಯ ಪ್ರಾಸ ಬದ್ಧ ಸಾಲುಗಳು. ರೋಮ ನಿಮಿರಿಸುವ ಸಾಲು ಸಾಲು ಹಾಡುಗಳು. ಝಲ್ಲೆನ್ನುತ್ತಲೇ ಎದೆ ತಾಳ ಹಾಕುವಂತೆ ಮಾಡುವ ಬ್ಯಾಂಡ್‌ ಸೆಟ್‌ಗಳು. ನಿಮ್ಮ ಡೈರಿಯಲ್ಲಿ ಬರೆದಿಟ್ಟುಕೊಳ್ಳಿ ಮೂರನೇ ಭಾನುವಾರ, ಸ್ಥಳ ಕಬ್ಬನ್‌ ಪಾರ್ಕ್‌ !

(ಇನ್ಫೋ ವಾರ್ತೆ)