ವೃದ್ಧರಿಗೆ ಪೊಲೀಸ್ ‘ಆಸರೆ’ : ಕರ್ತವ್ಯದ ಲಿಸ್ಟ್ನಲ್ಲಿ ಲೈಟ್ ಬಿಲ್ ಪಾವತಿ
ಹಾಸನ : ವೃದ್ಧರಿಗೆ ಸಹಾಯ ಮಾಡುವ ಉದ್ದೇಶದಿಂದ ಪೊಲೀಸ್ ಇಲಾಖೆಯು ‘ಆಸರೆ’ ಎನ್ನುವ ಹೊಸ ಯೋಜನೆಯನ್ನು ಆರಂಭಿಸಿದ್ದು , ದಕ್ಷಿಣ ವಲಯ ಡಿಐಜಿ ಶ್ರೀ ವಾಸ್ತವ ಅವರು ಹಾಸನದಲ್ಲಿ ಬುಧವಾರ ಈ ಯೋಜನೆಯನ್ನು ಉದ್ಘಾಟಿಸಿದರು.
ಯೋಜನೆಯ ಪ್ರಕಾರ, ಜಿಲ್ಲೆಯ ಆಯಾಯ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ, ಸಾಕಷ್ಟು ಭದ್ರತೆಯಿಲ್ಲದ ಮನೆಯಲ್ಲಿ ವಾಸಿಸುತ್ತಿರುವ ವೃದ್ಧರ ಪಟ್ಟಿ ತಯಾರಿಸಲಾಗುವುದು . ಗ್ರಾಮ ಅಥವಾ ಮೊಹಲ್ಲಾಗಳಿಗೆ ಪೊಲೀಸ್ ಕಾನ್ಸ್ಟೇಬಲ್ ಒಬ್ಬರನ್ನು ನೇಮಿಸಿ ಅವರನ್ನು ಸಮುದಾಯ ಪೊಲೀಸ್ ಅಧಿಕಾರಿ ಎಂದು ಕರೆಯಲಾಗುವುದು. ಸಮುದಾಯ ಅಧಿಕಾರಿ ಪ್ರತಿ ವಾರಕ್ಕೊಮ್ಮೆ ಪಟ್ಟಿಯಲ್ಲಿರುವ ವೃದ್ಧರ ಮನೆಗಳಿಗೆ ಭೇಟಿ ನೀಡುವಂತೆ ನೋಡಿಕೊಳ್ಳಲಾಗುವುದು.
ಪ್ರತಿ ವಾರದ ಭೇಟಿಯ ಸಂದರ್ಭದಲ್ಲಿ ಸಮುದಾಯ ಪೊಲೀಸ್ ಅಧಿಕಾರಿಗಳು ವೃದ್ಧರ ಮನೆಯ ಫೋನ್ ಬಿಲ್, ಕರೆಂಟ್ ಬಿಲ್ ಇತ್ಯಾದಿಗಳನ್ನು ಕಟ್ಟಲು ಸಹಕರಿಸುತ್ತಾರೆ. ವೃದ್ಧಾಪ್ಯದ ಅಸೌಖ್ಯವಿದ್ದಲ್ಲಿ ನೆರೆಹೊರೆಯವರ ಸಹಾಯದೊಂದಿಗೆ ಅವರನ್ನು ಆಸ್ಪತ್ರೆಗೆ ಸಾಗಿಸುವ ಏರ್ಪಾಟು ಮಾಡಿ, ಅಗತ್ಯವಾದಲ್ಲಿ ಸಾಮಾಜಿಕ ಸಂಘ ಸಂಸ್ಥೆಗಳ ಮೂಲಕ ನೆರವು ಕಲ್ಪಿಸಿಕೊಡುವುದು ಈ ಯೋಜನೆಯಲ್ಲಿ ಅಡಕವಾಗಿದೆ.
ಸಮುದಾಯ ಅಧಿಕಾರಿ ವೃದ್ಧರ ಮನೆಗೆ ಭೇಟಿ ನೀಡಿರುವ ಕುರುಹಾಗಿ ಪಾಯಿಂಟ್ ಪುಸ್ತಕವಿಟ್ಟು ಅದರಲ್ಲಿ ಭೇಟಿ ನೀಡಿದ ಸಮಯ ಮತ್ತು ದಿನವನ್ನು ನಮೂದಿಸಲಾಗುತ್ತದೆ.
(ಇನ್ಫೋ ವಾರ್ತೆ)