ಶಾಲೆಗೊಂದು ಗ್ರಂಥಾಲಯ : ಇನ್ಫೋಸಿಸ್‌ನಿಂದ 2 ಕೋಟಿ ದೇಣಿಗೆ

ಪುತ್ತೂರು : ಶಾಲೆಗೊಂದು ಗ್ರಂಥಾಲಯ ಯೋಜನೆಯಡಿ ರಾಜ್ಯದ 3600 ಪ್ರಾಥಮಿಕ ಶಾಲೆಗಳ ಗ್ರಂಥಾಲಯಗಳಿಗೆ ಪುಸ್ತಕಗಳನ್ನು ಒದಗಿಸಲು ಇನ್ಫೋಸಿಸ್‌ ಪ್ರತಿಷ್ಠಾನವು 2 ಕೋಟಿ ರುಪಾಯಿಗಳನ್ನು ದೇಣಿಗೆಯಾಗಿ ನೀಡಿದೆ ಎಂದು ಪ್ರತಿಷ್ಠಾನದ ವ್ಯವಸ್ಥಾಪಕ ಕೃಷ್ಣಮೂರ್ತಿ ತಿಳಿಸಿದ್ದಾರೆ.

ತಾಲ್ಲೂಕಿನ 50 ಪ್ರಾಥಮಿಕ ಶಾಲೆಗಳಿಗೆ ತಲಾ 3600 ರುಪಾಯಿ ಪುಸ್ತಕಗಳನ್ನು ವಿತರಿಸುವ ಕಾರ್ಯಕ್ರಮದಲ್ಲಿ ಅವರು ಮಾತನಾಡುತ್ತಿದ್ದರು. ಪುತ್ತೂರಿನ ದೀನದಯಾಳ್‌ ಪ್ರತಿಷ್ಠಾನದ ಸಹಕಾರದೊಂದಿಗೆ ಈ ಪುಸ್ತಕ ವಿತರಣೆ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು .

ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಶಾಸಕ ಸದಾನಂದ ಗೌಡ ಅವರು, ಗ್ರಾಮೀಣ ಶಾಲೆಗಳ ಗ್ರಂಥಾಲಯಗಳಿಗೆ ಜೀವಂತಿಕೆ ನೀಡುವ ಈ ಯೋಜನೆ ಹಳ್ಳಿ ಮಕ್ಕಳಿಗೆ ವರಪ್ರಾಯವಾಗಿದೆ ಎಂದರು. ತಾಲ್ಲೂಕಿನ ಶಾಲೆಗಳನ್ನು ದತ್ತು ಪಡೆಯುವಂತೆ ಅವರು ಇನ್ಫೋಸಿಸ್‌ ಪ್ರತಿಷ್ಠಾನವನ್ನು ಕೋರಿದರು.

(ಇನ್ಫೋ ವಾರ್ತೆ)