ಮಾರಕ ಒಪ್ಪಂದಗಳ ಪುನರ್‌ ಪರಿಶೀಲನೆಗೆ ಧಾರವಾಡ ರೈತರ ಒತ್ತಾಯ

ಧಾರವಾಡ : ಕೃಷ್ಯುತ್ಪನ್ನಗಳ ಬೆಲೆ ಕುಸಿತಕ್ಕೆ ಕಾರಣವಾಗಿರುವ ಗ್ಯಾಟ್‌, ವಿಶ್ವ ವಾಣಿಜ್ಯ ಒಪ್ಪಂದ ಹಾಗೂ ಆಮದು ಮತ್ತು ರಫ್ತು ನೀತಿಯನ್ನು ಕೇಂದ್ರ ಸರ್ಕಾರ ಪುನರ್‌ ಪರಿಶೀಲಿಸಬೇಕು ಎಂದು ಜಿಲ್ಲೆಯ ರೈತರು ಆಗ್ರಹ ಪಡಿಸಿದ್ದಾರೆ.

360 ರುಪಾಯಿ ಬೆಂಬಲ ಬೆಲೆಯಲ್ಲಿ ಆಲೂಗೆಡ್ಡೆ ಖರೀದಿಗೆ ಆದೇಶ ಹೊರಡಿಸಿರುವ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ , ನೀರಾವರಿ ಸಚಿವ ಎಚ್‌.ಕೆ. ಪಾಟೀಲ್‌, ಜಿಲ್ಲಾ ಉಸ್ತುವಾರಿ ಸಚಿವ ಎ.ಎಂ. ಹಿಂಡಸಗೇರಿ ಹಾಗೂ ಜಿಲ್ಲಾಧಿಕಾರಿ ವಂದನಾ ಗುರ್ನಾನಿ ಅವರಿಗೆ ಕೃತಜ್ಞತೆ ಸಲ್ಲಿಸಲು ಗುರುವಾರ ಕರೆದಿದ್ದ ಸುದ್ದಿಗೋಷ್ಠಿಯಲ್ಲಿ ಈ ಆಗ್ರಹವನ್ನು ವ್ಯಕ್ತಪಡಿಸಲಾಯಿತು.

ಧಾರವಾಡ, ನವಲೂರು, ಕಮಲಾಪುರ, ರಾಯಪುರ, ಅಮರಗೋಳ ಮುಂತಾದ ಊರುಗಳಿಂದ ಪಕ್ಷಾತೀತವಾಗಿ ಕೃತಜ್ಞತಾ ಸುದ್ದಿಗೋಷ್ಠಿಗೆ ಆಗಮಿಸಿದ್ದ ರೈತ ಮುಖಂಡರು, ಯಾವುದೇ ಒಪ್ಪಂದ ರೈತನಿಗೆ ಮುಳುವಾಗಬಾರದು. ಇಂಥ ಮಾರಕ ಒಪ್ಪಂದಗಳಿಗೆ ಬರುವ ಯಾವುದೇ ಪಕ್ಷವಾದರೂ ಅದಕ್ಕೆ ತಮ್ಮ ವಿರೋಧವಿದೆ ಎಂದರು. ವಿಶ್ವ ವಾಣಿಜ್ಯ ಒಪ್ಪಂದದ ಪರವಿರುವ ಕೇಂದ್ರ ಸರ್ಕಾರದ ವಿರುದ್ಧ ಚಳವಳಿ ನಡೆಸುವ ಅಭಿಪ್ರಾಯ ಕೇಳಿಬಂದವು.

ಬೆಲೆ ಕುಸಿತದಿಂದ ಕಂಗಾಲಾದ ರೈತರ ನೆರವಿಗೆ ಸರ್ಕಾರ ಮುಂದಾಗಿರುವುದು ಶ್ಲಾಘನೀಯ. ಯೋಜನೆ ಜಾರಿಯಲ್ಲಿ ತುಸು ಏರು ಪೇರಾಗಿದ್ದರೂ ಒಟ್ಟಾರೆ ರೈತರ ಸಮಸ್ಯೆಗಳಿಗೆ ರಾಜ್ಯ ಸರ್ಕಾರ ಸೂಕ್ತವಾಗಿ ಸ್ಪಂದಿಸಿದೆ ಎಂದು ರೈತರು ಮುಖ್ಯಮಂತ್ರಿಗಳಿಗೆ, ಜಿಲ್ಲಾಧಿಕಾರಿಗಳಿಗೆ ಧನ್ಯವಾದ ಅರ್ಪಿಸಿದರು.

ಆಮದು- ರಫ್ತು ನೀತಿ ಕುರಿತು ಕಾರ್ಯಾಗಾರ : ಡೆಂಕಲ್‌ ಒಪ್ಪಂದ, ಗ್ಯಾಟ್‌ ಹಾಗೂ ಕೇಂದ್ರ ಸರ್ಕಾರದ ಆಮದು- ರಫ್ತು ನೀತಿಯ ಕುರಿತಂತೆ ಸದ್ಯದಲ್ಲೇ ಪಕ್ಷಾತೀತ ಕಾರ್ಯಾಗಾರವೊಂದನ್ನು ಏರ್ಪಡಿಸುವುದಾಗಿ ಸುದ್ದಿಗೋಷ್ಠಿಯಲ್ಲಿ ಹಾಜರಿದ್ದ ಅವಳಿ ನಗರಗಳ ಮಹಾನಗರ ಪಾಲಿಕೆಯ ಮಾಜಿ ಉಪ ಮಹಾಪೌರ ದೀಪಕ್‌ ಚಿಂಚೋರೆ ಪ್ರಕಟಿಸಿದರು. ಕಾರ್ಯಾಗಾರದಲ್ಲಿ ಬಹುತೇಕ ರೈತರೇ ಭಾಗವಹಿಸುವಂತೆ ಪ್ರಯತ್ನ ನಡೆಸುವುದಾಗಿ ಹಾಗೂ ಕಾರ್ಯಾಗಾರದ ಕುರಿತು ಮಾತೃಭೂಮಿ ಸಂಘಟನೆಯ ಮುಖಂಡ ಬಸವರಾಜ ಬೊಮ್ಮಾಯಿ ಅವರೊಂದಿಗೆ ಚರ್ಚಿಸುವುದಾಗಿ ಅವರು ಹೇಳಿದರು.

(ಇನ್ಫೋ ವಾರ್ತೆ)