ಬೆಂಗಳೂರಲ್ಲಿ ವಿಶ್ವದ ಅತಿಚಿಕ್ಕ-ಹಗುರ ವಿಮಾನದ ಪರೀಕ್ಷಾ ಹಾರಾಟ

ಬೆಂಗಳೂರು : ವಿಶ್ವದ ಅತಿ ಚಿಕ್ಕ ಹಾಗೂ ಹಗುರ ಯುದ್ಧ ವಿಮಾನದ ಪರೀಕ್ಷಾರ್ಥ ಹಾರಾಟ ಗುರುವಾರ ಬೆಂಗಳೂರಲ್ಲಿ ನಡೆಯಲಿದೆ. ಗುರುವಾರ ಬೆಂಗಳೂರಿನ ಹವಾಮಾನವೂ ಅನುಕೂಲಕರವಾಗೇ ಇರುವ ಹಿನ್ನೆಲೆಯಲ್ಲಿ ಪರೀಕ್ಷಾರ್ಥ ಹಾರಾಟಕ್ಕೆ ಸಕಲ ಸಿದ್ಧತೆಗಳೂ ನಡೆಯುತ್ತಿದೆ.

ಡಾ. ಅಬ್ದುಲ್‌ ಕಲಾಂ ಅವರ ಕಲ್ಪನೆಯ ಕೂಸಾದ ಈ ವಿಮಾನ 15 ವರ್ಷಗಳ ಸತತ ಪರಿಶ್ರಮ ಹಾಗೂ ಸಂಶೋಧನೆಯ ಫಲವಾಗಿ ಹಾಗೂ ಸಂಪೂರ್ಣ ಸ್ವದೇಶೀ ತಂತ್ರಜ್ಞಾನದಿಂದ ಸಿದ್ಧವಾದ ವಿಮಾನ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿದೆ. ವಿಶ್ವದ ಈ ಅತಿ ಚಿಕ್ಕ ಯುದ್ಧ ವಿಮಾನದಲ್ಲಿ ಅಣುಬಾಂಬ್‌ಗಳೂ ಸೇರಿದಂತೆ ಏಳು ಶಸ್ತ್ರಾಸ್ತ್ರಗಳನ್ನು ಕೊಂಡೊಯ್ಯಬಹುದಾಗಿದೆ.

ಒಬ್ಬ ಪೈಲಟ್‌ ವಿನಾ ಈ ವಿಮಾನದಲ್ಲಿ ಮತ್ತಾರಿಗೂ ಜಾಗ ಇಲ್ಲ. ಈ ವಿಮಾನ ತಯಾರಿಕೆಗೆ ತಗುಲಿರುವ ವೆಚ್ಚ 2500 ಕೋಟಿ ರುಪಾಯಿಗಳು. ಈ ವಿಮಾನದ ಮತ್ತೊಂದು ವಿಶೇಷ ಇದು ಕಂಪ್ಯೂಟರ್‌ ನಿಯಂತ್ರಿತ ಹಾರಾಟ ವ್ಯವಸ್ಥೆಯನ್ನೂ ಹೊಂದಿದೆ.

ಶರವೇಗದಲ್ಲಿ ಆಕಾಶದತ್ತ ಹಾರುವ ಈ ವಿಮಾನ, ಅಷ್ಟೇ ವೇಗವಾಗಿ ಭೂಮಿಗೂ ಇಳಿಯುವ ಸಾಮರ್ಥ್ಯವನ್ನು ಹೊಂದಿದೆ. ಸಾಮಾನ್ಯವಾಗಿ ಇತರ ವಿಮಾನಗಳ ಹಾರಾಟಕ್ಕೆ ಕನಿಷ್ಠ ಒಂದೂಕಾಲು ಕಿ.ಮೀಟರ್‌ ರನ್‌ ವೇ ಬೇಕು. ಆದರೆ, ಈ ವಿಮಾನಕ್ಕೆ ಅತಿ ಕಡಿಮೆ ಜಾಗ ಸಾಕು ಎನ್ನುತ್ತಾರೆ ವಿಜ್ಞಾನಿಗಳು. ವಿಮಾನದ ಸ್ಪೀಡ್‌ ಟ್ಯಾಕ್ಸಿಂಗ್‌ ಪರೀಕ್ಷೆ ಪೂರ್ಣಗೊಂಡಿದ್ದು, ವಿಮಾನದ ರೆಕ್ಕೆಗಳ ಸಾಮರ್ಥ್ಯದ ಪರೀಕ್ಷೆ ಆಗಿದೆ.

ಈಗ ಸ್ವತಂತ್ರವಾಗಿ ವಿಮಾನವನ್ನು ಆಕಾಶದಲ್ಲಿ ಹಾರಿಸುವ ಅಂತಿಮ ಪರೀಕ್ಷೆಗೆ ಬೆಂಗಳೂರು ನಗರ ಸಜ್ಜಾಗಿದೆ. ಈ ವಿಮಾನ ಹಾರಾಟಕ್ಕೆ ಶುಭ ಕೋರಲು ಹಾಗೂ ಹಾರಾಟವನ್ನು ವೀಕ್ಷಿಸಲು ವಾಯುಪಡೆಯ ಮುಖ್ಯಸ್ಥರು ಹಾಗೂ ಹಿರಿಯ ಸೇನಾಧಿಕಾರಿಗಳು ಬೆಂಗಳೂರಿಗೆ ಆಗಮಿಸಿದ್ದಾರೆ.

(ಇನ್ಫೋ ವಾರ್ತೆ)