• search
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ರಾಜಾಂಗಣದ ದರ್ಬಾರ್‌ ಉದ್ಘಾಟನೆಗೆ ಉಡುಪಿಗೆ ವಾಜಪೇಯಿ

By Staff
|

ಉಡುಪಿ : ಸಾರ್ಕ್‌ ಸಮ್ಮೇಳನದ ನೆಪದಲ್ಲಿ ಹತ್ತು ವರ್ಷಗಳ ಹಿಂದೆ ಬೆಂಗಳೂರಿನ ಎಂ.ಜಿ. ರಸ್ತೆ ಸೇರಿದಂತೆ ರಾಜ್ಯದ ಹಲವು ರಸ್ತೆಗಳು ದುರಸ್ತಿ ಕಂಡವು. ಹಳ್ಳ ಕೊಳ್ಳಗಳು ಒಮ್ಮಿಂದೊಮ್ಮೆಲೆ ಕಾಣೆಯಾದವು. ಮೊನ್ನೆ ಮೊನ್ನೆ ಅದೇ ಕಳೆದ ವರ್ಷ ಮೇ ತಿಂಗಳಿನಲ್ಲಿ ಅಮೆರಿಕದ ಅಧ್ಯಕ್ಷ ಬಿಲ್‌ ಕ್ಲಿಂಟನ್‌ ಭಾರತಕ್ಕೆ ಭೇಟಿ ಕೊಟ್ಟಾಗ ಅವರು, ಬೆಂಗಳೂರಿಗೂ ಬರುತ್ತಾರೆಂಬ ಆಶಾಭಾವನೆಯಿಂದ ನಗರದ ರಸ್ತೆಗಳು ದುರಸ್ತಿಯಾಗಿದ್ದೂ ಉಂಟು.

ಈಗ ಆ ಯೋಗ ಉಡುಪಿಯ ರಸ್ತೆಗಳಿಗೂ ಬಂದಿದೆ. ರಾಷ್ಟ್ರದ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಅವರು, 18ರಂದು ಉಡುಪಿಗೆ ಭೇಟಿ ನೀಡುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಉಡುಪಿಯ ರಸ್ತೆಗಳಿಗೆ ತೇಪೆ ಹಾಕುವ, ಅಭಿವೃದ್ಧಿಪಡಿಸುವ ಕಾರ್ಯ ಸಮರೋಪಾದಿಯಲ್ಲಿ ಸಾಗಿದೆ. ಆದಿ ಉಡುಪಿಯಿಂದ ರಾಜಾಂಗಣದವರೆಗಿನ ರಸ್ತೆಗಳಲ್ಲಿರುವ ಹೊಂಡ - ಕಂದಕಗಳೆಲ್ಲ ರಾತ್ರೋರಾತ್ರಿ ಕಣ್ಮರೆಯಾಗುತ್ತಿವೆ.

ಜಿಲ್ಲಾಡಳಿತ ಕಣ್ಣಿಗೆ ಎಣ್ಣೆ ಬಿಟ್ಟುಕೊಂಡು ಹಗಲಿರುಳೂ ರಸ್ತೆ ದುರಸ್ತಿ ಕಾರ್ಯದಲ್ಲಿ ನಿರತವಾಗಿದೆ. ಜಲ್ಲಿಕಲ್ಲಿಗೆ ಟಾರು ಸೇರಿಸಿ ಗುಂಡಿ ಮುಚ್ಚುತ್ತಿರುವುದೇ ಅಲ್ಲದೆ, ಕೆಲವೆಡೆ ರಸ್ತೆಯ ಅಗಲೀಕರಣವೂ ಸಾಗಿದೆ. ವರ್ಷಗಟ್ಟಲೆಯಿಂದ ರಸ್ತೆಯಂಚಿನಲ್ಲಿ ಬಿದ್ದಿದ್ದ ಮಣ್ಣು ಮಾಯವಾಗುತ್ತಿದೆ. ರಸ್ತೆಗೆ ಎಲ್ಲಿಲ್ಲದ ಕಳೆ ಬರುತ್ತಿದೆ. ಅಟ್‌ಲೀಸ್ಟ್‌ 6 ತಿಂಗಳಿಗೊಮ್ಮೆಯಾದರೂ ಗಣ್ಯರು ಉಡುಪಿಗೆ ಬಂದರೆ ಚೆನ್ನ ಎಂದು ಜನ ಮಾತಾಡಿಕೊಳ್ಳುತ್ತಿದ್ದಾರೆ.

ಪ್ರಧಾನಿ ವಾಜಪೇಯಿ ಅವರು ಜನವರಿ 18ರ ರಾತ್ರಿ ಇಲ್ಲೇ ಮೊಕ್ಕಾಂ ಹೂಡುವವರಿದ್ದು, ಅದಕ್ಕಾಗಿ ಕರಾವಳಿ ಹೋಟೆಲ್‌ ಮತ್ತು ಪ್ರವಾಸಿ ಬಂಗಲೆಗಳೂ ಕಳೆ ಕಟ್ಟುತ್ತಿವೆ. ಭದ್ರತಾ ಪಡೆಯ ಅಧಿಕಾರಿಗಳು ಇಲ್ಲಿಗೆ ಭೇಟಿ ನೀಡಿ ಪರಿಶೀಲನೆಯನ್ನೂ ನಡೆಸಿಯಾಗಿದೆ. ಉಡುಪಿಯನ್ನು ಸಂಪರ್ಕಿಸುವ ಪ್ರಮುಖ ರಸ್ತೆಗಳಲ್ಲಿ ದಿಢೀರೆಂದು ಚೆಕ್‌ಪೋಸ್ಟ್‌ಗಳೂ ತಲೆ ಎತ್ತಿವೆ.

