ದಕ್ಷಿಣ ಕನ್ನಡದ ಗಣೇಶ, ಪ್ರಹ್ಲಾದ್‌ಗೆ ಛೂ ಮಂತರ್‌ ಪ್ರಶಸ್ತಿ

ಮಂಗಳೂರು : ವುಡ್‌ಲ್ಯಾಂಡ್ಸ್‌ ಹೊಟೇಲಿನಲ್ಲೊಬ್ಬ ವೇಯ್ಟರ್‌. ಪತ್ರಕರ್ತರ ಹಿಂಡನ್ನು ಇದಿರುಗೊಂಡ ಈತ ಬಿಸಿಬೇಳೆ ಭಾತ್‌ ಬಡಿಸಲಿಲ್ಲ. ಬದಲಿಗೆ ತಾನು ಗೆದ್ದಿರುವ ಅಂತರರಾಷ್ಟ್ರೀಯ ಪ್ರಶಸ್ತಿಯ ಟ್ರೋಫಿಯನ್ನು ಗಾಳಿಯಲ್ಲಿ ತೇಲಾಡಿಸಿದರು. ಇಂಥದ್ದೇ ಇನ್ನೂ ಹಲವು ಕಣ್ಣುಕಟ್ಟುಗಳು. ಹೆಸರು ಗಣೇಶ ಕುದ್ರೋಳಿ. ಗೆದ್ದಿರುವುದು ಅಂತರರಾಷ್ಟ್ರೀಯ ಜಾದೂಗಾರ ಪ್ರಸ್ತಿಯನ್ನ. ಇದನ್ನು ವಿವರಿಸಲು ಗುರುವಾರ ನಡೆದ ಇದೊಂದು ಪರಿಯ ಮಾಧ್ಯಮ ಗೋಷ್ಠಿ.

ಇತ್ತೀಚೆಗೆ ಕೇರಳದ ತಿರುವನಂತಪುರದಲ್ಲಿ ನಡೆದ ಅಂತರರಾಷ್ಟ್ರೀಯ ಜಾದೂ ಸಮ್ಮೇಳನದಲ್ಲಿ ಮಂಗಳೂರಿನ ವಿಸ್ಮಯ ತಂಡದ ಕುದ್ರೋಳಿ ಗಣೇಶ್‌ ಟೇಬಲ್ಲನ್ನು ಗಾಳಿಯಲ್ಲಿ ತೇಲಿಸಿ, 500 ಸ್ಪರ್ಧಿಗಳ ಪೈಕಿ ಮೊದಲನೆಯವರಾದರು. ಉಡುಪಿಯ ಮತ್ತೊಂದು ಜಾದೂ ತಂಡ ಇಂಡಿಯನ್‌ ಹೌದಿನಿಯ ಪ್ರಹ್ಲಾದ್‌ ಆಚಾರ್ಯ ಹಾಗೂ ಗಣೇಶ್‌ ಅವರಿಗೆ ಕೇರಳ ಮುಖ್ಯಮಂತ್ರಿ ಇ.ಕೆ.ನಾಯನಾರ್‌ ಪ್ರಶಸ್ತಿ ವಿತರಿಸಿದರು.

ಭಾರತೀಯ ಪೌರಾಣಿಕ ಉಡುಗೆ ತೊಟ್ಟ ಹೆಣ್ಣು ಮಗಳು, ಆಕೆಯ ಸಖಿಯರು, ಕಾವಲುಗಾರರು, ಚಾಮರ ಬೀಸುವವರು ಎಲ್ಲಾ ಗಾಳಿಯಲ್ಲಿ ! ಇದು ಪ್ರಹ್ಲಾದ್‌ ಆಚಾರ್ಯ ತೋರಿದ ಮೋಡಿ. ‘ಟೇಬಲ್‌ ಹಾಕಿಂಗ್‌’ ಜಾದೂ ಪ್ರದರ್ಶನದಲ್ಲಿ ಗಣೇಶ್‌ಗೆ ಫಸ್ಟ್‌ ಪ್ರೆೃಸ್‌. ಪ್ರಹ್ಲಾದ್‌ಗೆ ಸಾಧನಶೀಲ ಜಾದೂಗಾರ ಪ್ರಶಸ್ತಿ. ಅಷ್ಟೇ ಅಲ್ಲ, ದಕ್ಷಿಣ ಕನ್ನಡದ ಈ ಪ್ರತಿಭೆಗಳಿಗೆ ಕೇರಳದ ಓಣಂ ಹಬ್ಬಕ್ಕೆ ಖುದ್ದು ಮುಖ್ಯಮಂತ್ರಿಗಳು ಬುಲಾವು ಕೊಟ್ಟಿದ್ದಾರೆ.

(ಇನ್ಫೋ ವಾರ್ತೆ)