ಪ್ರಥಮ ಯತ್ನ : ‘ವಿಡಿಯೋಕಾನ್‌ ಸುಪ್ರಭಾತ ಚಿತ್ರ ಪ್ರಶಸ್ತಿ 2000’

ಬೆಂಗಳೂರು : ಪ್ರಪ್ರಥಮ ಬಾರಿಗೆ ನೋಡುಗರ ಆಯ್ಕೆಯ ಕನ್ನಡ ಚಲನಚಿತ್ರ ಪ್ರಶಸ್ತಿ ‘ವಿಡಿಯೋಕಾನ್‌ ಸುಪ್ರಭಾತ ಚಿತ್ರ ಪ್ರಶಸ್ತಿ 2000’ ಜನವರಿ 14ರಂದು ನಗರದ ಅರಮನೆ ಆವರಣದಲ್ಲಿ ನಡೆಯಲಿದೆ ಎಂದು ಸುಪ್ರಭಾತ ಚಾನೆಲ್‌ನ ಮುಖ್ಯ ಅಧಿಕಾರಿ ಅನಿಲ್‌ ಶೆಟ್ಟಿ ಗುರುವಾರ ತಿಳಿಸಿದ್ದಾರೆ.

ಪ್ರಶಸ್ತಿಗಳ ಆಯ್ಕೆಯನ್ನು ನೋಡುಗರ ತೀರ್ಪಿಗೇ ಬಿಟ್ಟಿದ್ದು, ಅವರ ಆಯ್ಕೆಯಂತೆ ಪ್ರಶಸ್ತಿ ಪ್ರದಾನ ಮಾಡಲಾಗುವುದು. ಈವರೆಗೆ 7 ಸಾವಿರ ಮಂದಿ ತಮ್ಮ ಆಯ್ಕೆಯನ್ನು ಕಳುಹಿಸಿದ್ದು, 17 ವಿಭಾಗಗಳಲ್ಲಿನ ಪ್ರಶಸ್ತಿಯನ್ನು ಸಮಾರಂಭದ ದಿನದವರೆಗೂ ಗುಟ್ಟಾಗಿಟ್ಟಿದ್ದು, ಅಂದೇ ತಾರೆಗಳಿಗೆ ಸರ್‌ಪ್ರೆೃಸ್‌ ನೀಡಲಾಗುವುದು ಎಂದು ಅನಿಲ್‌ ಶೆಟ್ಟಿ ಸುದ್ದಿಗಾರರ ಪ್ರಶ್ನೆಗೆ ಉತ್ತರಿಸುತ್ತಾ ಹೇಳಿದರು.

ಈ ವರ್ಷ ಪ್ರಾರಂಭವಾಗುತ್ತಿರುವ ಈ ಪ್ರಶಸ್ತಿ ಪ್ರದಾನ ಸಮಾರಂಭ ಇನ್ನು ಮುಂದೆ ಪ್ರತಿ ವರ್ಷ ಜನವರಿ ಎರಡನೇ ವಾರದಂದು ನಡೆಯಲಿದೆ. ಜೊತೆಗೆ ಸುಪ್ರಭಾತ ಚಾನೆಲ್‌ ಈ ಕಾರ್ಯಕ್ರಮವನ್ನು ಭಾನುವಾರ ರಾತ್ರಿ 8 ಗಂಟೆಯಿಂದ ನೇರ ಪ್ರಸಾರ ಮಾಡಲಿದೆ.

ಒಂಬತ್ತು ತಿಂಗಳ ಕೂಸು ಸುಪ್ರಭಾತ ಈಗ ತನ್ನ ಕಾಲ ಮೇಲೆ ನಿಲ್ಲುವಂತಾಗಿದೆ. ವ್ಯೂಯರ್‌ಷಿಪ್‌ ರೇಟಿಂಗ್‌ನಲ್ಲಿ ಉದಯ ಟಿವಿ ಬಿಟ್ಟರೆ ನಮ್ಮದೇ ಮುಂದು. ಪ್ರತಿಶತ 80ರಷ್ಟು ನೋಡುಗರನ್ನು ಚಾನೆಲ್‌ ಹೊಂದಿದೆ. ಮಾರ್ಚ್‌ ಹೊತ್ತಿಗೆ ವಾರ್ತಾ ಪ್ರಸಾರ ಸೇರಿದಂತೆ 18 ಹೊಸ ಕಾರ್ಯಕ್ರಮಗಳನ್ನು ಚಾನೆಲ್‌ ಪ್ರಸಾರ ಮಾಡಲಿದೆ ಎಂದು ಅನಿಲ್‌ ವಿವರಿಸಿದರು.

(ಯುಎನ್‌ಐ)