ಮುರಿದು ಬಿದ್ದ ಮಾತುಕತೆ : 3ನೇ ದಿನಕ್ಕೆ ಅಂಚೆ ನೌಕರರ ಮುಷ್ಕರ

ನವದೆಹಲಿ : ಅಂಚೆ ನೌಕರರ ಒಕ್ಕೂಟ ಮತ್ತು ಸರಕಾರಗಳ ನಡುವೆ ನಡೆದ ಮಾತುಕತೆ ವಿಫಲಗೊಂಡಿರುವ ಹಿನ್ನೆಲೆಯಲ್ಲಿ ರಾಷ್ಟ್ರಾದ್ಯಂತ ನಡೆಯುತ್ತಿರುವ ಅಂಚೆ ನೌಕರರ ಮುಷ್ಕರ 3ನೇ ದಿನಕ್ಕೆ ಕಾಲಿಟ್ಟಿದೆ.

ಹೆಚ್ಚುವರಿ ವಿಭಾಗೀಯ ನಿವೃತ್ತ ನೌಕರರಿಗೆ ನಿವೃತ್ತಿ ವೇತನ ನೀಡಲು ಕಾನೂನು ತೊಡಕು ಇರುವುದರಿಂದ ಈ ಬೇಡಿಕೆಗೆ ಒಪ್ಪುವುದು ಸಾಧ್ಯವಿಲ್ಲ. ಉಳಿದ ಬೇಡಿಕೆಗಳಿಗೆ ಸರಕಾರ ಒಪ್ಪಿಗೆ ನೀಡಿದೆ ಎಂದು ಸಂಪರ್ಕ ಸಚಿವ ರಾಂ ವಿಲಾಸ್‌ ಪಾಸ್ವಾನ್‌ ಮಾತುಕತೆಯ ನಂತರ ತಿಳಿಸಿದ್ದಾರೆ.

ಸರಕಾರ ಈಗ ಒಪ್ಪಿಗೆ ನೀಡಲಾಗಿರುವ ಬೇಡಿಕೆಗಳಿಂದ ಶೇಕಡಾ 10ರಷ್ಟು ಮಂದಿ ನೌಕರರಿಗೆ ಅನುಕೂಲವಾಗುತ್ತದೆ. ಆದ್ದರಿಂದ ಮುಷ್ಕರ ಹಿಂದಕ್ಕೆ ಪಡೆಯುವುದು ಸಾಧ್ಯವಿಲ್ಲ ಎಂದು ನೌಕರ ಒಕ್ಕೂಟದ ಪದಾಧಿಕಾರಿಗಳು ತಿಳಿಸಿದ್ದಾರೆ. ಅಂಚೆ ಸೇವೆಗಳು ರಾಷ್ಟ್ರಾದ್ಯಂತ ತೀರಾ ಅಸ್ತವ್ಯಸ್ತಗೊಂಡಿವೆ.