ಜನವರಿ 20, 21ಕ್ಕೆ ಬಂಟರ ಕಲೋತ್ಸವ ನೋಡ ಬನ್ನಿ

ಮಂಗಳೂರು : ಸಿರಿ, ದೇವುಪೂಂಜ, ಅಗೋಳಿ ಮಂಜಣ್ಣ ಮತ್ತು ಬ್ಯಾಂಕಿಂಗ್‌ಗೆ ಹೊಸ ಆಯಾಮ ಕೊಟ್ಟ ಮುಲ್ಕಿ ಸುಂದರರಾಮ ಶೆಟ್ಟಿ ಇವರೆಲ್ಲರ ಸಾಧನೆ ಸ್ಮರಿಸುವ ವೇದಿಕೆಗಳು ಇವರ ಹೆಸರುಗಳಲ್ಲೇ ಸಜ್ಜಾಗಿವೆ. ಜಗತ್ತಿನ ವಿವಿಧೆಡೆಗಳಲ್ಲಿ ತಮ್ಮ ಛಾತಿ, ಕಸುಬು ಮೆರೆಯುತ್ತಿರುವ ದಕ್ಷಿಣ ಕನ್ನಡದ ಪ್ರಮುಖ ಸಮುದಾಯ ‘ಬಂಟ’ ತನ್ನ ಸಂಸ್ಕೃತಿಯನ್ನು ಹಂಚಲು ಜನವರಿ 20 ಹಾಗೂ 21ರಂದು ಕಲಾ ಉತ್ಸವ ಆಯೋಜಿಸಿದೆ. ಖ್ಯಾತ ಬಾಲಿವುಡ್‌ ನಟ ಸುನಿಲ್‌ ಶೆಟ್ಟಿ ಉತ್ಸವದ ಮುಖ್ಯ ಅತಿಥಿಗಳಲ್ಲೊಬ್ಬರು.

ಬಂಟರ ಜೀವನ ಕ್ರಮ, ಅಭಿರುಚಿ, ಸಾಂಸ್ಕೃತಿಕ ನೆಲೆಗಟ್ಟನ್ನು ಪರಿಚಯಿಸಲು ಈ ಉತ್ಸವ ಹಮ್ಮಿಕೊಂಡಿ-ದ್ದು, ನಿಟ್ಟೆ ಶಿಕ್ಷಣ ಟ್ರಸ್ಟ್‌ನ ಅಧ್ಯಕ್ಷ ವಿನಯ ಹೆಗಡೆ ಉತ್ಸವವನ್ನು ಉದ್ಘಾಟಿಸಲಿದ್ದಾರೆ. ಬಂಟರ ಆ ಕಾಲದ ಅವಿಭಕ್ತ ಕುಟುಂಬಗಳ ಸಾಂಸ್ಕೃತಿಕ, ಸಾಹಿತ್ಯಿಕ, ಕಲಾತ್ಮಕ ಹಾಗೂ ಭಾವನಾತ್ಮಕ ಜೀವನವನ್ನು ಇಂದಿನ ಪೀಳಿಗೆಗೆ ಪರಿಚಯಿಸುವ ಉದ್ದಿಶ್ಯ ಉತ್ಸವದ್ದು ಎಂದು ಸುರತ್ಕಲ್‌ ಬಂಟರ ಸಂಘದ ಅಧ್ಯಕ್ಷ ಎ.ದೇವಾನಂದ ಶೆಟ್ಟಿ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.

ಧಾಬಿಯಾ ನ್ಯೂ ಮೆಡಿಕಲ್‌ ಸೆಂಟರ್‌ನ ವ್ಯವಸ್ಥಾಪಕ ನಿರ್ದೇಶಕ ಬಿ.ಆರ್‌.ಶೆಟ್ಟಿ, ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷ ಕೆ.ಸತೀಶಚಂದ್ರ ಹೆಗಡೆ ಹಾಗೂ ಸುರತ್ಕಲ್‌ ಶಾಸಕ ಕೆ.ವಿಜಯಕುಮಾರ್‌ ಶೆಟ್ಟಿ , ಜಿಲ್ಲಾ ಸಚಿವ ಪಿ.ರಮಾನಾಥ ರೈ ಮೊದಲಾದವರು ಸಮಾರಂಭದಲ್ಲಿ ಪಾಲ್ಗೊಳ್ಳಲಿದ್ದಾರೆ.

(ಮಂಗಳೂರು ಪ್ರತಿನಿಧಿಯಿಂದ)