ಕಲಿತ ಶಾಲೆಗೆ ಸುಧಾಮೂರ್ತಿ ಕೊಟ್ಟ ಕಟ್ಟಡದ ಕೊಡುಗೆ

ಹುಬ್ಬಳ್ಳಿ : ಸಮಾಜಸೇವೆಗಾಗಿ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿರುವ ಇನ್ಫೋಸಿಸ್‌ ಸುಧಾಮೂರ್ತಿ, ತಾವು ಓದಿದ ನ್ಯೂ ಇಂಗ್ಲಿಷ್‌ ಸ್ಕೂಲ್‌ನಲ್ಲಿನ ಕೊಠಡಿಗಳ ಅಭಾವಕ್ಕೆ ಸ್ಪಂದಿಸಿ, ದೇಣಿಗೆ ನೀಡಿ, ನಿರ್ಮಿತವಾಗಿರುವ ಹೊಸ ಶಾಲಾ ಕಟ್ಟಡವನ್ನು ಡಿಸೆಂಬರ್‌ 12ರಂದು ರಾಜ್ಯಪಾಲರಾದ ವಿ.ಎಲ್‌.ರಮಾದೇವಿ ಉದ್ಘಾಟಿಸಲಿದ್ದಾರೆ.

ತೊಂಬತ್ತೊಂದು ವರ್ಷ ಹಳೆಯ ಈ ಶಾಲೆ ‘ತೊರವಿ ಶಾಲೆ’ಯೆಂದೇ ಪ್ರಸಿದ್ಧಿ. ಇಷ್ಟು ಹಳೆಯ ಶಾಲೆಯಲ್ಲಿ ವರ್ಷದಿಂದ ವರ್ಷಕ್ಕೆ ಏರುತ್ತಿರುವ ವಿದ್ಯಾರ್ಥಿಗಳ ಸಂಖ್ಯೆ ಕೊಠಡಿಗಳ ಅಭಾವಕ್ಕೆ ಕಾರಣವಾಯಿತು. ನ್ಯೂ ಎಜುಕೇಷನ್‌ ಸೊಸೈಟಿ ಈ ಶಾಲೆಯನ್ನು ನಡೆಸುತ್ತಿರುವ ಸಂಸ್ಥೆ. ಇದೇ ಸಂಸ್ಥೆಯ ಗರ್ಲ್ಸ್‌ ಇಂಗ್ಲಿಷ್‌ ಶಾಲೆಯಲ್ಲಿ ಸುಧಾಮೂರ್ತಿ ಅವರು ಕಲಿತಿದ್ದರು.

ಈ ಹಿಂದೆ ಗರ್ಲ್ಸ್‌ ಇಂಗ್ಲಿಷ್‌ ಶಾಲೆಗೆ ಹೊಸ ಕಟ್ಟಡ ಕಟ್ಟಲು ಸುಧಾಮೂರ್ತಿ ಅವರು ದೇಣಿಗೆ ನೀಡಿದ್ದು, ವಿದ್ಯಾರ್ಥಿಗಳು ಅದರ ಲಾಭ ಪಡೆಯುತ್ತಿದ್ದಾರೆ. ಈಗಾಗಲೇ ಶಾಲೆಗೆ ಇನ್ಫೋಸಿಸ್‌ ವತಿಯಿಂದ 4 ಕಂಪ್ಯೂಟರ್‌ಗಳನ್ನೂ ಸುಧಾಮೂರ್ತಿ ಕೊಡುಗೆಯಾಗಿ ಕೊಟ್ಟಿದ್ದಾರೆ. ವಿವಿಧ ವಿಷಯಗಳಲ್ಲಿ ವೃತ್ತಿಪರ ಶಿಕ್ಷಣ, ಡಿಪ್ಲೋಮ ಕೋರ್ಸುಗಳನ್ನು ಪ್ರಾರಂಭಿಸಲು ನಿರ್ಧರಿಸಿರುವ ಸಂಸ್ಥೆಗೆ ಅನುಕೂಲವಾಗಲೆಂದು ಸುಧಾಮೂರ್ತಿ ಅವರು ತಮ್ಮ ತಾತ ಕದಿಮ ದೀವಾನ ಅವರ ಹೆಸರಿನಲ್ಲಿ ಹೊಸ ಕಟ್ಟಡಕ್ಕೆ ದೇಣಿಗೆ ಕೊಟ್ಟಿದ್ದರು.

(ಇನ್ಫೋ ವಾರ್ತೆ)