ಎಸ್‌ಟಿಎಫ್‌- ಗಡಿಭದ್ರತಾ ಪಡೆ ನಡುವೆ ವೈಮನಸ್ಸಿಲ್ಲ: ರಾಜಗೋಪಾಲನ್‌

ಚೆನ್ನೈ: ವೀರಪ್ಪನ್‌ ಶಿಕಾರಿಯಲ್ಲಿ ತೊಡಗಿರುವ ಎಸ್‌ಟಿಎಫ್‌ ಹಾಗೂ ಗಡಿಭದ್ರತಾ ಪಡೆಗಳ ನಡುವೆ ಭಿನ್ನಾಭಿಪ್ರಾಯ ತಲೆದೋರಿದೆ ಎನ್ನುವ ವರದಿಗಳನ್ನು ತಮಿಳುನಾಡು ಪೊಲೀಸ್‌ ಮಹಾ ನಿರ್ದೇಶಕ ಆರ್‌. ರಾಜಗೋಪಾಲನ್‌ ನಿರಾಕರಿಸಿದ್ದಾರೆ. ವೈಮನಸ್ಯದ ವದಂತಿಗಳೆಲ್ಲಾ ಕಟ್ಟು ಕಥೆ ಎಂದು ಅವರು ಹೇಳಿದ್ದಾರೆ.

ವೀರಪ್ಪನ್‌ ಶಿಕಾರಿ ಕಾರ್ಯಾಚರಣೆ ಆಶಾದಾಯಕವಾಗಿ ಸಾಗುತ್ತಿದೆ ಎಂದು ಶಿಕಾರಿ ಬಗ್ಗೆ ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ಅವರು ಹೇಳಿದರು. ಎಸ್‌ಟಿಎಫ್‌ ಹಾಗೂ ಗಡಿ ಭದ್ರತಾ ಪಡೆಗಳು ಜಂಟಿಯಾಗಿ ಕಾರ್ಯಾಚರಣೆಯಲ್ಲಿ ತೊಡಗಿವೆ. ಗಡಿ ಭದ್ರತಾ ಪಡೆ ಪ್ರತ್ಯೇಕ ಕಾರ್ಯಾಚರಣೆ ನಡೆಸುತ್ತಿದೆ ಎನ್ನುವುದು ಶುದ್ಧ ಸುಳ್ಳು ಎಂದು ರಾಜಗೋಪಾಲನ್‌ ಸ್ಪಷ್ಟಪಡಿಸಿದರು.

ವೀರಪ್ಪನ್‌ ಇನ್ನೂ ಕಾಡಿನಲ್ಲಿಯೇ ಇದ್ದಾನೆ ಎನ್ನುವುದನ್ನು ಒತ್ತಿ ಹೇಳಿದ ಅವರು, ಈ ಸಾರಿ ವೀರಪ್ಪನ್‌ ಶಿಕಾರಿಯಲ್ಲಿ ಯಶಸ್ವಿಯಾಗುವ ವಿಶ್ವಾಸವನ್ನು ವ್ಯಕ್ತಪಡಿಸಿದರು. ಕಾರ್ಯಾಚರಣೆಯ ಬಗೆಗಿನ ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸಲು ಅವರು ನಿರಾಕರಿಸಿದರು.

(ಯುಎನ್‌ಐ)