ಜಾಗತಿಕ ಮಾರುಕಟ್ಟೆಯಲ್ಲಿ ಭಾರತದ ಬಾಸುಮತಿ ನಂಬರ್‌ 1

ಚೆನ್ನೈ : ಬಾಸುಮತಿ ಅಕ್ಕಿಯ ಒಡೆಯರು ನಾವೇ ಎಂದು ಅಮೆರಿಕ ಕಂಪನಿಗಳು ಎಷ್ಟು ಬಾಯಿ ಮಾಡಿ ಬಡಾಯಿ ಕೊಚ್ಚಿಕೊಂಡರೂ ವಿಶ್ವ ಮಾರುಕಟ್ಟೆಯಲ್ಲಿ ಭಾರತದ ಬಾಸುಮತಿಯ ಪ್ರಾಬಲ್ಯ ಮುಂದುವರಿದಿದೆ.

ಅಮೆರಿಕ ಹಾಗೂ ಥಾಯ್‌ ಕಂಪನಿಗಳ ಬಾಸುಮತಿ ಅಕ್ಕಿ ಗ್ರಾಹಕರ ಮನಸ್ಸನ್ನು ಗೆಲ್ಲುವಲ್ಲಿ ವಿಫಲವಾಗಿದ್ದು, ಜಾಗತಿಕ ಮಾರುಕಟ್ಟೆಯಲ್ಲಿ ಭಾರತದ ಬಾಸುಮತಿಯ ಯಜಮಾನ್ಯ ಮುಂದುವರಿದಿದೆ ಎಂದು ಭಾರತದ ಬಾಸುಮತಿ ಅಕ್ಕಿಯ ರಫ್ತಿನ ಅತ್ಯಂತ ದೊಡ್ಡ ಘಟಕ ಕೆಆರ್‌ಬಿಎಲ್‌ನ ಜಂಟಿ ನಿರ್ವಹಣಾ ನಿರ್ದೇಶಕ ಅನೂಪ್‌ ಕೆ. ಗುಪ್ತ ತಿಳಿಸಿದ್ದಾರೆ. ದೇಶೀಯ ಬಾಸುಮತಿ ಮಾರುಕಟ್ಟೆಯಲ್ಲಿ ಕೂಡ ಕೆಆರ್‌ಬಿಎಲ್‌ ದೊಡ್ಡ ಪಾಲು ಹೊಂದಿದೆ.

ಭಾರತದ ಬಾಸುಮತಿಗೆ ಹೋಲಿಸಿದರೆ, ಪಾಕಿಸ್ತಾನಿ ಬಾಸುಮತಿಯ ಪ್ರಾಬಲ್ಯ ಜಾಗತಿಕ ಮಾರುಕಟ್ಟೆಯಲ್ಲಿ ಅಷ್ಟಿಲ್ಲ ಎನ್ನುವುದನ್ನು ಎತ್ತಿ ತೋರುವ ಗುಪ್ತ , ನಿರ್ದಿಷ್ಟ ಭಾರತೀಯ ಬಾಸುಮತಿ ತಳಿಯ ಪೇಟೆಂಟ್‌ ಬಗೆಗಿನ ಸಮರ ಇನ್ನೂ ಮುಂದುವರಿದಿದೆ ಎಂದು ಹೇಳಿದ್ದಾರೆ.

ಭಾರತದಲ್ಲಿ ಹಿಮಾಲಯದ ತಪ್ಪಲಿನಲ್ಲಿ ಬಾಸುಮತಿ ಅಕ್ಕಿಯನ್ನು ಹೆಚ್ಚಾಗಿ ಬೆಳೆಯಲಾಗುತ್ತಿದ್ದು , ಇಲ್ಲಿನ ವಿಶಿಷ್ಟವಾದ ನೀರು ಹಾಗೂ ಮಣ್ಣು ಭಾರತದ ಬಾಸುಮತಿಯನ್ನು ವಿಶಿಷ್ಟವಾಗಿಸಿವೆ. ಸಿಹಿ ಕಂಪಿನ ಇಂಥಾ ಅಕ್ಕಿಯನ್ನು ಮತ್ತೆಲ್ಲೂ ಬೆಳೆಯಲು ಸಾಧ್ಯವಿಲ್ಲ ಎಂದು ಭಾರತದ ಬಾಸುಮತಿಯ ಮಾರುಕಟ್ಟೆಯಲ್ಲಿನ ಯಶಸ್ಸನ್ನು ಗುಪ್ತ ವಿಶ್ಲೇಷಿಸಿದ್ದಾರೆ.

(ಯುಎನ್‌ಐ)