ಭಾರತ್‌ ಸಂಚಾರ್‌ ಏಷ್ಯಾ ಕಪ್‌ ಟೆನಿಸ್‌ : ಭಾರತಕ್ಕೆ ಕೊರಿಯಾದ ಸ್ಪರ್ಧೆ

ನವದೆಹಲಿ : ಎಟಿಪಿ ವಿಶ್ವ ಡಬಲ್ಸ್‌ ನೆನಪು ಇನ್ನೂ ಹಸುರಾಗಿರುವಾಗಲೇ, ಮಂಗಳವಾರ ಪ್ರಾರಂಭವಾಗುವ ಭಾರತ್‌ ಸಂಚಾರ್‌ ಏಷ್ಯಾ ಕಪ್‌ ಟೆನಿಸ್‌ ಟೂರ್ನಿಯಲ್ಲಿ ಭಾರತ ಬಲಾಢ್ಯ ಕೊರಿಯಾದ ಸ್ಪರ್ಧೆಗೆ ಅಣಿಯಾಗುತ್ತಿದೆ.

ಎಟಿಪಿ ವಿಶ್ವ ಡಬಲ್ಸ್‌ ನಂತರ ವಿಶ್ರಾಂತಿ ಬಯಸಿರುವ ಲಿಯಾಂಡರ್‌ ಪೇಸ್‌ ಅನುಪಸ್ಥಿತಿಯ ಕಾರಣ ಮಹೇಶ್‌ ಭೂಪತಿ ಭಾರತ ತಂಡದ ನಾಯಕತ್ವ ವಹಿಸಲಿದ್ದಾರೆ. ಭಾರತ ಬುಧವಾರ ಟೂರ್ನಿಯಲ್ಲಿ ಕೊರಿಯಾ ವಿರುದ್ಧ ತನ್ನ ಮೊದಲ ಪಂದ್ಯ ಆಡಲಿದೆ.

ಹ್ಯುಯಂಗ್‌ ಟೇಕ್‌ ಲೀ, ಯಾಂಗ್‌-2 ಯೂನ್‌ ಹಾಗೂ ಸೇಯಂಗ್‌ ಹುನ್‌ ಲೀ ಅವರನ್ನೊಳಗೊಂಡ ಕೊರಿಯಾ ತಂಡ ಟೂರ್ನಿಯಲ್ಲಿ ಬಲಿಷ್ಠ ತಂಡವಾಗಿದೆ. ಕಳೆದ ಸಾಲಿನ ಚಾಂಪಿಯನ್ಸ್‌ ಉಜ್ಬೇಕಿಸ್ತಾನ ಈ ಬಾರಿ ಸ್ಪರ್ಧೆಗೆ ಸೆಣಸುತ್ತಿಲ್ಲ. ಪುರುಷರ ವಿಭಾಗದ ಸ್ಪರ್ಧೆಯಲ್ಲಿರುವ ಇತರೆ ತಂಡಗಳೆಂದರೆ ಥೈಲ್ಯಾಂಡ್‌ ಹಾಗೂ ಚೀನಾ.

ನಾಲ್ಕನೇ ವರ್ಷದ ಈ ಸ್ಪರ್ಧೆಯಲ್ಲಿ ಇದೇ ಮೊದಲ ಬಾರಿಗೆ ಮಹಿಳಾ ಚಾಂಪಿಯನ್‌ಷಿಪ್‌ನ್ನು ಪರಿಚಯಿಸಲಾಗುತ್ತಿದೆ. ಪುರುಷರ ವಿಭಾಗದಲ್ಲಿ 4 ಹಾಗೂ ಮಹಿಳೆಯರ ವಿಭಾಗದಲ್ಲಿ 3 ತಂಡಗಳು ಸ್ಪರ್ಧಿಸಲಿವೆ. ಈ ಹಿಂದೆ ಗುಂಪುಗಳನ್ನಾಗಿ ವಿಂಗಡಿಸದೆ, 8 ಪುರುಷರ ತಂಡಗಳ ನಡುವೆ ಸ್ಪರ್ಧೆ ನಡೆದಿತ್ತು.

(ಯುಎನ್‌ಐ)