ಸಮತಾ ಹೋಳು ಎನ್ನುವುದು ಮಾಧ್ಯಮಗಳ ಸೃಷ್ಟಿ - ಫರ್ನಾಂಡಿಸ್‌

ಮೈಸೂರು : ಸಮತಾ ಪಾರ್ಟಿ ಹೋಳಾಗಿಲ್ಲ . ಪಕ್ಷ ಒಡೆದಿದೆ ಎನ್ನುವುದು ಮಾಧ್ಯಮಗಳ ಸೃಷ್ಟಿ ಎಂದು ಸಮತಾ ಪಕ್ಷದ ಹಿರಿಯ ನಾಯಕ ಹಾಗೂ ಕೇಂದ್ರ ರಕ್ಷಣಾ ಸಚಿವ ಜಾರ್ಜ್‌ ಫರ್ನಾಂಡಿಸ್‌ ಸೋಮವಾರ ಇಲ್ಲಿ ಸುದ್ದಿಗಾರರಿಗೆ ತಿಳಿಸಿದರು.

ಪಕ್ಷದ ರಾಷ್ಟ್ರೀಯ ಅಧಿವೇಶನ ಪ್ರಾರಂಭವಾಗುವ ಮುನ್ನ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ರಘುನಾಥ್‌ ಝಾ ಅವರಿಗೆ ಬೆಂಬಲ ಸೂಚಿಸಿದ್ದಾರೆ ಎನ್ನಲಾದ ಆರು ಎಂಪಿಗಳು ಸೇರಿದಂತೆ ಎಲ್ಲಾ ಸಂಸದರು ಈಗಲೂ ಪಕ್ಷದಲ್ಲಿಯೇ ಇದ್ದಾರೆ, ಅಂದಮೇಲೆ ಪಕ್ಷ ಒಡೆಯುವುದೆಲ್ಲಿ ಬಂತು ಎಂದರು.

ಸುದ್ದಿಗೋಷ್ಠಿಯಲ್ಲಿ ಹಾಜರಿದ್ದ ಪಕ್ಷದ ಅಧ್ಯಕ್ಷ ಜಯಾ ಜೇಟ್ಲಿ , ರಘುನಾಥ್‌ ಝಾ ಮತ್ತು ಕೇಂದ್ರ ಕೃಷಿ ಸಚಿವ ನಿತೀಶ್‌ ಕುಮಾರ್‌ ಕೂಡ ಅಧಿವೇಶನದಲ್ಲಿ ಭಾಗವಹಿಸುತ್ತಿದ್ದಾರೆ. ಪ್ರತಿಕೂಲ ವಾತಾವರಣದಿಂದ ಅವರ ಆಗಮನ ತಡವಾಗಿದೆ ಅಷ್ಟೇ ಎಂದರು.

ಜ.26 ರ ನಂತರ ಕದನ ವಿರಾಮ ಮುಂದುವರಿಕೆ ನಿರ್ಧಾರ : ಪ್ರಕ್ಷುಬ್ಧ ಕಾಶ್ಮೀರದಲ್ಲಿ ಘೋಷಿಸಿರುವ ಕದನ ವಿರಾಮವನ್ನು ಮುಂದುವರಿಸುವ ಕುರಿತು ಜನವರಿ 26 ರ ನಂತರವಷ್ಟೆ ಪರಿಶೀಲಿಸಲು ಸಾಧ್ಯ ಎಂದು ಜಾರ್ಜ್‌ ಫರ್ನಾಂಡಿಸ್‌ ಹೇಳಿದರು. ಕದನ ವಿರಾಮದ ಬಗ್ಗೆ ಪಾಕಿಸ್ತಾನದಿಂದ ಆಶಾದಾಯರ ಪ್ರತಿಕ್ರಿಯೆ ವ್ಯಕ್ತವಾದರೆ ಮಾತ್ರ ಕದನ ವಿರಾಮದ ಬಗ್ಗೆ ಪರಿಶೀಲಿಸಲಾಗುವುದು ಎಂದು ಅವರು ಸ್ಪಷ್ಟಪಡಿಸಿದರು.

(ಯುಎನ್‌ಐ)