ನಗರಕ್ಕೆ ಬರುವ ವಾಹನಗಳ ಮೇಲೆ ಪೊಲೀಸರು ನಿಗಾ ಇಟ್ಟಿದ್ದಾರೆ. ನಗರದಲ್ಲಿ ಕಾಣಿಸುವ ಹೊಸ ಮುಖಗಳ ಬಗ್ಗೆ ಮಫ್ತಿಯ ಪೊಲೀಸರು ಗೌಪ್ಯ ಮಾಹಿತಿಗಳನ್ನೂ ಸಂಗ್ರಹಿಸುತ್ತಿದ್ದಾರೆ. ಕೃಷ್ಣ ಮಠದ ಸುತ್ತಲೂ ಪೊಲೀಸ್‌ ಕಣ್ಣುಗಳು ಸುಳಿದಾಡುತ್ತಿವೆ.

ವ್ಯಾಪಾರ ಸ್ಥಗಿತ ಸಂಭವ : ಪ್ರಧಾನಿಯವರ ಆಗಮನ ಹಿನ್ನೆಲೆಯಲ್ಲಿ ಉಡುಪಿ ರಥ ಬೀದಿಯಲ್ಲಿ ಸಾರ್ವಜನಿಕ ಸಂಚಾರ ಸ್ತಬ್ಧಗೊಳ್ಳುವ ಹಾಗೂ ವ್ಯಾಪಾರ ವಹಿವಾಟು ಕಡ್ಡಾಯ ವಿಶ್ರಾಂತಿ ಪಡೆವ ಸಾಧ್ಯತೆಗಳೂ ಇವೆ. ಒಂದು ದಿನದ ಮಟ್ಟಿಗೆ ಆಟೋರಿಕ್ಷಾ ನಿಲ್ದಾಣ ಹಾಗೂ ಬಸ್‌ ನಿಲ್ದಾಣವನ್ನು ಬೇರೆಡೆಗೆ ಸ್ಥಳಾಂತರಿಸುವ ಕುರಿತೂ ಜಿಲ್ಲಾಡಳಿತ ಚಿಂತಿಸುತ್ತಿದೆ. ಸಾರ್ವಜನಿಕ ವಾಹನಗಳ ನಿಲುಗಡೆಗೆ ಬೇರೆಡೆ ಅವಕಾಶ ಕಲ್ಪಿಸಲೂ ಸಿದ್ಧತೆ ನಡೆದಿದೆ.

ಒಟ್ಟಿನಲ್ಲಿ ಪ್ರಧಾನಿಯವರ ಆಗಮನದ ಹಿನ್ನೆಲೆಯಲ್ಲಿ ಉಡುಪಿಗೆ ಹೊಸರಂಗು ಬಂದಿದೆ. ರಸ್ತೆಗಳು ಚೆನ್ನಾಗಿರುವಾಗಲೇ ನೀವೂ ಒಮ್ಮೆ ಉಡುಪಿಗೆ ಹೋಗಿ ಬಂದುಬಿಡಿ. ಮತ್ತೆ ರಸ್ತೆಗಳು ಹಾಳಾದರೆ ಅವು ರಿಪೇರಿ ಆಗುವುದು, ಮತ್ತೆ ವಾಜಪೇಯಿ ಅವರು ಉಡುಪಿಗೆ ಬಂದಾಗ ಮಾತ್ರ. ಅಂದರೆ ನೀವು ಇನ್ನಷ್ಟು ವರ್ಷ ಕಾಯಬೇಕು. ಇಲ್ಲವೆ ಹಾಳಾದ ರಸ್ತೆಯಲ್ಲಿ ಕುಣಿಯುತ್ತಾ, ಕುಪ್ಪಳಿಸುತ್ತಾ ಉಡುಪಿಯ ಕೃಷ್ಣನ ಕಾಣಬೇಕು. ಪ್ರಯಾಣಕ್ಕೆ ರೆಡಿ ಮಾಡಿಕೊಳ್ಳುತ್ತಿದ್ದೀರಾ ? ಹ್ಯಾಪಿ ಜರ್ನಿ.

ಮುಖಪುಟ / ಇವತ್ತು... ಈ ಹೊತ್ತು...

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

Oneindia ಬ್ರೇಕಿಂಗ್ ನ್ಯೂಸ್,
ತಾಜಾ ಸುದ್ದಿ ತಕ್ಷಣವೇ ಪಡೆಯಿರಿ

Notification Settings X
Time Settings
Done
Clear Notification X
Do you want to clear all the notifications from your inbox?
Settings X
X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more