ಕ್ಯಾಂಬೆಲ್‌- ಹಿಂಡ್ಸ್‌ ಉತ್ತಮ ಜೊತೆಯಾಟ : ವಿಂಡೀಸ್‌ 256 ಕ್ಕೆ 9

ಸಿಡ್ನಿ : ಮಂಗಳವಾರ ಪ್ರಾರಂಭವಾದ ಆಸ್ಟ್ರೇಲಿಯಾ ವಿರುದ್ಧದ ಐದನೇ ಹಾಗೂ ಕೊನೆಯ ಕ್ರಿಕೆಟ್‌ ಟೆಸ್ಟ್‌ ಪಂದ್ಯದ ಮೊದಲ ದಿನದ ಕೊನೆಗೆ ವೆಸ್ಟಿಂಡೀಸ್‌ ತಂಡ 9 ವಿಕೆಟ್‌ ನಷ್ಟಕ್ಕೆ 256 ರನ್‌ ಗಳಿಸಿತ್ತು .

ಪ್ರಸಕ್ತ ಸರಣಿಯಲ್ಲಿ ಮೊದಲ ಬಾರಿಗೆ ಅತ್ಯುತ್ತಮ ಆರಂಭ ಕಂಡ ವಿಂಡೀಸ್‌ ತಂಡದ ಭಾರೀ ಮೊತ್ತದ ನಿರೀಕ್ಷೆ ಯನ್ನು ಆಸ್ಟ್ರೇಲಿಯಾದ ಲೆಗ್‌ಸ್ಪಿನ್ನರ್‌ ಸ್ಟುವರ್ಟ್‌ ಮೆಕ್‌ಗಿಲ್‌ ಹುಸಿಗೊಳಿಸಿದರು. ವಿಂಡೀಸ್‌ನ ಪ್ರಮುಖ ಬ್ಯಾಟ್ಸ್‌ಮನ್‌ಗಳನ್ನು ಪೆವಿಲಿಯನ್‌ಗೆ ವಾಪಸ್ಸು ಕಳುಹಿಸಿದ ಅವರು 92 ರನ್‌ಗೆ 7 ವಿಕೆಟ್‌ ಗಳಿಸಿ ಜೀವಮಾನದ ಅತ್ಯುತ್ತಮ ಸಾಧನೆ ಮಾಡಿದರು. ಮೆಕ್‌ಗ್ರಾಥ್‌ ಹಾಗೂ ಮಿಲ್ಲರ್‌ ಉಳಿದ 2 ವಿಕೆಟ್‌ಗಳನ್ನು ಹಂಚಿಕೊಂಡರು.

ಕ್ಯಾಂಬೆಲ್‌ ಹಾಗೂ ಹಿಂಡ್ಸ್‌ ವಿಂಡೀಸ್‌ ತಂಡಕ್ಕೆ ಅತ್ಯುತ್ತಮ ಆರಂಭ ಒದಗಿಸಿದರು. ಕಾಂಗರೂ ಪಡೆಯ ವಿಶ್ವಖ್ಯಾತ ಬೌಲಿಂಗ್‌ ಪಡೆಯನ್ನು ಚಿಂದಿ ಮಾಡಿದ ಆರಂಭಿಕರು ಮೊದಲ ವಿಕೆಟ್‌ ಜೊತೆಯಾಟಕ್ಕೆ 147 ರನ್‌ ಕಲೆ ಹಾಕಿದರು. ಟೂರ್ನಿಯಲ್ಲಿ ಸಿಂಗಲ್‌ ಡಿಜಿಟ್‌ ರಾಜರಾಗಿದ್ದ ಕ್ಯಾಂಬೆಲ್‌ 79 ರನ್‌ ಗಳಿಸಿದರೆ, ಹಿಂಡ್ಸ್‌ 70 ರನ್‌ ಗಳಿಸಿ ಔಟಾದರು. ಉಳಿದಂತೆ 35 ರನ್‌ ಗಳಿಸಿದ ಲಾರಾ ಹಾಗೂ 28 ರನ್‌ ಗಳಿಸಿದ ಸ್ಯಾಮ್ಯುಯಲ್ಸ್‌ ತಂಡ 250 ರ ಗಡಿ ದಾಟಲು ನೆರವಾದರು. ದಿನದ ಕೊನೆಗೆ ಇನ್ನೂ ಖಾತೆ ಆರಂಭಿಸದ ವಾಲ್ಷ್‌ ಹಾಗೂ ಸ್ಟುವರ್ಟ್‌ ಕ್ರೀಸ್‌ನಲ್ಲಿದ್ದರು.

(ರಾಯ್ಟರ್ಸ್‌)