ಮೈಸೂರು ವಿಶ್ವವಿದ್ಯಾಲಯದ 81ನೇ ಘಟಿಕೋತ್ಸವ ಇಂದು

ಮೈಸೂರು : ಮೈಸೂರು ವಿಶ್ವ ವಿದ್ಯಾಲಯದ 81ನೇ ಘಟಿಕೋತ್ಸವ ಶುಕ್ರವಾರ ಇಲ್ಲಿ ನಡೆಯಲಿದೆ. ಈ ಘಟಿಕೋತ್ಸವದಲ್ಲಿ 4493 ವಿದ್ಯಾರ್ಥಿನಿಯರೂ ಸೇರಿದಂತೆ 11,459 ವಿದ್ಯಾರ್ಥಿಗಳು ಪದವಿ ಪ್ರಮಾಣ ಪತ್ರ ಪಡೆಯಲಿದ್ದಾರೆ.

ಕಲೆ, ವಾಣಿಜ್ಯ, ಶಿಕ್ಷಣ, ಎಂಜಿನಿಯರಿಂಗ್‌, ವೈದ್ಯಕೀಯ , ಕಾನೂನು, ವಿಜ್ಞಾನ ಹಾಗೂ ತಂತ್ರಜ್ಞಾನ ವಿಭಾಗದಲ್ಲಿ ಪಿಎಚ್‌ಡಿ, ಸ್ನಾತಕೋತ್ತರ ಪದವಿ ಪರೀಕ್ಷೆಗಳಲ್ಲಿ 99-00 ಸಾಲಿನಲ್ಲಿ ಅರ್ಹತೆ ಪಡೆದ ಪದವೀಧರರು ಈ ಪ್ರಮಾಣಪತ್ರಗಳನ್ನು ಪಡೆಯಲಿದ್ದಾರೆ.

ಜೆಎಸ್‌ಎಸ್‌ ಮೆಡಿಕಲ್‌ ಕಾಲೇಜಿನ ವಿದ್ಯಾರ್ಥಿನಿ ಚೋಳ್‌ಪಾಡಿ ಸೋನಿಯಾ ಕಾಮತ್‌ ಅವರು 8 ಚಿನ್ನದ ಪದಕ ಹಾಗೂ 6 ಬಹುಮಾನಗಳೊಂದಿಗೆ ಒಟ್ಟು 14 ಪ್ರಶಸ್ತಿ ಪಡೆಯುವ ಮೂಲಕ ಅತಿ ಹೆಚ್ಚು ಪ್ರಶಸ್ತಿಗೆ ಪಾತ್ರರಾದ ಗೌರವ ಪಡೆಯಲಿದ್ದಾರೆ. ಮಹಾರಾಣಿ ಕಾಲೇಜಿನ ಎಂ. ಮಂಜುಶ್ರೀ 5 ಪದಕ ಹಾಗೂ 5 ಪ್ರಶಸ್ತಿ ಪಡೆದಿದ್ದಾರೆ.

ಸ್ನಾತಕೋತ್ತರ ಪದವಿ ಸಂಸ್ಕೃತ ಮತ್ತು ಗಣಿತದಲ್ಲಿ ಶೈಲಜಾ ಎಚ್‌.ಎಸ್‌. ಮತ್ತು ರಮ್ಯಾ ರಾವ್‌ ಅವರು ಏಳು ಪದಕ ಹಾಗೂ ಎರಡು ಪ್ರಶಸ್ತಿಗಳ ಒಟ್ಟು 9 ಪುರಸ್ಕಾರಗಳನ್ನು ಪಡೆಯಲಿದ್ದಾರೆ.