ದಾವಣಗೆರೆ- ಬೆಂಕಿಗೆ ಮಹಿಳೆ ಬಲಿ, ಕಾನ್ಪುರದಲ್ಲಿ ಶೀತಗಾಳಿಗೆ 2 ಸಾವು

ದಾವಣಗೆರೆ : ಗುರುವಾರ ಮುಂಜಾನೆ ಇಲ್ಲಿ ಸಂಭವಿಸಿದ ಬೆಂಕಿ ಅಪಘಾತಕ್ಕೆ 30 ವರ್ಷ ವಯಸ್ಸಿನ ಮಹಿಳೆಯಾಬ್ಬರು ಬಲಿಯಾಗಿದ್ದಾರೆ.

ಗುಡಿಸಿಲಿನ ಒಳಗೆ ಮಲಗಿದ್ದ ಸಾವಕ್ಕ ಎನ್ನುವ ಮಹಿಳೆ ಗುಡಿಸಿಲಿಗೆ ತಗುಲಿದ ಬೆಂಕಿಯಲ್ಲಿ ಸಾವನ್ನಪ್ಪಿದ್ದಾರೆ. ಗುಡಿಸಲಿನ ಹೊರಗೆ ಮಲಗಿದ್ದ ಆಕೆಯ ಗಂಡ ಹಾಗೂ ಮಕ್ಕಳು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಬೆಂಕಿ ಆಕಸ್ಮಿಕಕ್ಕೆ ಕಾರಣ ತಿಳಿದು ಬಂದಿಲ್ಲ .

ಕಾನ್ಪುರದಲ್ಲಿ ಶೀತ ಮಾರುತಕ್ಕೆ ಮತ್ತಿಬ್ಬರ ಬಲಿ

ಉತ್ತರ ಪ್ರದೇಶದಲ್ಲಿ ಮರಗಟ್ಟಿಸುವ ತೀವ್ರ ಚಳಿ ಮುಂದುವರಿದಿದ್ದು , ರಾಜ್ಯದ ಪ್ರಮುಖ ಕೈಗಾರಿಕಾ ಪಟ್ಟಣ ಕಾನ್ಪುರದಲ್ಲಿ ಬುಧವಾರದಿಂದೀಚೆಗೆ ಶೀತಕ್ಕೆ ಮತ್ತಿಬ್ಬರು ಬಲಿಯಾಗಿದ್ದಾರೆ. ಪಟ್ಟಣದಲ್ಲಿ ಉಷ್ಣಾಂಶದ ಮಟ್ಟ 0.5 ಡಿಗ್ರಿ ಸೆಲ್ಷಿಯಸ್‌ ಮುಟ್ಟಿದೆ. ಈ ವರ್ಷ ಉಷ್ಣಾಂಶ ತೀರಾ ಕನಿಷ್ಠ ಪ್ರಮಾಣಕ್ಕೆ ಕುಸಿಯುತ್ತಿರುವುದು ಎರಡನೇ ಬಾರಿ. ಈ ಮೊದಲು ಜನವರಿ 7 ರಂದು ಉಷ್ಣಾಂಶದ ಮಟ್ಟ 0.6 ಡಿಗ್ರಿ ಸೆಲ್ಷಿಯಸ್‌ ಮುಟ್ಟಿತ್ತು .

ತೀವ್ರ ಚಳಿಗಾಳಿಯಿಂದಾಗಿ ಗಿರಣಿ ಕಾರ್ಮಿಕ ಶಂಕರ್‌ ಲಾಲ್‌ ಗುರುವಾರ ಬೆಳಿಗ್ಗೆ ನಿಧನನಾಗಿದ್ದರೆ, ಹಮಾಲಿ ಕೆಲಸದ ಸರ್ಜು ಅಲಿಯಾಸ್‌ ಸರ್ಕಾರ್‌ ಬುಧವಾರ ಸಾವಿಗೀಡಾಗಿದ್ದಾನೆ. ಇದರಿಂದಾಗಿ ಪ್ರಸ್ತುತ ಶೀತಕಾಲದಲ್ಲಿ ಸತ್ತವರ ಸಂಖ್ಯೆ ಕಾನ್ಪುರದಲ್ಲಿ ನಾಲ್ಕಕ್ಕೆ ಏರಿದೆ.

ಸುರಿಯುತ್ತಿರುವ ಹಿಮ ರೈಲ್ವೆ ಸಂಚಾರಕ್ಕೂ ಅಡ್ಡಿಯಾಗಿದ್ದು , ಅನೇಕ ರೈಲುಗಳ ಆಗಮನ ಹಾಗೂ ನಿರ್ಗಮನ ವೇಳೆಗಳಲ್ಲಿ ವ್ಯತ್ಯಯವುಂಟಾಗಿದೆ ಎಂದು ರೈಲ್ವೆ ವಕ್ತಾರರು ತಿಳಿಸಿದ್ದಾರೆ.

(ಯುಎನ್‌ಐ)