ಜನವರಿ 20 ಹಾಗೂ 21ಕ್ಕೆ ಲಾರಿ ಮಾಲೀಕರ ಒಕ್ಕೂಟದ ಸಮ್ಮೇಳನ

ಬೆಂಗಳೂರು : ಕರ್ನಾಟಕ ಲಾರಿ ಮಾಲೀಕರ ಒಕ್ಕೂಟ ಜನವರಿ 20 ಹಾಗೂ 21ರಂದು ವಿಶೇಷ ಸಮ್ಮೇಳನ ಆಯೋಜಿಸಿದ್ದು, ರಾಜ್ಯದ ಮೂಲೆ ಮೂಲೆಗಳಿಂದ 1000ಕ್ಕೂ ಹೆಚ್ಚು ಪ್ರತಿನಿಧಿಗಳು ಸಮ್ಮೇಳನದಲ್ಲಿ ಭಾಗವಹಿಸುವ ನಿರೀಕ್ಷೆಯಿದೆ.

ಒಕ್ಕೂಟದ ಅಧ್ಯಕ್ಷ ಬಿ.ಚನ್ನರೆಡ್ಡಿ ಮಾಧ್ಯಮಗೋಷ್ಠಿಯಲ್ಲಿ ಬುಧವಾರ ಈ ವಿಷಯ ತಿಳಿಸಿದರು. ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಸಮ್ಮೇಳನವನ್ನು ಉದ್ಘಾಟಿಸಲಿದ್ದಾರೆ. ಕೇಂದ್ರ ಪ್ರವಾಸೋದ್ಯಮ ಸಚಿವ ಅನಂತ ಕುಮಾರ್‌, ಕೇರಳ ಸಾರಿಗೆ ಸಚಿವ ಸಿ.ಕೆ.ನಾಯ್ಡು ಅವರ ಜೊತೆಗೆ ಕರ್ನಾಟಕದ ಕೆಲವು ಸಚಿವರೂ ಸಮ್ಮೇಳನದಲ್ಲಿ ಭಾಗವಹಿಸಲಿದ್ದಾರೆ ಎಂದರು.

ಲಾರಿಗಳಿಗೆ ಪರವಾನಗಿ ನೀಡಿಕೆಯಲ್ಲಿನ ನಿಬಂಧನೆಗಳನ್ನು ಸರ್ಕಾರ ತೆಗೆದು ಹಾಕಿದ್ದರೂ, ಚೆಕ್‌ಪೋಸ್ಟ್‌ ಸಿಬ್ಬಂದಿ ಲಾರಿಗಳ ಸರಾಗ ಚಾಲನೆಗೆ ಅಡ್ಡಿ ಒಡ್ಡುತ್ತಿದ್ದಾರೆ. ಉತ್ತಮ ಸೇವೆ ಒದಗಿಸುತ್ತಿರುವ ಈವತ್ತಿನ ಸಂದರ್ಭದಲ್ಲೂ 1939ರ ಮೋಟಾರು ವಾಹನ ಕಾಯ್ದೆಯ ನಿಬಂಧನೆಗಳನ್ನು ಸಡಿಲಿಸಿಲ್ಲ. ನಮ್ಮೂರಿಂದ ಲಾರಿ ಹೊರಟಿತೆಂದರೆ ಅದರೊಟ್ಟಿಗೇ ಸಮಸ್ಯೆಗಳೂ ಇದಿರಾಗುತ್ತವೆ. ಪ್ರತಿ ರಾಜ್ಯ ಸರ್ಕಾರೀ ಸಂಸ್ಥೆಗಳು ಲಾರಿ ಸಂಚಾರಕ್ಕೆ ಒಂದಲ್ಲ ಒಂದು ತಕರಾರೆತ್ತುತ್ತವೆ ಎಂದು ಹೇಳಿದರು.

ಸಮ್ಮೇಳನದಲ್ಲಿ ಈ ಎಲ್ಲಾ ಸಮಸ್ಯೆಗಳ ಬಗ್ಗೆ ಚರ್ಚಿಸಿ, ಸೂಕ್ತ ಪರಿಹಾರೋಪಾಯಗಳನ್ನೂ ಕಂಡುಕೊಳ್ಳಲಾಗುವುದು. ಜೊತೆಗೆ ಲಾರಿ ಉದ್ಯಮದ ಕ್ಷಿಪ್ರ ಅಭಿವೃದ್ಧಿಗಾಗಿ ಸಂಸ್ಥೆಯಾಂದನ್ನು ಸ್ಥಾಪಿಸಲಾಗುವುದು ಎಂದು ಚನ್ನರೆಡ್ಡಿ ತಿಳಿಸಿದರು.

(ಯುಎನ್‌ಐ)