ಮುಂದಿನ ತಿಂಗಳು ಜಿಎಸ್‌ಎಲ್‌ವಿ ಉಡಾವಣೆ : ಕಸ್ತೂರಿ ರಂಗನ್‌

ನವದೆಹಲಿ : ಭಾರತದ ಅತಿ ದೊಡ್ಡ ರ್ಯಾಕೆಟ್‌ ಉಡಾವಣಾ ವಾಹನ ಎಂಬ ಖ್ಯಾತಿಗೆ ಪಾತ್ರವಾಗಿರುವ ಜಿಎಸ್‌ಎಲ್‌ವಿಯನ್ನು ಫೆಬ್ರುವರಿ ತಿಂಗಳಿನಲ್ಲಿ ಅಂತರಿಕ್ಷಕ್ಕೆ ಹಾರಿ ಬಿಡಲು ಭಾರತ ಬಾಹ್ಯಾಕಾಶ ಸಂಶೋಧನಾ ಸಂಸ್ಧೆ ನಿರ್ಧರಿಸಿದೆ.

ಈ ವಿಷಯವನ್ನು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ ಅಧ್ಯಕ್ಷ ಕೆ. ಕಸ್ತೂರಿ ರಂಗನ್‌ ತಿಳಿಸಿದ್ದಾರೆ. ಇಲ್ಲಿ ಜರುಗಿದ ವಿಜ್ಞಾನ ಸಮಾವೇಶದಲ್ಲಿ ಭಾಗವಹಿಸಿದ ಬಳಿಕ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತಿದ್ದ ಅವರು, ಮುಂದಿನ ತಿಂಗಳು ಹಾರಿ ಬಿಡಲಾಗುವ ಈ ಉಪಗ್ರಹ ಉಡಾವಣೆಗೆ ಸಂಬಂಧಿಸಿದಂತೆ ವಿಧಿ ವಿಧಾನಗಳು ಕಾರ್ಯಾಚರಣೆಯಲ್ಲಿವೆ ಎಂದೂ ಹೇಳಿದರು.

1999ರ ಅಕ್ಟೋಬರ್‌ ತಿಂಗಳಿನಲ್ಲಿಯೇ ಜಿಎಸ್‌ಎಲ್‌ವಿಯನ್ನು ಅಂತರಿಕ್ಷಕ್ಕೆ ಹಾರಿ ಬಿಡುವ ಯೋಜನೆ ಇತ್ತು. ಆದರೆ, ಕಾರಣಾಂತರದಿಂದ ಎರಡು ಬಾರಿ ಉಡಾವಣೆ ಮುಂದೂಡಲ್ಪಟ್ಟಿತು ಎಂದೂ ತಿಳಿಸಿದರು. ಭೂಮಿಯಿಂದ ಮೇಲಕ್ಕೆ 36,000 ಕಿ.ಮೀಟರ್‌ ಕಕ್ಷೆಯಲ್ಲಿ ಸುಮಾರು 2000 ಕೆ.ಜಿ. ತೂಕದ ಉಪಗ್ರಹ ಕೊಂಡೊಯ್ಯುವ ಸಾಮರ್ಥ್ಯದೊಂದಿಗೆ ಜಿ.ಎಸ್‌.ಎಲ್‌.ವಿಯನ್ನು ವಿನ್ಯಾಸಗೊಳಿಸಲಾಗಿದೆ ಎಂದೂ ಅವರು ಹೇಳಿದರು.