ಬಹುಮಹಡಿ ಕಟ್ಟಡದ ನೆಲಮಾಳಿಗೆ ಪಾರ್ಕಿಂಗ್‌ಗೆ ಮೀಸಲು -ಕೋರ್ಟ್‌

ಬೆಂಗಳೂರು : ನಗರದ ಜನನಿಬಿಡ ಪ್ರದೇಶದಲ್ಲಿರುವ ಬಹುಮಹಡಿ ಕಟ್ಟಗಳ ಬೇಸ್‌ಮೆಂಟ್‌ ಫ್ಲೋರ್‌ನಲ್ಲಿರುವ ಅಂಗಡಿ ಮುಂಗಟ್ಟುಗಳನ್ನು ನೆಲಸಮ ಮಾಡುವಂತೆ ರಾಜ್ಯ ಹೈಕೋರ್ಟ್‌ ಬೆಂಗಳೂರು ಮಹಾನಗರ ಪಾಲಿಕೆಗೆ ಗುರುವಾರ ಆದೇಶಿಸಿದೆ.

ಅಲ್ಲದೆ ಕಟ್ಟಡ ನಿರ್ಮಾಣ ಕಾಯ್ದೆ ಉಲ್ಲಂಘಿಸಿದ ಮಾಲಿಕರ ವಿರುದ್ಧ ಕ್ರಮ ಕೈಗೊಳ್ಳುವಲ್ಲಿ ವಿಫಲರಾದ ಪಾಲಿಕೆಯ ಅಧಿಕಾರಿಗಳ ಮೇಲೆ ಕೋರ್ಟ್‌ ಕಿಡಿ ಕಾರಿದ್ದು, 500 ರೂಪಾಯಿ ನ್ಯಾಯಾಲಯ ವೆಚ್ಚ ಭರಿಸುವಂತೆ ಸೂಚಿಸಿದೆ. ಫೆಬ್ರವರಿ 26ರೊಳಗೆ ನೆಲಮಾಳಿಗೆಯಲ್ಲಿರುವ ಅಂಗಡಿಗಳ ಧ್ವಂಸ ಕಾರ್ಯ ಪೂರ್ಣಗೊಳಿಸಿ ವರದಿ ಸಲ್ಲಿಸುವಂತೆ ನ್ಯಾಯಮೂರ್ತಿ ಅಶೋಕ್‌ ಭಾನ್‌ ಮತ್ತು ನ್ಯಾಯಮೂರ್ತಿ ಎನ್‌. ಕುಮಾರ್‌ ಅವರ ವಿಭಾಗೀಯ ಪೀಠ ಮಧ್ಯಂತರ ಆದೇಶ ಹೊರಡಿಸಿದೆ.

ನಗರದ ಹರಿಪ್ರಸಾದ್‌ ಮತ್ತು ಎಂ.ಕೆ. ಮಧುಸೂದನ್‌ ಅವರ ರಿಟ್‌ ಅರ್ಜಿಯ ವಿಚಾರಣೆ ನಡೆಸಿ, ಈ ಆದೇಶ ಹೊರಡಿಸಲಾಗಿದ್ದು, ಆ ಪ್ರಕಾರ ಮೆಜೆಸ್ಟಿಕ್‌, ಗಾಂಧಿನಗರ, ಮಲ್ಲೇಶ್ವರಂ, ರೆಸಿಡೆನ್ಸಿ ಮತ್ತು ಎಂ.ಜಿ.ರೋಡ್‌, ತಾಜ್‌ , ಕಾಪರ್‌ ಅವೆನ್ಯೂ ಪ್ಲಾಜಾ , ಕಾಮತ್‌, ಮಣಿಪಾಲ್‌, ಮಲ್ಯ ಮತ್ತು ಬೆಂಗಳೂರು ಆಸ್ಪತ್ರೆ ಕಟ್ಟಡಗಳ ಬೆಸ್‌ಮೆಂಟ್‌ನಲ್ಲಿರುವ ಅಂಗಡಿಗಳು ನೆಲಸಮವಾಗಲಿವೆ.

ಮೋಟಾರ್‌ ವಾಹನಗಳ ಸಂಖ್ಯೆವಿಪರೀತ ಹೆಚ್ಚಿದೆ. ಕಾಯ್ದೆಯ ಅನ್ವಯ ಅವುಗಳ ನಿಲುಗಡೆಗೆ ಕಟ್ಟಡಗಳ ಬೇಸ್‌ಮೆಂಟ್‌ನಲ್ಲಿ ಜಾಗ ಒದಗಿಸಬೇಕು. ಈ ಕುರಿತು ಕಳೆದ ಅಕ್ಟೋಬರ್‌ನಲ್ಲಿಯೇ ಕೋರ್ಟ್‌, ಪಾಲಿಕೆಗೆ ಸೂಚಿಸಿದ್ದರೂ ಪ್ರತಿವಾದಿಗಳು ಸಮರ್ಪಕ ಉತ್ತರ ಸಲ್ಲಿಸಿರಲಿಲ್ಲ.

(ಇನ್ಫೋ ವಾರ್ತೆ)