ಇನ್ಫೋಸಿಸ್‌ನಿಂದ ವಿಶ್ವದ ಬೃಹತ್‌ ಸಾಫ್ಟ್‌ವೇರ್‌ ಸಂಕೀರ್ಣಕ್ಕೆ ಸರ್ಕಾರದ ಸಮ್ಮತಿ

ಬೆಂಗಳೂರು : ವಿಶ್ವದ ಬೃಹತ್‌ ಸಾಫ್ಟ್‌ವೇರ್‌ ಅಭಿವೃದ್ಧಿ ಸಂಕೀರ್ಣ ಸ್ಥಾಪಿಸಲು ಇನ್ಫೋಸಿಸ್‌ ಟೆಕ್ನಾಲಜೀಸ್‌ ಲಿಮಿಟೆಡ್‌ಗೆ ರಾಜ್ಯ ಸರ್ಕಾರ ಅನುಮತಿ ನೀಡಿದ್ದು , ಸಂಕೀರ್ಣ ಸ್ಥಾಪನೆಗೆ ಅಗತ್ಯವಾದ 100 ಎಕರೆ ಭೂಮಿಯನ್ನು ಸರ್ಕಾರ ಒದಗಿಸುವುದೆಂದು ಭಾರೀ ಕೈಗಾರಿಕೆ ಸಚಿವ ಆರ್‌.ವಿ. ದೇಶಪಾಂಡೆ ತಿಳಿಸಿದ್ದಾರೆ.

ಬೆಂಗಳೂರು- ಹೊಸೂರು ರಸ್ತೆಯ ಸರ್ಜಾಪುರ ಬಳಿ ಸ್ಥಾಪನೆಯಾಗುವ ಈ ಅಭಿವೃದ್ಧಿ ಸಂಕೀರ್ಣದಿಂದ 7120 ಮಂದಿಗೆ ಉದ್ಯೋಗ ದೊರೆಯಲಿದೆ. ಪ್ರಸ್ತುತ ಭೂ ಸ್ವಾಧೀನ ಕಾರ್ಯ ನಡೆಯುತ್ತಿದ್ದು , ಮಾರ್ಚ್‌ ಕೊನೆಯ ವೇಳೆಗೆ ಕರ್ನಾಟಕ ಕೈಗಾರಿಕಾಭಿವೃದ್ಧಿ ಮಂಡಳಿ 100 ಎಕರೆ ಭೂಮಿಯನ್ನು ಇನ್ಫೋಸಿಸ್‌ ಸಂಸ್ಥೆಗೆ ಹಸ್ತಾಂತರಿಸುವುದು ಎಂದು ಗುರುವಾರ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ದೇಶಪಾಂಡೆ ಹೇಳಿದರು.

ಮುಂದಿನ 2 ವರ್ಷಗಳಲ್ಲಿ ಇನ್ಫೋಸಿಸ್‌ ಸಂಸ್ಥೆ 25 ಸಾವಿರ ಉದ್ಯೋಗಾವಕಾಶಗಳನ್ನು ಕಲ್ಪಿಸುವುದು. ಸಂಸ್ಥೆಯು ಕೋರಿರುವ ಮಂಗಳೂರಿನಲ್ಲಿ 25 ಎಕರೆ ಹಾಗೂ ಮೈಸೂರಿನಲ್ಲಿ ಹೆಚ್ಚುವರಿ 100 ಎಕರೆ ಭೂಮಿಯನ್ನು ನಿಡಲು ಸರ್ಕಾರ ಒಪ್ಪಿದೆ ಎಂದು ಸಚಿವರು ಹೇಳಿದರು. ಪ್ರಧಾನಿ ವಾಜಪೇಯಿ ಅವರು, ಶುಕ್ರವಾರ ಇನ್ಫೋಸಿಸ್‌ ಸಂಸ್ಥೆಗೆ ಭೇಟಿಕೊಡುವುದನ್ನು ಅವರು ಸ್ಪಷ್ಟ ಪಡಿಸಿದರು.

(ಯುಎನ್‌ಐ)

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...