‘ಸಿಲಿಕಾನ್‌ ಸ್ಟೇಟ್‌’ : ರಫ್ತಿನಲ್ಲಿ ಮುಂದೆ, ಶಿಕ್ಷಣದಲ್ಲಿ ಹಿಂದೆ

ಬೆಂಗಳೂರು : ಮಾಹಿತಿ ತಂತ್ರಜ್ಞಾನದ ಹೆಸರು ಬಂದಾಗಲೆಲ್ಲ ಕರ್ನಾಟಕದ ಹೆಸರನ್ನು ಪ್ರಸ್ತಾಪಿಸದೆ ಮುಂದೆ ಸಾಗುವಂತೆಯೇ ಇಲ್ಲ . ಭಾರತದ ಸಿಲಿಕಾನ್‌ ಕಣಿವೆ ಅನ್ನುವ ಹೆಗ್ಗಳಿಕೆ ರಾಜ್ಯದ ರಾಜಧಾನಿಯದ್ದು . ಇನ್ನು ಸಾಫ್ಟ್‌ವೇರ್‌ ರಫ್ತಿನಲ್ಲೂ ಕರ್ನಾಟಕ ದೇಶದಲ್ಲೇ ಮುಂದು. ಅದೂ ಅಷ್ಟಿಷ್ಟಲ್ಲ , ಒಟ್ಟು ರಫ್ತಿನ ಮೂರನೇ ಒಂದು ಪಾಲು ರಾಜ್ಯದ್ದು . ಇದೆಲ್ಲಾ ಸರಿ, ಆದರೆ ಐಟಿ ಶಿಕ್ಷಣದಲ್ಲಿ ರಾಜ್ಯದ ಸ್ಥಾನ? ಉತ್ತರ ನಮ್ಮ ನಿರೀಕ್ಷೆಯಂತಿಲ್ಲ .

ಅಂಕಿ ಅಂಶಗಳನ್ನಿಟ್ಟು ಹೇಳುವುದಾದರೆ, ಐಟಿ ಶಿಕ್ಷಣದಲ್ಲಿ ಕರ್ನಾಟಕಕ್ಕೆ ನಾಲ್ಕನೇ ಸ್ಥಾನ. ನೆರೆಯ ತಮಿಳುನಾಡು ಹಾಗೂ ಆಂಧ್ರಪ್ರದೇಶಗಳು ಕರ್ನಾಟಕಕ್ಕಿಂತ ಮುಂದಿವೆ. ಈ ಎರಡೂ ರಾಜ್ಯಗಳು ದೇಶದಲ್ಲಿ ಅತ್ಯಂತ ಹೆಚ್ಚಿನ ಸಂಖ್ಯೆಯ ಐಟಿ ಪರಿಣತರನ್ನು ರೂಪಿಸುತ್ತಿವೆ. ಕೇಂದ್ರ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯದ ವರದಿಗಳ ಪ್ರಕಾರ, ಐಟಿ ಶಿಕ್ಷಣದ ಯಾದಿಯಲ್ಲಿ ಮೊದಲ ರ್ಯಾಂಕ್‌ ಗಳಿಸಿರುವ ತಮಿಳುನಾಡಿನಲ್ಲಿ ಐಟಿ ಶಿಕ್ಷಣ ನೀಡುವ 189 ಸಂಸ್ಥೆಗಳಿದ್ದರೆ, ಎರಡನೇ ಸ್ಥಾನದಲ್ಲಿರುವ ಮಹಾರಾಷ್ಟ್ರದಲ್ಲಿ 113 ಸಂಸ್ಥೆಗಳು ಹಾಗೂ ಆಂಧ್ರ ಪ್ರದೇಶದಲ್ಲಿ 104 ಐಟಿ ಶಾಲೆಗಳಿವೆ. ಕರ್ನಾಟಕದಲ್ಲಿ ಕಲಿಕಾ ಕೇಂದ್ರಗಳ ಸಂಖ್ಯೆ 73 ಮಾತ್ರ.

ಯಾದಿಯಲ್ಲಿ ಉನ್ನತ ಕ್ರಮಾಂಕ ಗಳಿಸಿರುವ ಇತರ ರಾಜ್ಯಗಳಲ್ಲಿ ಮಧ್ಯಪ್ರದೇಶ (49 ಶಾಲೆ), ಪಶ್ಚಿಮ ಬಂಗಾಳ(20 ಶಾಲೆ), ಒರಿಸ್ಸಾ (18) ಹಾಗೂ ಗುಜರಾತ್‌(15) ಸೇರಿವೆ. ಆದರೆ, ಭಾರತದ ಸಂಸತ್ತಿನ ಹಣೆ ಬರಹ ನಿರ್ಧರಿಸುವ ರಾಜ್ಯವೆಂದೇ ಹೆಸರಾದ ಉತ್ತರಪ್ರದೇಶದಲ್ಲಿ ಕೇವಲ 9 ಐಟಿ ಶಾಲೆಗಳಿವೆ.

(ಇನ್ಫೋ ವಾರ್ತೆ)