ಕಾನೂನು ಹೋರಾಟದ ಪರಿಹಾರ ನೀಡಿಕೆಗೆ ಅಬ್ದುಲ್‌ ಕರೀಂ ಪಟ್ಟು

ಮೈಸೂರು : ಅನ್ಯಾಯವನ್ನು ತಡೆಗಟ್ಟುವ ನಿಟ್ಟಿನಲ್ಲಿ ತಾವು ನಡೆಸಿದ ಕಾನೂನು ಹೋರಾಟಕ್ಕೆ ತಗುಲಿದ ವೆಚ್ಚವಾಗಿ 5.5 ಲಕ್ಷ ರುಪಾಯಿ ಪರಿಹಾರ ನೀಡಬೇಕೆಂದು ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ , ಗೃಹಸಚಿವ ಮಲ್ಲಿಕಾರ್ಜುನ ಖರ್ಗೆ, ಕಾನೂನು ಸಚಿವ ಡಿ.ಬಿ. ಚಂದ್ರೇಗೌಡ ಹಾಗೂ ಮುಖ್ಯ ಕಾರ್ಯದರ್ಶಿಯವರಿಗೆ ನಿವೃತ್ತ ಪೊಲೀಸ್‌ ಅಧಿಕಾರಿ ಅಬ್ದುಲ್‌ ಕರೀಂ ತಮ್ಮ ವಕೀಲರ ಮೂಲಕ ನೊಟೀಸು ನೀಡಿದ್ದಾರೆ.

ಸರ್ಕಾರದ ಕ್ರಮದಿಂದ ತಮ್ಮ ಕಕ್ಷಿದಾರರು (ಕರೀಂ) ತೀವ್ರ ಮಾನಸಿಕ ಒತ್ತಡಕ್ಕೊಳಗಾಗಿ ಅನೇಕ ಸಲ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯಬೇಕಾಯಿತು. ಈ ಒತ್ತಡದ ನಡುವೆಯೂ ಅವರು ಸುಪ್ರಿಂಕೋರ್ಟ್‌ನಲ್ಲಿ ನ್ಯಾಯಕ್ಕಾಗಿ ಹೋರಾಡಿದರು. ಈ ಹೋರಾಟಕ್ಕೆ ಅವರು ಸಾಕಷ್ಟು ಹಣ ಖರ್ಚು ಮಾಡಿದ್ದಾರೆ. ಈ ಎಲ್ಲಾ ಒತ್ತಡ, ವೆಚ್ಚಕ್ಕೆ ಸರ್ಕಾರವೇ ಕಾರಣವಾದುದರಿಂದ, ಸಂಬಂಧಪಟ್ಟವರು ಪರಿಹಾರ ತುಂಬಿಕೊಡಬೇಕು ಎಂದು ನೊಟೀಸಿನಲ್ಲಿ ಕರೀಂ ವಕೀಲರು ತಿಳಿಸಿದ್ದಾರೆ.

ನೊಟೀಸು ತಲುಪಿದ 2 ತಿಂಗಳೊಳಾಗಿ ಪರಿಹಾರ ನೀಡುವಂತೆಯೂ, ತಪ್ಪಿದಲ್ಲಿ ನ್ಯಾಯಾಲಯದಲ್ಲಿ ಮೊಕದ್ದಮೆ ಹೂಡುವುದಾಗಿಯೂ ವಕೀಲರು ಎಚ್ಚರಿಸಿದ್ದಾರೆ. ಹಾಗೂ ನೊಟೀಸು ಕಳುಹಿಸಲು ತಗುಲಿದ 5 ಸಾವಿರ ರು. ವೆಚ್ಚವನ್ನು ಹಿಂತಿರುಗಿಸುವಂತೆಯೂ ತಿಳಿಸಲಾಗಿದೆ.

ಟಾಡಾ ಬಂಧಿಗಳನ್ನು ಬಿಡುಗಡೆ ಮಾಡುವ ರಾಜ್ಯ ಸರ್ಕಾರದ ತೀರ್ಮಾನವನ್ನು ಸುಪ್ರಿಂಕೋರ್ಟ್‌ನಲ್ಲಿ ಪ್ರಶ್ನಿಸಿದ್ದ ಅಬ್ದುಲ್‌ ಕರೀಂ ಅವರು ತಮ್ಮ ಹೋರಾಟದಲ್ಲಿ ಯಶಸ್ವಿಯಾಗಿದ್ದರು. ಕರೀಂ ಅವರ ಹೋರಾಟವನ್ನು ಶ್ಲಾಘಿಸಿದ್ದ ಸುಪ್ರಿಂಕೋರ್ಟ್‌, ಆ ಶ್ಲಾಘನೆಯನ್ನೇ ಪರಿಹಾರ ಎಂದು ತಿಳಿಯಲು ಸೂಚಿಸಿ ಪ್ರತ್ಯೇಕ ಪರಿಹಾರಕ್ಕೆ ನಿರಾಕರಿಸಿದ್ದನ್ನು ಇಲ್ಲಿ ನೆನೆಯಬಹುದು.

(ಇನ್ಫೋ ವಾರ್ತೆ)