ಅಮೆರಿಕದ ವಿದ್ಯಾರ್ಥಿ ಗಗನಯಾತ್ರಿ ಕಾರ್ಯಕ್ರಮಕ್ಕೆರಾಜ್ಯದಿಂದ ಐವರು

ಬೆಂಗಳೂರು : ಕರ್ನಾಟಕದ ಅರ್ಜುನ್‌ ಶಂಕರ್‌, ಲಕ್ಷ್ಮಿನಾರಾಯಣ ವಡ್ಲಮನಿ, ಅವಿನಾಶ ಶಾಸ್ತ್ರಿ, ಸಿದ್ಧಾರ್ಥ ಚತುರ್ವೇದಿ ಮತ್ತು ಶ್ರೀಕಾಂತ ಶ್ರೀಧರನ್‌ ಅಮೆರಿಕದ ಪ್ಲಾನೆಟರಿ ಸೊಸೈಟಿ ಏರ್ಪಡಿಸಿರುವ ವಿದ್ಯಾರ್ಥಿ ಗಗನಯಾತ್ರಿ ಕಾರ್ಯಕ್ರಮಕ್ಕೆ ಆಯ್ಕೆಯಾಗಿದ್ದಾರೆ.

ಭಾರತದಿಂದ 12 ವಿದ್ಯಾರ್ಥಿಗಳನ್ನು ಈ ಕಾರ್ಯಕ್ರಮಕ್ಕೆ ಆರಿಸಿದ್ದು , ಅದರಲ್ಲಿ 5 ವಿದ್ಯಾರ್ಥಿಗಳು ಕರ್ನಾಟಕದವರೇ ಆಗಿರುವುದು ರಾಜ್ಯಕ್ಕೆ ಹೆಮ್ಮೆಯ ವಿಷಯವಾಗಿದೆ. ಈ ಕಾರ್ಯಕ್ರಮಕ್ಕಾಗಿ 41 ವಿದ್ಯಾರ್ಥಿಗಳ ಪಟ್ಟಿಯನ್ನು ತಯಾರಿಸಿದ್ದ ಇಸ್ರೋ ಅಂತಿಮವಾಗಿ 12 ವಿದ್ಯಾರ್ಥಿಗಳನ್ನು ಭಾರತದಿಂದ ಆರಿಸಿದೆ.

12 ವಿದ್ಯಾರ್ಥಿಗಳ ಪಟ್ಟಿಯನ್ನು ಗುರುವಾರ ನಡೆದ ಸಮಾರಂಭವೊಂದರಲ್ಲಿ ಪ್ರಕಟಿಸಲಾಯಿತು. ಬಾಹ್ಯಾಕಾಶ ಆಯೋಗದ ಸದಸ್ಯ ಪ್ರೊ. ಯು.ಆರ್‌.ರಾವ್‌ ಹಾಗೂ ಇಸ್ರೋ ಉಪಗ್ರಹ ಕೇಂದ್ರದ ನಿರ್ದೇಶಕ ಡಾ. ಎ.ಎಸ್‌. ಗೋಯಲ್‌ ಕಾರ್ಯಕ್ರಮದಲ್ಲಿ ಹಾಜರಿದ್ದರು. ಇದೇ ಸಂದರ್ಭದಲ್ಲಿ ಪುಟಾಣಿ ವಿಜ್ಞಾನಿಗಳಾದ ವಿಕಾಸ್‌, ಶಾಲೀನ್‌ ಮತ್ತು ತನ್ಮಯ್‌ ಅವರನ್ನು ಸನ್ಮಾನಿಸಲಾಯಿತು.

(ಇನ್ಫೋ ವಾರ್ತೆ)