‘ಆ ನೂರೆಂಟು ದಿನ’ ಆಕಾಶವಾಣಿಯಲ್ಲಿ ರಾಜ್‌ ಸಂದರ್ಶನ ಸರಣಿ

ಬೆಂಗಳೂರು : ಕಾಡಿನಲ್ಲಿ 108 ದಿನ ಕಳೆದ ಕನ್ನಡದ ವರನಟ ರಾಜ್‌ಕುಮಾರ್‌ ತಮ್ಮ ಕಾಡಿನ ಅನುಭವಗಳನ್ನು ನಾಡಿನಲ್ಲಿ ಹಂಚಿಕೊಂಡಿದ್ದಾರೆ. ಕಾಡಿನಿಂದ ನಾಡಿಗೆ ಸಂದೇಶ ರವಾನಿಸುತ್ತಿದ್ದ ಬಾನುಲಿಯೇ ಈಗ ರಾಜ್‌ ಅಂತರಂಗದ ಮಾತುಗಳನ್ನು ಕನ್ನಡಿಗರಿಗೆ ಕೇಳಿಸುತ್ತಿದೆ.

‘ಆ ನೂರೆಂಟು ದಿನ’ ಎಂಬ ಶೀರ್ಷಿಕಿಯ ಈ ಕಾರ್ಯಕ್ರಮ ಸರಣಿ ನವೆಂಬರ್‌ 30ರ ಗುರುವಾರದಿಂದ 10 ದಿನಗಳ ಕಾಲ ಬಿತ್ತರಗೊಳ್ಳಲಿದೆ. ಪ್ರತಿದಿನ ಬೆಳಗ್ಗೆ 7-45ರಿಂದ ಬೆಂಗಳೂರು ಆಕಾಶವಾಣಿಯಿಂದ ಪ್ರಸಾರವಾಗುವ ಈ ಕಾರ್ಯಕ್ರಮವನ್ನು ರಾಜ್ಯದ ಇತರೆ ಬಾನುಲಿ ಕೇಂದ್ರಗಳು ಸಹ ಪ್ರಸಾರ ಮಾಡಲಿವೆ.

ಅಪಹರಣ ಹೇಗೆ ನಡೆಯಿತು ಎನ್ನುವುದರಿಂದ ಹಿಡಿದು ಕಾಡಿನಲ್ಲಿ 108 ದಿನ ಹೇಗೆ ಕಳೆದೆ ಎಂಬ ಅನುಭವಗಳನ್ನು ರಾಜ್‌ಕುಮಾರ್‌ ಶ್ರೋತೃಗಳೊಂದಿಗೆ ಹಂಚಿಕೊಂಡಿದ್ದಾರೆ. ಪುಟ್ಟ ರೇಡಿಯೋ ತಮಗೆ ಹೇಗೆ ಆಸರೆಯಾಗಿತ್ತು, ಬದುಕಲು ಹೇಗೆ ನವ ಚೈತನ್ನ ನೀಡುತ್ತಿತ್ತು ಎಂಬುದನ್ನು ವಿವರಿಸಿದ್ದಾರೆ ಎಂದು ಆಕಾಶವಾಣಿಯ ಪ್ರಕಟಣೆ ತಿಳಿಸಿದೆ. ಈ ಸಂದರ್ಶನ ಆಧಾರಿತ ಸರಣಿ ಕಾರ್ಯಕ್ರಮವನ್ನು ಬೆಂಗಳೂರು ಆಕಾಶವಾಣಿ ಕೇಂದ್ರದ ಕಾರ್ಯಕ್ರಮ ನಿರ್ವಾಹಕ ಉದಯಾದ್ರಿ ನಿರ್ಮಿಸಿದ್ದಾರೆ.