ರಸ್ತೆ ಅಭಿವೃದ್ಧಿ ಯೋಜನೆ ಪರಿಶೀಲನೆ-ಗೆಬೆಂಗಳೂರಿಗೆ ವಿಶ್ವಬ್ಯಾಂಕ್‌ ತಂಡ

ಸಿಡ್ನಿ : ರಾಜ್ಯದಲ್ಲಿ 1683 ಕೋಟಿ ರುಪಾಯಿ ವೆಚ್ಚದಲ್ಲಿ ರಸ್ತೆ ಅಭಿವೃದ್ಧಿ ಪಡಿಸುವ ಮೊದಲ ಹಂತದ ಯೋಜನೆಗಳನ್ನು ಪರಿಶೀಲಿಸಲು 9 ಮಂದಿಯ ವಿಶ್ವ ಬ್ಯಾಂಕ್‌ ಅಧಿಕಾರಿಗಳ ತಂಡ ಗುರುವಾರ ನಗರಕ್ಕೆ ಆಗಮಿಸಲಿದೆ ಎಂದು ಸಾರ್ವಜನಿಕ ಕಾಮಗಾರಿ ಸಚಿವ ಧರಂ ಸಿಂಗ್‌ ಬುಧವಾರ ತಿಳಿಸಿದ್ದಾರೆ.

ರಾಜ್ಯದ ವಿವಿಧೆಡೆಗಳಲ್ಲಿ ಜಾರಿಯಲ್ಲಿರುವ ಯೋಜನೆಗಳ ಬಗ್ಗೆ ವಿಮರ್ಶಿಸಿ ಮಾತನಾಡುತ್ತಿದ್ದ ಸಚಿವರು, ವಿಶ್ವ ಬ್ಯಾಂಕ್‌ ತಂಡ 13 ದಿನಗಳ ಕಾಲ ರಾಜ್ಯವನ್ನು ಭೇಟಿ ನೀಡಲಿದ್ದು, ಯೋಜನೆಗಳ ರೂಪುರೇಷೆ ಪರಿಶೀಲಿಸಲಿದೆ. ಪರಿಶೀಲನೆ ನಂತರ ಅಧಿಕಾರಿಗಳು ತೃಪ್ತರಾದಲ್ಲಿ ಏಪ್ರಿಲ್‌ ಹೊತ್ತಿಗೆ ಅಂತಿಮ ಹಂತದ ಒಡಂಬಡಿಕೆ ಸಾಧ್ಯವಾಗಲಿದ್ದು, ವಿಶ್ವ ಬ್ಯಾಂಕ್‌ ಸಾಲ ರಾಜ್ಯಕ್ಕೆ ಹರಿದು ಬರಲಿದೆ ಎಂದರು.

ಯೋಜನಾ ವೆಚ್ಚದ ಶೇ.70ರಷ್ಟು ಖರ್ಚನ್ನು ವಿಶ್ವಬ್ಯಾಂಕ್‌ ನೀಡಲಿದೆ. ಸಾಲ ಮತ್ತಿತರೆ ವೆಚ್ಚವನ್ನು ರಾಜ್ಯ ಸರ್ಕಾರ ಭರಿಸಲಿದ್ದು, 2043 ಕಿಮೀ ಉದ್ದದಷ್ಟು ರಸ್ತೆಯನ್ನು ಅಭಿವೃದ್ಧಿ ಪಡಿಸಲಾಗುವುದು. ನ್ಯಾಷನಲ್‌ ಬ್ಯಾಂಕ್‌ನಿಂದ ಕೃಷಿ ಹಾಗೂ ಗ್ರಾಮೀಣಾಭಿವೃದ್ಧಿ ಸಾಲ ಪಡೆದಿರುವ ಸರ್ಕಾರ ಈಗಾಗಲೇ 60 ಕೋಟಿ ರುಪಾಯಿ ವೆಚ್ಚದಲ್ಲಿ 1420 ಕಾಮಗಾರಿಗಳನ್ನು ಕೈಗೆತ್ತಿಕೊಂಡಿದೆ ಎಂದು ಧರಂ ಸಿಂಗ್‌ ಹೇಳಿದರು.

ಇಪ್ಪತ್ತನಾಲ್ಕು ಜಿಲ್ಲೆಗಳಲ್ಲಿ ರಸ್ತೆ ಕಾಮಗಾರಿ ನಡೆಸಲು 57 ನಿರ್ಮಾಣ ಸಂಸ್ಥೆಗಳು ಮುಂದೆ ಬಂದಿವೆ. ಆದರೆ ಮಂಡ್ಯ, ಬೆಂಗಳೂರು ಹಾಗೂ ಕೊಪ್ಪಳ ಜಿಲ್ಲೆಗಳ ಕಾಮಗಾರಿ ಕೈಗೆತ್ತಿಕೊಳ್ಳಲು ಇನ್ನೂ ಯಾರೂ ಮುಂದಾಗಿಲ್ಲ. ಖರ್ಚು ಸ್ವಲ್ಪ ಅಧಿಕವಾದರೂ ಪರವಾಗಿಲ್ಲ, ಕಾಮಗಾರಿ ಮಾತ್ರ ಪಕ್ಕಾ ಆಗಬೇಕು ಎಂದು ಅಧಿಕಾರಿಗಳಿಗೆ ಸೂಚಿಸಲಾಗಿದೆ ಎಂದು ಸಚಿವರು ತಿಳಿಸಿದರು.

(ಯುಎನ್‌ಐ)