ಕಾಸರಗೋಡು ಜಿಲ್ಲೆ ಕರ್ನಾಟಕಕ್ಕೆ : ನಿಮ್ಮ ಮೂಗಿನ ತುದಿಗೆ ಕೃಷ್ಣ ತುಪ್ಪ

ಬೆಂಗಳೂರು ಕೇರಳಕ್ಕೆ ಅಂಟಿಕೊಂಡಿರುವ ಕಾಸರಗೋಡು ಜಿಲ್ಲೆಯನ್ನು ಕರ್ನಾಟಕಕ್ಕೆ ಸೇರಿಸಬೇಕೆಂಬ ರಾಜ್ಯದ ಕನ್ನಡಿಗರ ಬಹುದಿನದ ಕಳಕಳಿಗೆ ಮುಖ್ಯಮಂತ್ರಿ ಎಸ್‌. ಎಂ. ಕೃಷ್ಣ ಇವತ್ತು ಸಹಮತ ವ್ಯಕ್ತಪಡಿಸಿದರು. ಇಂತಹ ಪ್ರಕ್ರಿಯೆಗೆ ಶೀಘ್ರ ಚಾಲನೆ ನೀಡಬೇಕೆಂದು ಆಗ್ರಹಿಸಿ ಗುರುವಾರ ಬೆಂಗಳೂರಿನಲ್ಲಿ ತಮಗೆ ಮನವಿ ಪತ್ರ ಸಲ್ಲಿಸಿದ ನಿಯೋಗದೊಂದಿಗೆ ಕೃಷ್ಣ ಈ ಭಾವನೆಯನ್ನು ಹಂಚಿಕೊಂಡರು.

ಕಾಸರಗೋಡನ್ನು ಕರ್ನಾಟಕಕ್ಕೆ ಸೇರಿಸಿಕೊಳ್ಳುವ ನಿಟ್ಟಿನಲ್ಲಿ ಪ್ರಧಾನಿ ವಾಜಪೇಯಿ ಅವರ ಬಳಿಗೆ ನಿಯೋಗವೊಂದನ್ನು ಕೊಂಡೊಯ್ಯುವ ಆಶ್ವಾಸನೆಯನ್ನೂ ಕೃಷ್ಣ ನೀಡಿದರು. ಈ ನಿಯೋಗದಲ್ಲಿ ಮಾಜಿ ಮುಖ್ಯಮಂತ್ರಿಗಳು, ರಾಜ್ಯದ ಸರ್ವಪಕ್ಷ ಸದಸ್ಯರು ಇರುತ್ತಾರೆ.

ಕನ್ನಡಿಗರೇ ಅಧಿಕ ಸಂಖ್ಯೆಯಲ್ಲಿರುವ ಹಾಗೂ ಕರ್ನಾಟಕದ ಒಂದು ಭಾಗವೇ ಆಗಿರುವ ಕಾಸರಗೋಡನ್ನು ರಾಜ್ಯಕ್ಕೆ ಸೇರಿಸಬೇಕೆಂಬ ಒತ್ತಾಯ ಬಹಳ ವರ್ಷಗಳಿಂದ ಇದೆ. ಇನ್ನಾದರೂ ಈ ಆಕಾಂಕ್ಷೆ ಕೈಗೂಡಬೇಕೆನ್ನುವುದು ಕನ್ನಡ ಪ್ರೇಮಿಗಳ ಒತ್ತಾಯ ಎಂದು ಸಾಹಿತಿ ಕಯ್ಯಾರಕೈಯಿಣ್ಣರೈ ಪತ್ರಕರ್ತರಿಗೆ ತಿಳಿಸಿದರು. ಅದಕ್ಕೂ ಮುನ್ನ ಅವರು ಕೃಷ್ಣ ಅವರ ಬಳಿಗೆ ನಿಯೋಗದೊಂದಿಗೆ ತೆರಳಿ ಮನವಿ ಪತ್ರ ಸಲ್ಲಿಸಿದರು. ನಿಯೋಗದಲ್ಲಿ ವಿಧಾನ ಪರಿಷತ್‌ ಸದಸ್ಯ ಡಾ. ವಿ. ಎಸ್‌. ಆಚಾರ್ಯ , ಶಾಸಕ ಆಲಾಡಿ ಶ್ರೀನಿವಾಸ ಸೆಟ್ಟಿ, ಮಾಜಿ ಸಂಸದ ರಮಣ ರೈ ಮುಂತಾದವರು ಇದ್ದರು.

(ಕನ್ನಡಇನ್‌ಫೋ ವಾರ್ತೆ)