ಗಣಿ ಕಾರ್ಮಿಕರ ಮೇಲೆ ಹಲ್ಲೆ ಕೆಜಿಎಫ್‌ ಉದ್ವಿಗ್ನ

ಕೋಲಾರ : ವಿರೋಧಿ ಕಾರ್ಮಿಕ ಸಂಘಟನೆಯ ಗುಂಪಿನವರು ನಿರಶನ ನಿರತ ಇಬ್ಬರು ಕಾರ್ಮಿಕರ ಮೇಲೆ ಮಾರಣಾಂತಿಕವಾಗಿ ಹಲ್ಲೆ ಮಾಡಿದರೆಂಬ ಹಿನ್ನೆಲೆಯಲ್ಲಿ ಬುಧವಾರ ಚಿನ್ನದ ಗಣಿಯ ಕೆ.ಜಿ.ಎಫ್‌ನಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿತ್ತು.

ಗಣಿ ಕಾರ್ಮಿಕರಾದ ರವಿ ಮತ್ತು ವೇಣು ಅವರ ಮೇಲೆ ಹಲ್ಲೆ ನಡೆದಿದೆ ಎಂಬ ಸುದ್ದಿ ಹಬ್ಬುತ್ತಿದ್ದಂತೆಯೇ ಜಿಲ್ಲಾ ಪೊಲೀಸ್‌ ಅಧಿಕಾರಿಗಳ ಕಚೇರಿಯ ಎದುರು ಭಾರಿ ಸಂಖ್ಯೆಯಲ್ಲಿ ಸೇರಿದ ಜನರ ಗುಂಪು ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮಕೈಗೊಳ್ಳಬೇಕು ಎಂದು ಆಗ್ರಹಿಸಿತು ಎಂದು ಪೊಲೀಸರು ತಿಳಿಸಿದ್ದಾರೆ.

ಈ ಮಧ್ಯೆ ಗಾಯಗೊಂಡಿರುವ ರವಿ ಅವರನ್ನು ಕೆ.ಜಿ.ಎಫ್‌. ಸಾರ್ವಜನಿಕ ಆಸ್ಪತ್ರೆಗೂ, ವೇಣು ಅವರನ್ನು ಬೆಂಗಳೂರಿನ ನಿಮ್ಹಾನ್ಸ್‌ ಆಸ್ಪತ್ರೆಗೂ ಸೇರಿಸಲಾಗಿದೆ. ಕೇಂದ್ರ ವಲಯದ ಐಜಿಪಿ ಎನ್‌. ಅಚ್ಚುತ ರಾವ್‌ ಅವರು ಸ್ಥಳಕ್ಕೆ ಭೇಟಿ ನೀಡಿದ್ದರು. ಹೆಚ್ಚುವರಿ ಪೊಲೀಸ್‌ ಪಡೆಯನ್ನೂ ನಿಯೋಜಿಸಲಾಗಿದ್ದು, ಪರಿಸ್ಥಿತಿ ಹತೋಟಿಯಲ್ಲಿದೆ.

ಕೆಜಿಎಫ್‌ ಬಂದ್‌ : ಚಿನ್ನ ನೀಡಿದ ಕೈಗಳಿಗೆ ಅನ್ನ ನೀಡಿ ಎಂದು ಒತ್ತಾಯಿಸಿ ಆರ್‌ಪಿಐ ಕರೆ ನೀಡಿದ್ದ ಕೆಜಿಎಫ್‌ ಬಂದ್‌ಗೆ ಉತ್ತಮ ಪ್ರತಿಕ್ರಿಯೆ ದೊರಕಿತು. ಅಂಗಡಿ ಮುಂಗಟ್ಟುಗಳು, ಸಿನಿಮಾ ಮಂದಿರಗಳು, ಬ್ಯಾಂಕ್‌ ಹಾಗೂ ಶಿಕ್ಷಣ ಸಂಸ್ಥೆಗಳ ಮುಚ್ಚಿದ್ದವು. ಕಳೆದ ಐದು ದಿನಗಳಿಂದಲೂ ಗಣಿಯ ಕಾರ್ಮಿಕರು ಚಿನ್ನದ ಗಣಿ ಮುಚ್ಚದಂತೆ ಆಗ್ರಹಿಸಿ, ಸರದಿ ಉಪವಾಸ ಮುಷ್ಕರ ನಡೆಸುತ್ತಿದ್ದಾರೆ.

ಈ ಮಧ್ಯೆ ಬುಧವಾರ ಪಟ್ಟಣದಲ್ಲಿ ಬೃಹತ್‌ ಮೆರವಣಿಗೆಯೂ ನಡೆಯಿತು. 27ರಂದು ದೆಹಲಿಯಲ್ಲಿ ಮೆರವಣಿಗೆ ನಡೆಸಿ ಕೆಜಿಎಫ್‌ ಉಳಿಸಿ ಹೋರಾಟ ಮುಂದುವರಿಸಲೂ ನಿರ್ಧರಿಸಲಾಯಿತು. ಮಂಗಳವಾರ ನಡೆದ ಹಲ್ಲೆಯ ಘಟನೆಯಾಂದನ್ನು ಹೊರತುಪಡಿಸಿ, ಬಂದ್‌ ಶಾಂತಿಯುತವಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. (ಯು.ಎನ್‌.ಐ, ಇನ್‌ಫೋ ವರದಿ)