ಜ.28 ರಿಂದ ಒಳಾಂಗಣದಲ್ಲಿ ಗಂಡಸರು ಹೆಂಗಸರ ಕ್ರಿಕೆಟ್‌

ಬೆಂಗಳೂರು : ಇದೇ ಮೊದಲ ಬಾರಿಗೆ ಭಾರತೀಯ ಕ್ರೀಡಾ ಪ್ರಾಧಿಕಾರದ ದಕ್ಷಿಣ ಕೇಂದ್ರದಲ್ಲಿ ಜನವರಿ 28ರಿಂದ 30ರವರೆಗೆ ಒಳಾಂಗಣ ಕ್ರಿಕೆಟ್‌ ಕೂಟ ನಡೆಯಲಿದೆ.

ಪುರುಷ ಹಾಗೂ ಮಹಿಳೆಯರ ವಿಭಾಗದಲ್ಲಿ ಸುಮಾರು 25 ತಂಡಗಳು ಟೂರ್ನಿಯಲ್ಲಿ ಸೆಣೆಸಲಿವೆ. ಕರ್ನಾಟಕ ಒಳಾಂಗಣ ಕ್ರೀಡಾ ಒಕ್ಕೂಟ ಈ ಟೂರ್ನಿಯನ್ನು ಆಯೋಜಿಸಿದೆ. ಸಂಯೋಜಕ ಸಮಿತಿ ಅಧ್ಯಕ್ಷ ಗಂಗಭೈರಯ್ಯ ಶುಕ್ರವಾರ ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದರು.

ಒಳಾಂಗಣ ಕ್ರಿಕೆಟ್ಟನ್ನು ಜನಪ್ರಿಯಗೊಳಿಸುವುದು ಟೂರ್ನಿಯ ಉದ್ದೇಶ. ಮಾಮೂಲು ಕ್ರಿಕೆಟ್‌ನಂತಲ್ಲದ ಇದರಲ್ಲಿ ಪ್ರತಿ ತಂಡ 8 ಕ್ರಿಕೆಟಿಗರನ್ನು ಹೊಂದಿರುತ್ತದೆ. 33 ಅಡಿ ಉದ್ದ , 93 ಅಡಿ ಅಗಲದ ಆಯತಾಕಾರದ ಜಾಗೆಯಲ್ಲಿ ಆಟ ನಡೆಯಲಿದ್ದು, ಸುತ್ತ ಮುತ್ತ ಹಾಗೂ ಮೇಲೆ ಬಲೆ ಹಾಕಲಾಗಿರುತ್ತದೆ. ರಬ್ಬರ್‌ ಬಾಲನ್ನು ಟೂರ್ನಿಯಲ್ಲಿ ಬಳಸಲಾಗುತ್ತದೆ. ಚಾಂಪಿಯನ್‌ಷಿಪ್‌ನ ರೂಪುರೇಷೆ ಇನ್ನೂ ನಿರ್ಧರಿತವಾಗಿಲ್ಲ ಎಂದರು.

(ಯುಎನ್‌ಐ)