ಫೆ.5 ಹಾಗೂ 6ಕ್ಕೆ ರಾಜ್ಯದ ರೈತರಿಂದ ರಸ್ತೆ ರೋಕೋ ಚಳವಳಿ

ಬೆಂಗಳೂರು : ಎನ್‌ಡಿಎ ಸರ್ಕಾರದ ರೈತ ವಿರೋಧಿ ನೀತಿಗಳನ್ನು ಪ್ರತಿಭಟಿಸಿ ಬರುವ ಫೆ. 5 ಹಾಗೂ 6ರಂದು ರಾಜ್ಯಾದ್ಯಂತ ರಸ್ತೆ ತಡೆ ಚಳವಳಿ ನಡೆಸಲು ರಾಜ್ಯದ ಮೂರು ಮುಖ್ಯ ರೈತ ಸಂಘಗಳು ಹಾಗೂ ಭಾರತೀಯ ಕೃಷಿ ಕಾರ್ಮಿಕರ ಸಂಘ (ಎಐಎಡಬ್ಲ್ಯುಯು) ನಿರ್ಧರಿಸಿವೆ. ಇದರ ಬೆನ್ನಲ್ಲೇ ಜೈಲು ಭರೋ ಚಳವಳಿಯನ್ನೂ ಸಂಘಗಳು ಹಮ್ಮಿಕೊಳ್ಳಲಿವೆ.

ಕರ್ನಾಟಕ ಪ್ರಾಂತ ರೈತ ಸಂಘ (ಕೆಪಿಆರ್‌ಎಸ್‌), ಕರ್ನಾಟಕ ರಾಜ್ಯ ರೈತ ಸಂಘ (ಕೆಆರ್‌ಆರ್‌ಎಸ್‌) , ಅಖಿಲ ಭಾರತ ಕಿಸಾನ್‌ ಸಭಾ (ಎಐಕೆಎಸ್‌) ಹಾಗೂ ಎಐಎಡಬ್ಲ್ಯುಯು ವಕ್ತಾರರು ಮಂಗಳವಾರ ಮಾಧ್ಯಮಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದರು. ವಿಶ್ವಬ್ಯಾಂಕ್‌ ಹಾಗೂ ಐಎಂಎಫ್‌ ಒತ್ತಡಕ್ಕೆ ಮಣಿದು ಎನ್‌ಡಿಎ ಸರ್ಕಾರ ಕೃಷಿ ಉತ್ಪನ್ನಗಳ ಆಮದಿಗೆ ಸ್ಪಂದಿಸುತ್ತಾ, ನೀತಿಗಳನ್ನು ರೂಪಿಸುತ್ತಿದೆ. ಪರಿಣಾಮ ನಮ್ಮ ರೈತ ಬೆಳೆದ ಬೆಳೆಗೆ ಚಿಕ್ಕಾಸೂ ಹುಟ್ಟುತ್ತಿಲ್ಲ ಎಂದರು.

1994ರಲ್ಲಿ ಕಾಂಗ್ರೆಸ್‌ (ಐ) ಸರ್ಕಾರ ಗ್ಯಾಟ್‌ ಒಪ್ಪಂದಕ್ಕೆ ಸಹಿ ಹಾಕಿದ್ದೇ ರೈತನ ಈ ಅಧೋಸ್ಥಿತಿಗೆ ಕಾರಣ ಎಂಬುದನ್ನೂ ನಾವು ಮರೆತಿಲ್ಲ. ಮೊದಲೇ ತಾನು ಬೆಳೆದ ಬೆಳೆಗೆ ಕನಿಷ್ಠ ಬೆಂಬಲ ಬೆಲೆ ಸಿಗದೆ ರೈತ ಪರದಾಡುತ್ತಿರುವ ಈ ಸಂದರ್ಭದಲ್ಲೇ ನೀರಾವರಿ ಪಂಪ್‌ಸೆಟ್‌ಗಳಿಗೆ ಬಳಸುವ ವಿದ್ಯುತ್‌ ದರವನ್ನು ಸರ್ಕಾರ ಶೇ.100ರಿಂದ 300ರಷ್ಟು ಏರಿಸಿರುವುದು ಉರಿಯೋ ಗಾಯದ ಮೇಲೆ ಉಪ್ಪು ಸುರಿದಂತಾಗಿದೆ. ಹತಾಶನಾಗುತ್ತಿರುವ ರೈತ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾನೆ. ಸರ್ಕಾರದ ರೈತ ವಿರೋಧಿ ನೀತಿಯನ್ನು ಪ್ರತಿಭಟಿಸಲು ಪ್ರತಿಯಾಬ್ಬ ರೈತನೂ ನಮ್ಮೊಂದಿಗೆ ಕೈ ಜೋಡಿಸಬೇಕು ಎದು ಸಂಘಗಳ ನಾಯಕರು ಕರೆ ಕೊಟ್ಟರು.

(ಯುಎನ್‌ಐ)

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...