ಯಶಸ್ಸಿಗೆ ಪ್ರಕೃತಿಯ ಆಶೀರ್ವಾದವೂ ಇತ್ತಾ ?

ವಾರಕಾಲದಿಂದ ಮೇಲೆ ಕವುದಾವ ಮಂಕಾನೆ ಮೋಡ ಅನ್ನುವಂತಿದ್ದ ಬೆಂಗಳೂರಿನ ಆಕಾಶ, ಗುರುವಾರ ಎಂಥಾ ಹದವಿತ್ತಾ ಅನ್ನುವಂತೆ ಸಿಂಗರವಾಗಿತ್ತು . ಬೆಳಿಗ್ಗಿನಿಂದಲೇ ಚುರುಕು ಬಿಸಿಲು. ಇದೆಲ್ಲಾ , ಹಗುರ ಸಮರ ವಿಮಾನ ಹಾರಾಟಕ್ಕೆ ಪ್ರಕೃತಿ ಒದಗಿಸಿದ ವೇದಿಕೆಯಾ? ಅಂದಹಾಗೆ ವಿಮಾನ ಹಾರಾಟದ ಯಶಸ್ಸಿಗೆ ಪ್ರಕೃತಿಯ ಆಶೀರ್ವಾದ ಹಸ್ತವೂ ಇತ್ತಾ ?

ಅದೇನೇ ಇರಲಿ. ತುಂತುರು ಈವತ್ತು ಚೆಲ್ಲಾಡದಿದ್ದರೂ ವಿಮಾನದ ಯಶಸ್ವಿ ಪ್ರಾಯೋಗಿಕ ಹಾರಾಟದ ನಂತರ ಅಲ್ಲಿ ನೆರೆದಿದ್ದವರ ಕಂಗಳು, ಎದೆ ಹನಿದಿದ್ದವು. ಅಲ್ಲಿ ದ್ದುದು ಸಂಭ್ರಮ. ವರ್ಷಗಳ ಕಾಲದ ತಪಸ್ಸು ಕೆನೆಗಟ್ಟಿದ ಧನ್ಯತೆ. ದೇಶ ಮತ್ತಷ್ಟು ಬಲಗೊಂಡಿತು ಅನ್ನುವ ಹೆಮ್ಮೆ .

ಮೋಡ- ಬಿಸಿಲು : ಶುಕ್ರವಾರ ಕೂಡ ಬೆಂಗಳೂರಿನ ಆಕಾಶ ಶುಭ್ರವಾಗಿರುತ್ತದೆ. ಮುಂಜಾನೆ ಕೆಲ ಹೊತ್ತು ಮಾತ್ರ ಥಂಡಿ ಕಾಡಬಹುದು. ಕನಿಷ್ಠ ಉಷ್ಣಾಂಶ 16 ಡಿಗ್ರಿ ಸೆಲ್ಷಿಯಸ್‌ ಆಸುಪಾಸಿನಲ್ಲಿರುತ್ತದೆ ಎಂದು ಹವಾಮಾನ ಇಲಾಖೆಯ ವರದಿ ತಿಳಿಸಿದೆ.

ಗುರುವಾರ ರಾಜ್ಯದ ಅನೇಕ ಭಾಗಗಳ ಉಷ್ಣಾಂಶದಲ್ಲಿ ತುಸು ಕುಸಿತ ಕಂಡು ಬಂದಿತ್ತು . ದಿನದ ಕನಿಷ್ಠ ಉಷ್ಣಾಂಶ 14 ಡಿಗ್ರಿ ಸೆಲ್ಷಿಯಸ್‌ ಬೆಳಗಾವಿಯಲ್ಲಿ ದಾಖಲಾಗಿತ್ತು . ಇದೇ ವಾತಾವರಣ ನಾಳೆಗೂ.