ವಿಪ್ರೋ : 9 ತಿಂಗಳಲ್ಲಿ 4.5 ಬಿಲಿಯನ್‌ ರುಪಾಯಿ ಲಾಭ

ಬೆಂಗಳೂರು : ಹೆಸರುವಾಸಿ ಐಟಿ ಕಂಪನಿ ವಿಪ್ರೋದ 9 ತಿಂಗಳ ನಿವ್ವಳ ಲಾಭ (ವರಮಾನ ತೆರಿಗೆ ಕಟ್ಟಿದ ನಂತರ ಡಿಸೆಂಬರ್‌ 2000ಕ್ಕೆ ಸರಿಯಾಗಿ) 4.5 ಬಿಲಿಯನ್‌ ರುಪಾಯಿ. ಲಾಭದ ಒಟ್ಟಾರೆ ಹೆಚ್ಚಳ ಪ್ರತಿಶತ 121.

ಕಳೆದ ವಿತ್ತ ವರ್ಷದ 9 ತಿಂಗಳ ವಹಿವಾಟಿಗಿಂತ ಪ್ರಸ್ತುತ ಹಣಕಾಸು ವರ್ಷದ ವಹಿವಾಟಿನಲ್ಲಿ ಶೇ.39ರಷ್ಟು ಹೆಚ್ಚಳವಾಗಿದ್ದು, ಕಂಪನಿಯ 21.5 ಬಿಲಿಯನ್‌ ರುಪಾಯಿ ಮಾಲು ಬಿಕರಿಯಾಗಿದೆ. ಶುಕ್ರವಾರ ಮಾಧ್ಯಮಗಳಿಗೆ ಬಿಡುಗಡೆ ಮಾಡಲಾದ ಕಂಪನಿಯ ಅಧಿಕಾರಿಗಳ ಮಂಡಳಿ ಅನುಮೋದಿಸಿದ ಲೆಕ್ಕ ಪರಿಶೋಧನೆ ವರದಿಯಲ್ಲಿ ಈ ವಿಷಯ ಸ್ಪಷ್ಟವಾಗಿದೆ.

ವಿಪ್ರೋ ಟೆಕ್ನಾಲಜೀಸ್‌ ಆದಾಯದಲ್ಲಿ ಶೇ. 82ರಷ್ಟು ಹೆಚ್ಚಳವಾಗಿದ್ದು, 12.5 ಬಿಲಿಯನ್‌ ರುಪಾಯಿ ವಹಿವಾಟು ನಡೆಸಿದೆ. ಲಾಭದಲ್ಲಿ ತಾಂತ್ರಿಕ ಸೇವೆಗಳು, ಸಂಶೋಧನೆ ಹಾಗೂ ಅಭಿವೃದ್ಧಿ (ಆರ್‌ ಅಂಡ್‌ ಡಿ) ಸೇವೆಗಳನ್ನು ಒದಗಿಸುವ ಕಂಪನಿಯ ಕೇಂದ್ರಗಳ ಪಾಲೇ ಅರ್ಧದಷ್ಟಿದೆ. ಉದ್ಯಮ ಪರಿಹಾರಿ ಸೇವಾ ಘಟಕಗಳು ಶೇ.45ರಷ್ಟು ಲಾಭ ತಂದಿತ್ತಿವೆ. ಕಂಪನಿಯ ಜಾಗತಿಕ ಆಲಂಬನ ಸೇವೆಗಳು ವಿತ್ತ ವರ್ಷದ ಮೂರನೇ ತ್ರೆೃಮಾಸಿಕದಲ್ಲಿ ಶೇ.5ರಷ್ಟು ಲಾಭ ತಂದಿತ್ತಿವೆ ಎಂದು ಪ್ರಕಟಣೆಯಲ್ಲಿ ಉಲ್ಲೇಖಿತವಾಗಿದೆ.

(ಯುಎನ್‌ಐ)