ಎಸ್‌ಟಿಎಫ್‌ ಕಾರ್ಯಾಚರಣೆಯಲ್ಲಿ ಅವ್ಯವಹಾರ

ಕನ್ಯಾಕುಮಾರಿ : ವೀರಪ್ಪನ್‌ ಶಿಕಾರಿಗಾಗಿ ಕರ್ನಾಟಕ ಹಾಗೂ ತಮಿಳುನಾಡು ರಾಜ್ಯ ಸರ್ಕಾರಗಳು ನೇಮಿಸಿರುವ ವಿಶೇಷ ಕಾರ್ಯಾಚರಣೆ ಪಡೆಯಲ್ಲಿ ಭಾರೀ ಮೊತ್ತದ ಅವ್ಯವಹಾರ ನಡೆದಿದ್ದು , ಈ ಬಗ್ಗೆ ತನಿಖೆ ನಡೆಸಬೇಕೆಂದು ತಮಿಳು ರಾಷ್ಟ್ರೀಯ ಆಂದೋಲನದ ಮುಖಂಡ ಪಿ. ನೆಡುಮಾರನ್‌ ಒತ್ತಾಯಿಸಿದ್ದಾರೆ.

ಕರ್ನಾಟಕ ಹಾಗೂ ತಮಿಳುನಾಡು ಸರ್ಕಾರಗಳು ಎಸ್‌ಟಿಎಫ್‌ ಕಾರ್ಯಾಚರಣೆಗಾಗಿ ಕ್ರಮವಾಗಿ 110 ಹಾಗೂ 60 ಕೋಟಿ ರುಪಾಯಿಗಳನ್ನು ಖರ್ಚು ಮಾಡಿದ್ದು , ಹಣಕಾಸಿನ ಲೆಕ್ಕಾಚಾರ ಕ್ರಮಬದ್ಧವಾಗಿಲ್ಲ ಎಂದು ಬುಧವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ನೆಡುಮಾರನ್‌ ಆಪಾದಿಸಿದರು. ದೊಡ್ಡ ಪ್ರಮಾಣದ ಹಣಕಾಸಿನ ವ್ಯತ್ಯಾಸದ ವಿವರಗಳನ್ನು ಪತ್ತೆ ಹಚ್ಚಲು ತನಿಖಾ ತಂಡವನ್ನು ನೇಮಿಸಬೇಕೆಂದು ಅವರು ಒತ್ತಾಯಿಸಿದರು.

ಎಲ್‌ಟಿಟಿಇ ಹಾಗೂ ವೀರಪ್ಪನ್‌ ನಡುವಣ ಯಾವುದೇ ಸಂಬಂಧ ಅಥವಾ ಒಪ್ಪಂದ ಏರ್ಪಟ್ಟಿಲ್ಲ ಎಂದು ಹೇಳಿದ ನೆಡುಮಾರನ್‌, ಎಲ್‌ಟಿಟಿಇ ಕೂಡ ಶಾಂತಿಯನ್ನು ಬಯಸುತ್ತದೆ ಎಂದರು.

(ಯುಎನ್‌ಐ)